ۆاكسينالارعا سۇرانىس جوعارى
سارسەنبى كۇنى دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى تەدروس ادحان گەبرەيۋس الەمدەگى مايمىل شەشەگى اۋرۋىنا قاتىستى باسپا ءسوز ءماسليحاتىن وتكىزدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
دسۇ باسشىسى قازىرگى ۋاقىتتا ۇيىمعا 92 ەل مەن اۋماقتان مايمىل شەشەگىن جۇقتىرۋدىڭ 35 مىڭنان استام جاعدايى تۋرالى حابارلاما تۇسكەنىن، بۇل رەتتە 12 ادام كوز جۇمعانىن اتاپ ءوتتى.
وتكەن اپتادا 7 مىڭ 500-گە جۋىق جاعداي تىركەلدى، بۇل الدىڭعى اپتاعا قاراعاندا 20%-عا كوپ.
«ۆاكسينالار ورشىگەن اۋرۋمەن كۇرەستە ماڭىزدى ءرول اتقارا الادى جانە كوپتەگەن ەلدەردە زارداپ شەككەن قاۋىمداستىقتار اراسىندا ۆاكسينالارعا سۇرانىس جوعارى»، - دەدى ددۇ باسشىسى.
الايدا، قازىرگى ۋاقىتتا ۆاكسينالاردىڭ قورى مەن ولاردىڭ تيىمدىلىگى تۋرالى مالىمەتتەر شەكتەۋلى. ددۇ ۆاكسينا وندىرۋشىلەرمەن، سونداي-اق ەكپەلەرىن بولىسۋگە دايىن ەلدەرمەن جانە ۇيىمدارمەن تىعىز بايلانىستا.
وتكەن اپتادا حابارلاعانىمىزداي، ددۇ شاقىرعان ساراپشىلار كەڭەسى مايمىل شەشەگى ۆيرۋسىنىڭ ەكى توبىنىڭ اتىن ريم سيفرلارىمەن وزگەرتۋ تۋرالى شەشىم قابىلدادى.
بۇرىن كونگو وزەنى باسسەينىنىڭ اۋرۋى دەپ اتالاتىن ىندەتتىڭ نۇسقاسى ەندى «ءبىرىنشى توپ نەمەسە I» دەپ اتالادى. باتىس افريكانىڭ ارتۇرلىلىگى «ەكىنشى توپ نەمەسە II» دەپ اتالادى.
«اۋرۋ مەن ۆيرۋستىڭ اتىن وزگەرتۋ جۇمىستارى جالعاسۋدا»، - دەپ اتاپ ءوتتى ددۇ باسشىسى.