«تازا قازاقستان» رەسپۋبليكالىق اكسياسى اياسىندا الماتى قالاسى تۇركسىب اۋدانىنىڭ كوميۋنيتي ورتالىعىندا جاستار جانە ەكولوگيا سالاسىندا بەلسەندى ازاماتتاردىڭ قاتىسۋىمەن «الەمدى بىرگە ساقتايىق» اتتى دوڭگەلەك ۇستەل ءوتتى، دەپ حابارلايدى almaty-akshamy.kz.
شارانىڭ نەگىزگى ماقساتى – ەكولوگياعا تيگىزەتىن زياندى ازايتۋ، قورشاعان ورتانى قورعاۋ جولدارىندا بەلسەندىلىك تانىتۋ جانە جاۋاپكەرشىلىكتى ارتتىرۋ. دوڭگەلەك ۇستەل بارىسىندا قاتىسۋشىلار ەكولوگيانى ساقتاۋ باعىتىندا قانداي ناقتى قادامدار جاسالۋى كەرەكتىگى تۋرالى پىكىر الماستى.
تالقىلاۋ بارىسىندا ەكولوگيالىق قۇزىرەتتىلىكتى دامىتۋ، تابيعاتتى قورعاۋ جانە قازىرگى تاڭداعى ەكولوگيالىق ماسەلەلەردى شەشۋ جولدارى قاراستىرىلدى. اسىرەسە، ءوندىرىس ورىندارىنان شىعاتىن قوقىستاردى ءتيىمدى باسقارۋ جانە زياندى قالدىقتاردى ازايتۋ ماسەلەلەرى كوتەرىلدى. جاستاردىڭ ەكولوگياعا دەگەن قىزىعۋشىلىعى مەن ولاردى شەشۋگە دەگەن ۇمتىلىسى ەرەكشە نازار اۋدارتتى.
«جاستار ەل بولاشاعى ەكەنىن ەسكەرسەك، ولاردىڭ قورشاعان ورتانى قورعاۋ ماسەلەسىنە شىنايى قىزىعۋشىلىق تانىتۋى قۋانتادى. ولار بۇل ماسەلەدە تەك سوزبەن عانا ەمەس، ناقتى ىس-ارەكەتتەرىمەن دە ۇلەس قوسىپ ءجۇر. ءبىزدىڭ شارانىڭ ماقساتى – وسى بەلسەندىلىكتى ارتتىرۋ جانە ولاردى بىرلەسە جۇمىس ىستەۋگە ىنتالاندىرۋ»، – دەدى شارانى ۇيىمداستىرۋشى ابدۋالي راسۋل جەڭىس ۇلى.
شارا سوڭىندا قاتىسۋشىلار تابيعاتتى قورعاۋ باعىتىنداعى جۇمىستارىن جالعاستىرۋعا جانە جۇمىلا جۇمىس ىستەۋگە ۋاعدالاستى.