مەملەكەت باسشىسى قاسىم-جومارت توقايەۆ «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى جولداۋىندا الەۋمەتتىك ساياساتتىڭ جاڭا باعىتتارىن اتادى.
«الەۋمەتتىك تۇرعىدان وسال ازاماتتارعا قولداۋ كورسەتۋ – وتە ماڭىزدى مىندەت. سوندىقتان مەملەكەت الەۋمەتتىك شىعىستاردى بىرتىندەپ ۇلعايتىپ جاتىر. ءقازىر بيۋدجەتتىڭ جارتىسىنان كوبى الەۋمەتتىك سالاعا جۇمسالادى. بالالى وتباسىلاردى قولداۋ ءۇشىن ءسابي كۇتىمىنە وتەماقى تولەۋ مەرزىمى ءبىر جىلدان ءبىر جارىم جىلعا دەيىن ۇزاردى.
زياندى ەڭبەك جاعدايىندا جۇمىس ىستەيتىن ازاماتتارعا بيىلدان باستاپ ارنايى تولەمدەر بەرىلىپ جاتىر. «ۇلتتىق قور – بالالارعا» اۋقىمدى جوباسى ىسكە قوسىلدى. 7 ميلليون بالانىڭ ەسەپشوتىنا ۇلتتىق قوردىڭ تابىسىنان جالپى سوماسى 300 ميللياردتان استام تەڭگە اۋدارىلدى. دەگەنمەن ءقازىر مەملەكەت تاراپىنان قولداۋ كورسەتىلگەن كەزدە ازاماتتاردىڭ ناقتى تابىسى ەسكەرىلمەي جاتقانىن مويىنداۋ قاجەت. باسقاشا ايتساق، الەۋمەتتىك قولداۋعا مۇلدە مۇقتاج ەمەس اۋقاتتى وتباسىلار دا مەملەكەتتەن كومەك الادى»، - دەدى قاسىم-جومارت توقايەۆ.
مەملەكەت باسشىسىنىڭ سوزىنشە، مۇنداي جايتتار از ەمەس.
«وسىنى ەسكەرە وتىرىپ، حالىقتى قولداۋ تاسىلدەرىن جەتىلدىرە ءتۇسۋ قاجەت. سوندىقتان ۇكىمەتكە الداعى جىلدىڭ باسىنان باستاپ «الەۋمەتتىك ءاميان» جوباسىن جۇزەگە اسىرۋدى تاپسىرامىن.
مەملەكەتتىك قولداۋ شىن مانىندە مۇقتاج ادامدارعا كورسەتىلۋى قاجەت. ءبىر سوزبەن، كەز كەلگەن الەۋمەتتىك كومەك ءادىل، اشىق جانە ءتيىمدى بولۋعا ءتيىس»، - دەدى پرەزيدەنت.