الەمدە كلوندالعان العاشقى قاسقىر پايدا بولدى

جاڭا تۋعان قاسقىردىڭ گەنى گەنەتيكالىق ۇلگىلەرى الىنعان قاسقىرمەن بىردەي.

ءولىپ قالعان اركتيكالىق قاسقىردىڭ گەنەتيكالىق ۇلگىلەرىنەن جاسالعان ەمبريون ءيتتىڭ قۇرساعىنا سالىنعان، دەپ حابارلايدى Almaty-akshamy.kz Egemen.kz سىلتەمە جاساپ.

ماييا - الەمدەگى العاشقى كلوندالعان اركتيكالىق قاسقىر. ول جويىلىپ كەتۋ ءقاۋپى تونگەن قاسقىردىڭ وزگە تۇرلەرى ءۇشىن ءۇمىت ساۋلەسىن سىيلاعان.

كلوندالعان قاسقىردى دۇنيەگە اكەلگەن عالىمداردىڭ ايتۋىنشا، ول 9 اي بۇرىن قىتايدىڭ سولتۇستىگىندەگى حايۋاناتتار باعىندا ولگەن باسقا اركتيكالىق قاسقىردىڭ گەنەتيكالىق ۇلگىلەرى ارقىلى الىنعان. كەيىن ەمبريون بيگل تۇقىمداس ءيتتىڭ قۇرساعىنا سالىنعان. 

«جاڭا تۋعان قاسقىردىڭ گەنى گەنەتيكالىق ۇلگىلەرى الىنعان قاسقىرمەن بىردەي. ءبىراق كلوندالعان جانۋار باسقا قاسقىرلارمەن ەمەس، ءيتتىڭ جانىندا جۇرگەن»، - دەيدى جوبانى جاساۋشى Sinogene Biotechnology كومپانياسىنىڭ مەنەدجەرى سزياو سزينپين. 

Sinogene Biotechnology كومپانياسى اتالعان وقيعانىڭ ناتيجەسى جويىلىپ كەتۋ ءقاۋپى تونگەن تۇرلەردى ساقتاۋعا ۇلەس قوسا الاتىن گەنەتيكالىق تەحنولوگياداعى ۇلكەن جەتىستىك دەپ وتىر. دەگەنمەن، جانۋارلاردى كلونداۋ قايشىلىعى كوپ ارەكەت ەكەنى راس. ماسەلەن، عىلىمي قوعامداستىقتىڭ كەيبىر توپتارى كلونداۋ ەتيكاعا جانە بيوارتۇرلىلىككە وراسان نۇقسان كەلتىرەدى دەگەن پىكىردە. ءبىراق بۇل كۇماندى قۋاتتايتىن دا، جوققا شىعاراتىن دا ماردىمدى ارگۋمەنتتەر ءالى دە بولسا دالەلدەۋدى قاجەت ەتەتىن سىڭايلى.