اللەرگيا مەن دەمىكپە –دۇنيە جۇزىندە ەڭ كەڭ تارالعان اۋرۋلار.
برونح دەمىكپەسى تىنىس الۋ جولدارىنىڭ اۋرۋلارىنا اكەلەدى. الايدا دەمىكپەنىڭ سەبەبى اللەرگيا دا بولۋى مۇمكىن. بۇل تۋرالى اللەرگولوگ، يممۋنولوگ اراي باتىربايەۆا ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
30 مامىردا دۇنيە جۇزىندە اللەرگيا جانە دەمىكپەمەن كۇرەسۋ كۇنى اتالىپ وتەدى. نەگىزگى ماقساتى – دارىگەرلەردىڭ، ناۋقاستاردىڭ جانە حالىقتىڭ وسى اۋرۋلار تۋرالى اقپاراتتاندىرىلۋىن ارتتىرۋ، اللەرگيا مەن دەمىكپەگە بايلانىستى ماسەلەلەردى شەشۋگە قوعامنىڭ نازارىن اۋدارۋ جانە پاسيەنتتەرگە كورسەتىلەتىن مەديسينالىق كومەكتىڭ ساپاسىن ارتتىرۋ.
كارديولوگيا جانە ىشكى اۋرۋلار عزي رەسپۋبليكالىق اللەرگولوگيالىق ورتالىعى باسشىسىنىڭ مىندەتىن اتقارۋشى اللەرگولوگ، يممۋنولوگ اراي باتىربايەۆانىڭ ايتۋىنشا، دۇنيە جۇزىندە ەرەسەك تۇرعىنداردىڭ 5%-دان استامى جانە بالالاردىڭ 10%-ى دەمىكپە اۋرۋىنا شالدىققان. برونح دەمىكپەسى – ءتۇرلى ىشكى جانە سىرتقى قورشاعان ورتا فاكتورلارىنان برونحىلاردىڭ تارىلۋىنا ىقپال ەتەتىن تىنىس الۋ جولدارىنىڭ اۋىر سوزىلمالى قابىنۋ اۋرۋى.
"ۋاقىتىلى الدىن السا جانە دۇرىس جوسپارلانعان جاعدايدا، دەمىكپەنى بولدىرماۋعا بولادى. دەمىكپەنىڭ الدىن الۋدىڭ نەگىزگى باعىتى – اللەرگيا مەن تىنىس الۋ جولدارىنىڭ سوزىلمالى اۋرۋلارىن بولدىرماۋ. تەمەكى ءتۇتىنى نەمەسە تىتىركەندىرگىش حيميالىق زاتتارمەن بايلانىستا بولاتىن بالالار اللەرگياعا ءجيى شالدىعادى جانە برونح دەمىكپەسىمەن اۋىرادى. ەڭ كەڭ تارالعان اللەرگەندەر: ۇيدەگى شاڭ، تاراقاندار، كىشكەنتاي كەنەلەر، ءۇي جانۋارلارىنىڭ ءجۇنى، زەڭ، تاماقتىڭ كەي تۇرلەرى، وسىمدىك توزاڭى"، – دەيدى دارىگەر.
اراي باتىربايەۆانىڭ ايتۋىنشا، برونح دەمىكپەسىنىڭ الدىن الۋ بويىنشا دۇرىس جوسپارلانعان جانە جۇزەگە اسىرىلىپ جاتقان شارالار – اۋرۋدىڭ الدىن الۋ جانە ەمدەۋدىڭ ءتيىمدى ءتاسىلى.
«زاماناۋي مەديسينا تاجىريبەسى دەمىكپەنىڭ الدىن الۋ ءىس-شاراسىن دۇرىس ورىنداۋ كوبىنە اۋرۋدى ەمدەۋگە نەمەسە پاسيەنتتىڭ دەمىكپەگە قارسى دارى-دارمەكتەردى پايدالانۋىن ازايتۋعا جەتكىلىكتى ەكەنىن كورسەتتى. دياگنوستيكالاۋ مەن ەمدەۋدىڭ زاماناۋي ادىستەرىنىڭ ارقاسىندا اۋرۋدى باقىلاۋعا بولادى»، - دەدى ول.
سپيكەردىڭ سوزىنشە، دۇرىس ەمدەۋ جۇرگىزىلسە، دەمىكپەمەن اۋىراتىنداردىڭ كوبى ونى باقىلاپ وتىرۋعا، سيمپتومدارىنان ارىلۋعا، ۇستامالاردىڭ سيرەك بولۋىنا نەمەسە ءتىپتى مۇلدەم بولماۋىنا، ارنايى دارى-دارمەكتەردى سيرەك پايدالانۋعا قول جەتكىزە الادى.