جالعان اقپارات تاراتقان بلوگەرلەر ەندى 103 مىڭ 500 تەڭگەدەن 345 مىڭ تەڭگەگە دەيىن ايىپپۇل تولەيدى.
ونىڭ مولشەرى ايلىق ەسەپتىك كورسەتكىشكە قاراي وزگەرىپ وتىرادى. عالامتورداعى ارەكەتىن ءبىر جىلدا قايتالاسا، ەكى ەسە ايىپپۇل ارقالايدى. ىرىققا كونبەسە، 15 تاۋلىككە دەيىن قاماۋعا الىنادى، دەپ حابارلايدى Almaty-akshamy.kz.
پرەزيدەنت «ونلاين-پلاتفورمالار جانە ونلاين-جارناما تۋرالى» زاڭعا قول قويدى. زاڭنىڭ ماقساتى – ەڭ الدىمەن ادام قۇقىعىن قورعاۋ. رەسمي دەرەكتەرگە سۇيەنسەك، وتكەن جىلى ينتەرنەتتە جالعان اقپارات تاراتۋعا قاتىستى 5 جارىم مىڭنان استام ءىس تىركەلگەن. ەندى عالامتوردا ەركىنسىنگەندەردى ەشكىم ماڭدايىنان سىيپايمايدى. ءتيىستى زاڭدى پارلامەنت ماقۇلدادى. پرەزيدەنت قول قويدى.
«پارلامەنت مۇشەلەرى، ءماجىلىس مۇشەلەرى وسى ونلاين-پلاتفورما جونىندەگى زاڭدى جاساعان كەزدە ەڭ ءبىرىنشى ەۋروپا ەلدەرىنىڭ، سونىمەن بىرگە اقش-تىڭ الەۋمەتتىك جەلىنى رەتتەۋ جونىندەگى پراكتيكاسىنا سۇيەندى. الەۋمەتتىك جەلىنىڭ ىشىندە جارناما بولادى، كوپتەگەن ازاماتتار وزدەرىنىڭ كۋرستارىن وتكىزەدى. سونداي ءبىر قاتىناسقا تۇسەتىن بولسا وندا سالىق تولەۋ كەرەك»، - دەدى ق ر پارلامەنتى ءماجىلىسىنىڭ دەپۋتاتى، «AMANAT» فراكسياسىنىڭ مۇشەسى ەرلان سايروۆ.
بۇل - مەملەكەتتىك رەتتەۋ. پايدالانۋشىلار ءوز پاراقشالارىندا جاريالايتىن جارنامانى تاڭبالاۋعا مىندەتتى. جالعان اقپارات تاراتقان بلوگەرلەر جازادان قۇتىلمايدى. بۇل رەتتە ولار تابىسىنا قاراي ءۇش توپقا بولىنەدى. شاعىن كاسىپكەرلىك بولسا 30 اەك مولشەرىندە ايىپپۇل سالىنادى. ورتا كاسىپكەرلىك – 50، ءىرى بيزنەسكە جاتسا – 100 اەك مولشەرىندە ايىپپۇل ارقالايدى. ءبىر جىل ىشىندە اركەتى قايتالانسا شاعىن كاسىپكەرلىكتىڭ وكىلى 50 اەك مولشەرىندە ايىپپۇل تولەيدى. قالعاندارىنىكى ەكى ەسەلەنەدى. قۇقىق بۇزۋشىلىققا توسقاۋىل بولماسا بلوگەر نەمەسە ينفليۋەنسەر 15 تاۋلىككە دەيىن قاماۋعا الىنادى. بلوگەرلەردەن بولەك، قاراپايىم قولدانۋشى قوعامدىق ءتارتىپتى، ازاماتتاردىڭ زاڭمەن قورعالاتىن مۇددەلەرىن بۇزۋعا الىپ كەلەتىن جالعان اقپارات جاريالاسا، وعان 20 اەك مولشەرىندە ايىپپۇل سالىنادى. ارەكەتى قايتالانسا ايىپپۇل ەكى ەسە ارتادى.
«بۇل زاڭ بەلگىلى ءبىر الەۋمەتتىك جەلىلەردى بۇعاتتاۋعا، كەيبىر ادامداردى قۋدالاۋ ماقساتىندا قابىلدانعان زاڭ ەمەس. كەز كەلگەن ازامات ءوزىنىڭ ارتىندا كۇشتى مەملەكەت تۇرعانىن سەزىنۋ كەرەك. كەز كەلگەن ازامات جالعان اقپارات تاراتۋ ارقىلى، سونىڭ سالدارىنان ەكىنشى ءبىر قيىنشىلىقتار تۋماۋىنا جاۋاپكەرشىلىگى بولۋ كەرەك»، - دەيدى ق ر اقپارات جانە قوعامدىق دامۋ مينيسترلىگىنىڭ دەپارتامەنت ديرەكتورى قاينار احەتوۆ.
الەۋمەتتىك جەلىنە رەتتەيتىن قۇجاتتار گەرمانيا، يسپانيا، فرانسيا سەكىلدى وركەنيەتتى ەلدەردە بۇرىننان بار. ەۋرووداقتاعى زاڭنامالاردىڭ نەگىزگى قاعيداتى - كۇندەلىكتى ومىردەگى تالاپتار ونلاين-ومىردە دە ساقتالۋى ءتيىس. بىزدە قابىلدانعان قۇجات تا وسىنى ۇستانادى.
ماحات سادىق، جۋرناليست:
كەيىنگى كەزدە بايقاپ وتىرمىز، اركىم ويىنا كەلگەنىن جاتىپ جازا بەرەدى. بۇل قوعامنىڭ العا دامۋىنا كەدەرگىسىن كەلتىرەدى. ءسوز قۇدىرەتى ارقىلى ەلدى كوركەتۋگە بولادى. اعىلشىن مەن فرانسيا قانداي مەملەكەت! مىناۋ قازىرگى ونلاين-پلاتفورما ۇلكەن وزگەرىستەردى باستايدى دەپ وتىرمىن دا. اركىم ءوز سوزىنە جاۋاپ بەرىپ، ءوز سوزىمەن جۇمىس ىستەۋ كەرەك.
ەندى «Google»، «Facebook»، « Tik-Tok» سەكىلدى ءىرى الەۋمەتتىك جەلىلەرىندە قازاق ءتىلىنىڭ قولدانۋ اياسىن كەڭەيتۋگە دە باسىمدىق بەرىلەدى. ماماندار ەلدە ءىرى ونلاين-پلاتفورمالاردىڭ وكىلدەرىكتەرىن اشۋدا پروبلەما بولمايدى دەپ وتىر. ونىڭ ۇستىنە «فەيك-اككاۋنتتارمەن» دە كۇرەس كۇيشەيتىلەدى.