ول ۆەلوسيپەدپەن الەمنىڭ 40 ەلىندە بولىپ، 400 مىڭ شاقىرىم جول جۇرگەن.
ەڭ ۇزاق ۆەلوساياحات جاساعانى ءۇشىن قازاقستاننىڭ رەكوردتار كىتابىنا دا ەنگەن، دەپ حابارلايدى aqshamnews.kz.
وعان قوسا كىر تاسىن كوتەرەدى. تۇگەلبەك قاريا بيىل 80-گە كەلدى. ءالى تىڭ. قيمىل-قوزعالىسى شيراق. ءوزى: «وسىنىڭ ءبارى – سپورتتىڭ ارقاسى»، – دەيدى.
ۆەلوسيپەدكە 45 جاسىندا وتىرعان. ماماندىعى – ءمۇعالىم. زەينەتكە شىققانعا دەيىن شىعىس قازاقستان وبلىسىنىڭ تارباعاتاي وڭىرىندە مەكتەپتە ماتەماتيكادان ساباق بەردى. باس كەزىندە بالالارعا ۇلگى بولعىسى كەلگەن. كەيىننەن سپورتقا تۇبەگەيلى دەن قويعان.
تۇگەلبەك قاسىموۆ، ارداگەر ۆەلومارافونشى: - ەڭ العاشقى 45 جاستا كاباردين بالكار دەگەن ەلدە كسرو بويىنشا جارىس بولادى دەپ ۆەلومارافونعا شاقىردى. سول كەزدە ءىىى ورىن، قولا مەدال الامىن. 60 شاقىرىم قاشىقتىقتا. سونىڭ ءوزى سپورت شەبەرى دەگەن دارەجەگە ساي بولعان. سپورت شەبەرلەرىمەن جارىسقاننان كەيىن، ءىىى ورىن العاننان كەيىن الدىڭعى قاتارعا شىعۋىم كەرەك. قازاقستاننىڭ ءبىرىنشى ۆەلومارافونشىسى بولۋىم كەرەك دەگەن ماقسات قويامىن.
سول كەزدە اۋىلدا وتىرىپ، قايدا باراتىنىن انىقتاپ، كارتاسىن سىزىپ الادى. العاشقى جارىستان جۇلدەلى قايتقان سوڭ دەمەۋشىلەر دە تابىلا باستاعان. سودان كەيىن 25 رەت ساياحاتقا شىققان. ءبىر شىققاندا بىرنەشە مەملەكەتتى ءبىر-اق ارالاپ قايتقان كەزدەرى بولعان.
40 مەملەكەتتە بولدىم. ەۋروپا، ازيا دەيدى عوي. ودان كەيىن موڭعوليا، جاپونيا، ودان كەيىن لاتىن امەركاسىنان ارى كۋبا، سولارعا دەيىن باردىم. 2017 جىلى استانادان ماسكەۋگە دەيىن باردىم. ەڭ ۇزاق جول وسى بولدى. ورال تاۋلارىنان ءوتۋ كەرەك. 4 مىڭ شاقىرىم اراقاشىقتىق. كۇنىنە 200-235 شاقىرىم الىپ وتىردىم، دەيدى ول.
راسىندا، ۆەلوسيپەدپەن جۇرگەن سوڭ قاي جەرگە بارماسىن ساياحات وڭايعا تۇسپەگەن. ءتىپتى بۇزاقىلاردىڭ شابۋىلىنا تويتارىس بەرگەن كەزدەرى دە بولىپتى. ونىڭ ءاربىر ساپارىنىڭ تاريحى بار.
تۇگەلبەك قاسىموۆ، ارداگەر ۆەلومارافونشى: - 2004 جىلى ءۇندىستانعا باردىم. 2004-تە قاسىم-جومارت توقايەۆ سىرتقى ىستەر ءمينيسترى بولاتىن. سول كىسى «سوپروۆوجدات» ەتكىزدى. ءومىرى ويلاماعام.
تۇگەلبەك قاسىموۆ ۆەلوسيپەدتەن بولەك، موينىمەن گىر تاسىن كوتەرەدى. ءقازىردىڭ وزىندە 100-گە دەيىن جەتكىزەدى. وعان قوسا تىزەسىن جەرگە تيگىزبەي روليكپەن جاتتىعادى. جۇگىرەتىنى جانە بار. تالاي مارافوندا توپ جاردى. ءالى كۇنگە دەيىن سپورت دەسە ىشكەن اسىن جەرگە قويادى. «قازىرگى جاستاردىڭ قوزعالىسى از. ول اۋرۋعا اكەلەدى»، – دەپ كەيىپ وتىر.
- جۇگىرۋدىڭ ورنىنا ەلەكتروموبيلگە ءتۇسىپ الاتىن بولدى. راقات، ەشكىمنىڭ اياعى جۇرمەيدى. سوندا ادامعا اياق كەرەك جوق سەكىلدى عوي. ادامنىڭ دەنساۋلىعى ادامنىڭ اياعىنا بايلانىستى. مەن سونى ۇقتىم. اياق جۇرەكتى كۇشەيتەدى. ويتكەنى ءسىز جۇرەكتى قولعا الىپ كۇشەيتە المايسىز، دەيدى قارت سپولرتشى.
تۇگەلبەك قارت 15 جىلدان بەرى الماتىدا تۇرىپ جاتىر. ازىرگە ۆەلوسيپەدىمەن قوشتاسقىسى جوق. قىسى-جازى تەبەدى. جۇرگەن جەرىندە بەيبىتشىلىكتى، سپورتتى ناسيحاتتايدى.