قازاقستاندىقتاردىڭ 57،8%-ى 6 قازان كۇنى وتەتىن رەفەرەندۋمعا قاتىسۋدى جوسپارلاپ وتىر. 59،3%-ى اەس قۇرىلىسىنا قولداۋ ءبىلدىردى. بۇل —قوعامدىق ساياسات ينستيتۋتى جۇرگىزگەن الەۋمەتتانۋلىق زەرتتەۋ ناتيجەلەرى.
قوعامدىق ساياسات ينستيتۋتى 2024 جىلدىڭ 6 قازاندا وتەتىن اتوم ەلەكتر ستانسياسىن سالۋ جونىندە رەفەرەندۋمعا قازاقستاندىقتاردىڭ كوزقاراسىن زەرتتەۋگە باعىتتالعان ەكسپرەسس-ساۋالناما جۇرگىزدى. زەرتتەۋگە قازاقستاننىڭ ءارتۇرلى ايماقتارىنان 2000-نان استام تۇرعىن قاتىستى، ولاردىڭ اراسىندا جاستار، زەينەتكەرلەر، كوپبالالى وتباسىلار جانە باسقا دا الەۋمەتتىك توپ وكىلدەرى بار.
ينستيتۋت ديرەكتورى مادينا نۇرعالييەۆانىڭ ايتۋىنشا، 2024 جىلعى 6 قازاندا وتەتىن رەسپۋبليكالىق رەفەرەندۋم تۋرالى جالپى العاندا رەسپوندەنتتەردىڭ 74،6%-ى حاباردار. ساۋالناماعا قاتىسۋشىلاردىڭ 57،8%-ى رەفەرەندۋمعا قاتىسۋدى جوسپارلاپ وتىر، ال 59،3%-ى قازاقستاندا اەس سالۋدى قولدايدى. دەگەنمەن، ەل تۇرعىندارىنىڭ اەس قۇرىلىسى تۋرالى پىكىرلەرى ءالى دە قالىپتاسۋ ۇستىندە ەكەنىن اتاپ وتكەن ءجون.
«ءبىزدىڭ زەرتتەۋىمىز حالىقتىڭ باسىم بولىگىنىڭ الداعى داۋىس بەرۋ تۋرالى حاباردار ەكەنىن جانە رەفەرەندۋمعا بەلسەندى قاتىسۋدى جوسپارلاپ وتىرعانىن كورسەتتى. ازاماتتاردىڭ جوعارى دەڭگەيدە حاباردار بولۋى جانە قاتىسۋى اتوم ەلەكتر ستانسياسىن سالۋ ماسەلەسى قازاقستاندىقتار اراسىندا ۇلكەن قىزىعۋشىلىق پەن قىزۋ تالقى تۋدىرىپ جاتقانىن بىلدىرەدى. بۇل دەرەكتەر شەشىم قابىلداۋ ماڭىزدى ءرول اتقارادى، ويتكەنى رەفەرەندۋمنىڭ مىندەتى – بارىنشا اشىقتىقتى قامتاماسىز ەتۋ جانە ەلدىڭ ءاربىر تۇرعىنىنىڭ پىكىرىن ەسكەرۋ،» – دەپ اتاپ ءوتتى.
ساۋالناما بارىسىندا «face-to-face» ءادىسى قولدانىلدى، ول قوعامدىق ساياسات ينستيتۋتىنىڭ باس ساراپشىسى مەدەت ءومىرزاقوۆتىڭ ايتۋىنشا، دەرەكتەردى جيناۋدىڭ ەڭ ءدال ادىستەرىنىڭ ءبىرى بولىپ تابىلادى.
«دەرەكتەردى جيناۋ ە-اناليتيكا جۇيەسى نەگىزىندە قاعازسىز تۇردە جۇرگىزىلدى، ساۋالناما پروسەسى اۆتوماتتى تۇردە تىركەلىپ وتىردى. بۇل ءادىس رەسپوندەنتپەن جەكە بەتپە-بەت سۇحباتتى بىلدىرەدى، ول بىزگە ونىڭ جاۋاپتارىمەن قاتار رەاكسياسىن، سۇحباتتىڭ وتكىزىلۋ ۇزاقتىعىن جانە GPS-كوورديناتتارىن تىركەۋگە مۇمكىندىك بەرەدى. بۇل دەرەكتەردىڭ ساپاسىن ارتتىرىپ، ساۋالنامانىڭ دالدىگىن باقىلاۋعا كومەكتەسەدى. ءبىز سونداي-اق سۇحبات ۋاقىتىن باقىلاۋ جانە قوسىمشا سۇراقتارىن قويۋ سياقتى ءارتۇرلى تەكسەرۋ ادىستەرىن قولدانامىز»، – دەدى ول.
قوعامدىق ساياسات ينستيتۋتىنىڭ ساراپشىلارى ءسوز سوڭىندا مۇنداي الەۋمەتتىك زەرتتەۋلەر قازاقستاندىقتاردىڭ جاعدايدى جاقسىراق ءتۇسىنىپ، نەگىزدەلگەن شەشىمدەر قابىلداۋىنا كومەكتەسەتىنىن اتاپ ءوتتى.
*ساۋالناما ق ر زاڭناماسىنىڭ نورمالارىن ساقتاي وتىرىپ جۇرگىزىلدى. ق ر وسك № وسك-08-18/1200 4.09.2024 ج. قوعامدىق پىكىردى زەرتتەۋ تۋرالى حابارلاماسى.