ءبىرقاتار مەملەكەتتە ونىڭ 30-دان اسا كورمەسى وتكەن
بەرليندەگى قازاق سۋرەتشىسى بولات مەكەبايەۆ ەلورداعا كەلدى. ول تاۋەلسىزدىكتىڭ 30 جىلدىعى قارساڭىندا تۋعان جەرىندە جەكە كورمەسىن وتكىزىپ جاتىر، دەپ حابارلايدى Almaty-akshamy.kz «حابار 24» تەلەارناسىنا سىلتەمە جاساپ.
باس قالا تۇرعىندارى مەن قوناقتارى ەرەكشە ستيلدەگى تۋىندىلاردى تاماشالاي الادى. قىلقالام شەبەرىنىڭ ەندىگى جوسپارى قانداي؟
اسپانديار – بولاشاعىنان ۇلكەن ءۇمىت كۇتتىرەر ورەن. جاس سۋرەتشىنىڭ اتا-اناسى 25 جىل بۇرىن گەرمانياعا كوشىپ كەتكەن بولات مەكەبايەۆتىڭ ەلورداعا كەلگەنىن ەستىپ، باتاسىن الۋعا نيەتتەنىپتى.
«مەن گەرمانيادا 25 جىل تۇردىم. جانىڭا نە كەرەك، ءبارى بار. تاماعىڭدى بەرىپ جاتىر. اقشاڭدى تولەپ جاتىر. ءبىراق قازاقتار ءۇشىن كىشكەنە قيىنداۋ. ءسالت-داستۇر باسقاشا. ول جاقتىڭ ادامدارى كىشكەنە قاتتىلاۋ، سالقىنداۋ. ءبىز، قازاقتار، بىر-بىرىمىزگە جانىمىزدى بەرۋگە دايىن تۇرامىز عوي»،-دەيدى بولات مەكەبايەۆ.
بەرليندەگى قازاق سۋرەتشىسىن بۇكىل الەم تانيدى. ءبىرقاتار مەملەكەتتە ونىڭ 30-دان اسا كورمەسى وتكەن. ونەر يەسى جايلى «قازاقستان الەمى» اتتى كىتاپ شىعارىلدى. ءبىراق ول وزىنەن گورى ۇلتىنىڭ اسقاقتاعانىن ءجون كورەدى. سول سەبەپتى گەرمانيا استاناسىندا ابايدىڭ ەسكەرتكىشىن اشۋعا بارىن سالدى.
«بۇرىننان ويدا جۇرگەن يدەيامىز وسى جىلى جۇزەگە استى. قايرات دەگەن جاقسى جىگىت دەمەۋشى بولدى. ابايىمىز ەل استاناسى بەرليندە تۇر»،-دەيدى سۋرەتشى.
بولات مەكەبايەۆ قىلقالامدى عانا ەمەس، قۇر قالامدى دا سەرىك ەتەدى. ونىڭ قازاقستانداعى نەمىستەر جايلى رومانى كوپشىلىك كوڭىلىنەن شىقتى. ەلگە ورالۋدى جوسپارلاپ جۇرگەن ول وسى تاقىرىپتا فيلم ءتۇسىرۋدى ارماندايدى.
«قازاقستاندا نەمىستەر كوپ تۇرادى. قازاقشا ءاندى دە كەرەمەت ايتادى. باكە، بىزگە ءبىر كوركەمفيلم كەرەك دەيدى. ول ۇسىنىستارىن ءالى ۇمىتقام جوق. قازاق پەن نەمىسكە ورتاق ءبىر تۋىندى دۇنيەگە اكەلۋدى ويلاپ ءجۇرمىن،-دەيدى ب.مەكەبايەۆ.
بولات مەكەبايەۆ بۇل ساپارىندا ەلگە 20-دان استام سۋرەتىن الا كەلگەن. جەكە كورمە ەلوردا مەن كوكشەتاۋ جۇرتشىلىعىنا ۇسىنىلادى. ادامزاتتى تولعاندىرعان ماسەلەلەر بەينەلەنگەن تۋىندىلار كورەرمەندى ءتانتى ەتەرى ءسوزسىز.