الەمدە ءالى دە 733 ميلليون ادام اشتىقتان زارداپ شەگۋدە، ولاردىڭ كوپشىلىگى افريكا ايماعىندا تۇرادى، دەپ حابارلايدى aqshamnews.kz.
بۇل تۋرالى بەرليندە وتكەن Welthungerhilfe قايىرىمدىلىق ۇيىمىنىڭ «اشتىق يندەكسى» بايانداماسىندا ايتىلدى، دەپ جازادى DW.
دۇنيە ءجۇزىنىڭ 36 ەلىندە دۇرىس تاماقتانباۋ جاعدايى «اۋىر» دەپ باعالانسا، التى ەلدە «وتە اۋىر» دەپ باعالاندى. ازىق-تۇلىك ونىمدەرىن ءوندىرۋ مەن جەتكىزۋگە قارۋلى قاقتىعىستار، اسىرەسە سۋدانداعى ازاماتتىق سوعىس جانە جاھاندىق كليماتتىق وزگەرىستەردىڭ تەرىس اسەرلەرى كەدەرگى بولۋدا.
ەسەپكە سايكەس، ەرلەرگە قاراعاندا ايەلدەر اشتىقتان كوبىرەك زارداپ شەگەدى.
Welthungerhilfe پرەزيدەنتى مارلەن تيمە (Marlehn Thieme) الەمدىك قاۋىمداستىقتى اشتىق ماسەلەسىن شەشۋگە جەتكىلىكتى كوڭىل بولمەيدى دەپ ايىپتادى. قايىرىمدىلىق ۇيىمىنىڭ مالىمەتىنشە، 2022 جىلى الەمدە 800 ميلليوننان استام ادام اشتىقتان زارداپ شەككەن.
2023 جىلى تيمە دامۋ مەن گۋمانيتارلىق كومەك ءۇشىن گەرمانيانىڭ فەدەرالدى بيۋدجەتىنىڭ قىسقارتىلۋىن سىنعا الدى.
Welthungerhilfe باسشىسى اتاپ وتكەندەي، گەرمانيانىڭ ەكونوميكالىق ىنتىماقتاستىق جانە دامۋ مينيسترلىگى ازىرلەگەن Agenda 2030 باعدارلاماسى جانە بۇۇ جاريالاعان تۇراقتى دامۋدىڭ 17 ماقساتى ۇزاق مەرزىمدى پەرسپەكتيۆادا اشتىقتى جەڭۋدىڭ جاقسى ستراتەگياسى، ءبىراق ونى جۇزەگە اسىرۋ ءۇشىن «ساياسي ەرىك پەن ىنتىماقتاستىق» قاجەت.
2022 جىلى نەمىس قايىرىمدىلىق قورى دۇنيە جۇزىندە 603 جوبا اياسىندا الەمنىڭ 37 ەلىندەگى 18،8 ميلليون ادامعا كومەك كورسەتكەنى اتاپ ءوتىلدى. ەسەپكە سايكەس، Welthungerhilfe يەلىگىندە 341،2 ميلليون ەۋرو بولعان، ونىڭ 97،6 ميلليون ەۋروسى قايىرىمدىلىق ءۇشىن بولىنگەن. سونىمەن قاتار، گەرمانيا ۇكىمەتى مەن ەۋروپالىق وداق تاراپىنان گرانتتار بولىنگەن.