الەمدەگى ەڭ بەدەلدى ماتەماتيكالىق وليمپيادادا قازاقستاندىق وقۋشىلاردىڭ ءبارى جۇلدەگەر اتاندى

ماتەماتيكادان IMO-2022 حالىقارالىق وليمپياداسىندا قازاقستان وقۋشىلارىنىڭ ءبارى جۇلدەگەر اتاندى.

بۇل جايىندا وقۋ-اعارتۋ ءمينيسترى اسحات ايماعامبەتوۆ Facebook پاراقشاسىندا جازدى، دەپ حابارلايدى Almaty-akshamy.kz قازاقپاراتقا سىلتەمە جاساپ.

«وقۋشىلارىمىز ماتەماتيكادان IMO-2022 حالىقارالىق وليمپياداسىندا ۇزدىك ناتيجە كورسەتتى. ۇلتتىق قۇرامامىز 174 ۇپاي جينادى. بۇل - ەلىمىزدىڭ وسى وليمپياداعا قاتىسۋ تاريحىنداعى رەكوردتىق كورسەتكىشى. IMO - الەمدەگى ەڭ بەدەلدى پاندىك وليمپيادالاردىڭ ءبىرى. پرەزيدەنتتىڭ تاپسىرماسى بويىنشا ءدال وسىنداي وليمپيادالاردا جۇلدە العان وقۋشىلار مەن ولاردىڭ پەداگوگ-تالىمگەرلەرىنە تولەمدەر بەلگىلەپ، وقۋشىلارعا ۇبت-نى تاپسىرماي-اق ەلىمىزدىڭ جوو-لارىنا تۇسۋگە بولاتىنداي جاعداي جاساعانىمىزدى اتاپ وتكىم كەلەدى»، - دەدى مينيستر.

ونىڭ اتاپ وتۋىنشە، وليمپياداعا قاتىسقان 6 وقۋشىنىڭ بارلىعى دا جۇلدەلى ورىندارعا يە بولدى. ولار 3 كۇمىس، 3 قولا مەدال جەڭىپ الدى. كۇمىس مەدال يەگەرلەرى: تاير ساتۋبالدين، فەتۋللاح سام، ميرون يۋركيەۆيچ؛ قولا مەدال العاندار: ادىلەت زاۋىتحان، ادىلەت ءابۋ، يۋريي تەن.

«زياتكەرلىك سايىسقا 104 ەلدەن بارلىعى 589 وقۋشى قاتىستى. ونىڭ ىشىندە جۇڭگو، اقش، وڭتۇستىك كورەيا، جاپونيا، ۇلىبريتانيا، يتاليا، كانادا جانە تاعى باسقا ەلدەر بار. سونىمەن قاتار وقۋشىلارىمىز الەمدىك ەسەپتە 17-ورىنعا تۇراقتادى. جۇلدەگەرلەردى جەڭىسىمەن قۇتتىقتايمىن!» - دەپ اتاپ وتەدى اسحات ايماعامبەتوۆ.