الەمدىك دودا 19 ناۋرىزعا دەيىن جالعاسادى
ەرتەڭ الەمنىڭ ۇزدىك سپورتشىلارى الماتىدا باس قوسادى. مەگاپوليستە فريستايلدىڭ موگۋل جانە شاڭعىمەن اكروباتيكا تۇرىنەن الەم چەمپيوناتى باستالادى، دەپ حابارلايدى Almaty-akshamy.kz Almaty.tv-گە سىلتەمە جاساپ.
حالىقارالىق دوداعا 14 مەملەكەتتەن 80-نەن استام سپورتشى قاتىسادى. ولاردىڭ قاتارىندا اۋستراليا، گەرمانيا، كانادا، جۇڭگو، اقش پەن جاپونيا وكىلدەرى بار. بيىل سپورتتىڭ موگۋل تۇرىنەن ەل نامىسىن اياۋلىم امىرەنوۆا، انتون بونداريەۆ پەن پاۆەل كولماكوۆ قورعاسا، شاڭعى اكروباتيكاسىنان جانبوتا الدابەرگەنوۆا جانە ايانا جولداس شىعادى.
«بيىلعى جىلدىڭ ەرەكشەلىگى سپورتشىلار شىمبۇلاقتاعى جاڭادان سالىنعان قارلى تراسسالار مەن كۇردەلى جوندەۋدەن وتكەن جارىس ارەناسىندا ب ا ق سىنايدى. دەمالىس ايماعىندا دوداعا دايىندىق 3 اي بۇرىن باستالعان ەدى. قار تازالاۋ تەحنيكالارى بىرنەشە اۋىسىممەن جۇمىس ىستەيدى. الەمدىك جارىسقا ءقازىر تولىق دايىنبىز»، – دەدى ق ر ۇلتتىق شاڭعى اسسوسياسياسىنىڭ باس حاتشىسى اسقار ۆالييەۆ.
بۇگىن الماتىعا شەتەلدىك سپورتشىلاردىڭ سوڭعى لەگى كەلىپ جاتىر. ەرتەڭ باستالاتىن الەمدىك دودا 19 ناۋرىزعا دەيىن جالعاسادى. ايتا كەتەيىك، جارىس 1980 جىلدان بەرى حالىقارالىق شاڭعى فەدەراسياسىنىڭ قولداۋىمەن ءتۇرلى مەملەكەتتە وتكىزىلىپ كەلەدى. چەمپيونات سوڭعى 5 جىل بويىنا الماتىداعى شىمبۇلاقتا ۇيىمداستىرىلىپ ءجۇر. ەلىمىزدەگى تاۋ شاڭعى كۋرورتى حالىقارالىق تالاپتارعا تولىق ساي كەلەدى.
«حالىقارالىق شاڭعى جارىسىنىڭ بيىل تاعى دا الماتىدا وتكىزىلەتىنىنە قۋانىشتىمىز. ءبىز از ۋاقىتتىڭ ىشىندە قازاقستاننىڭ ۇيىمداستىرۋ كوميتەتىمەن جاقسى قارىم-قاتىناس ورناتتىق. الەم كۋبوگىن وتكىزۋ ءۇشىن بىزگە وسى ەلدىڭ سپورت جانە مادەنيەت مينيسترلىگى دە ۇلكەن قولداۋ كورسەتىپ وتىر. ريزاشىلىعىمدى بىلدىرگىم كەلەدى»، – دەدى حالىقارالىق FIS فەدەراسياسىنىڭ ديرەكتورى اندرەا رينالدي.