قاسكويلەر قازاقستان پوليسياسىنىڭ قىزمەتىن تەرىس قىرىنان كورسەتكەن
قاڭتارداعى قايعىلى وقيعالاردان كەيىن ەل ازاماتتارىنىڭ قوعامدىق ساناسىن باقىلاۋ ءۇشىن اقپاراتتىق سوعىس باستالدى. رەسمي ورگانداردىڭ ەسكەرتۋلەرىنە قاراماستان، الەۋمەتتىك جەلىلەر ارقىلى كورىنەۋ جالعان اقپارات تاراتۋ جاعدايلارى جيىلەپ كەتتى. بۇل تۋرالى ورتالىق كوممۋنيكاسيالار قىزمەتىندە وتكەن بريفينگتە ق ر ءىىم تەرگەۋ دەپارتامەنتىنىڭ باستىعى سانجار ءادىلوۆ مالىمدەدى.
«بۇل اقپاراتتىق شابۋىلداردىڭ تۇپكى ماقساتى قۇقىق قورعاۋ ورگاندارىنىڭ بەدەلىن ءتۇسىرۋ عانا ەمەس، سونداي-اق قازاقستان رەسپۋبليكاسىنىڭ مەملەكەتتىك جۇيەسىن السىرەتۋ بولىپ تابىلادى. جالعان حابارلاردىڭ نەگىزگى بولىگى ەلدەن تىس جەرلەردەن تاراتىلادى. بۇگىندە الەۋمەتتىك جەلىلەردە شەتەلدە تىركەلگەن 43 اككاۋنت انىقتالدى. قاسكويلەر قازاقستان پوليسياسىنىڭ قىزمەتىن تەرىس قىرىنان كورسەتەدى، الايدا العاشقى كۇندەرى قارۋسىز قوعامدىق ءتارتىپتى قامتاماسىز ەتكەن سولار بولاتىن»، - دەپ مالىمدەدى سپيكەر.