الەمدى ارالاپ شىققان «شوقان ءۋاليحانوۆ» ياحتاسى ەلگە ورالدى

تاۋەلسىزدىكتىڭ 30 جىلدىعىنا ارنالعان ەكسپەديسيا ەلىمىزدى تانىتىپ ءجۇر

«شوقان ءۋاليحانوۆ» ياحتاسىنىڭ ەكيپاجى جەر شارىن ارالاپ، اقتاۋعا قايتا ورالدى. بۇل ساياحات 2007 جىلدىڭ كۇزىندە باستالعان بولاتىن، دەپ حابارلايدى Almaty-akshamy.kz.

سول ماۋسىمدا كەمە اتلانتيكانى كەسىپ وتەدى. ءبىراق قارجىلىق قيىندىقتارعا بايلانىستى جوبا ۋاقىتشا توقتاپ قالعان ەدى. ءتورت جىلدان كەيىن سوڭ ساياحات قايتا باستالادى. ەلىمىزدىڭ تۇڭعىش پرەزيدەنتى - ەلباسى نۇرسۇلتان نازاربايەۆ ياحتا كومانداسىنا تاپسىرعان مەملەكەتتىك تۋ ءۇش مۇحيتتى كەسىپ ءوتىپ، ەۆروپا، وڭتۇستىك امەريكا مەملەكەتتەرىندە، تىنىق مۇحيتتاعى ارالداردا بولىپ ەندى ەلگە ورالدى. جەر شارىن اينالىپ شىققان ەلىمىزدىڭ كوك تۋى مۇراجايعا تاپسىرىلادى. ساياحاتتى ورتالىق ازيالىق گەوگرافيا قوعامى ۇيىمداستىرعان.

قوعام باسشىسى قانات وسكەنوۆتىڭ ايتۋىنشا، تاۋەلسىزدىكتىڭ 30 جىلدىعىنا ورايلاستىرىلعان ەكسپەديسيا ەلىمىزدىڭ تانىلۋىنا سەپتىگىن تيگىزگەن. ويتكەنى ەكسپەديسيا مۇشەلەرى ايالداعان ءار ايلاقتا قازاقستاننىڭ تۋىن كوتەرىپ، ءانۇرانىمىزدى شىرقاعان.

«ەكسپەديسيانىڭ ماقساتى - بۇكىل ەلگە قازاقستاندى تانىتۋ ءۇشىن. ماقسات جاقسىلاپ ورىندالدى دەپ ويلاپ وتىرمىز. بىزدە تاعى دا ءبىر جوبا بولىپ جاتىر. نەگە دەسەڭىز، ەندى ۇلكەندەۋ بىردەڭە جاساپ، گيننەستىڭ رەكوردتار كىتابىنا كىرگىمىز كەلىپ وتىر»، - دەيدى «جاڭارۋ» رقب الماتى قالالىق فيليالىنىڭ ديرەكتورى قانات وسكەنوۆ.