مەملەكەت باسشىسى قاسىم-جومارت توقايەۆتىڭ تاپسىرمالارىن ورىنداۋ اياسىندا قازاقستان رەسپۋبليكاسى عىلىم جانە جوعارى ءبىلىم مينيسترلىگى Smart-ۋنيۆەرسيتەتتەر مودەلىنە كوشۋ جۇمىستارىن جۇرگىزۋدە. ەندى قازاقستاندىق ستۋدەنتتەر ءۇشىن الەمنىڭ جەتەكشى ۋنيۆەرسيتەتتەرىنىڭ وزەكتى كۋرستارى قولجەتىمدى.
الماتىداعى حالىقارالىق اقپاراتتىق تەحنولوگيالار ۋنيۆەرسيتەتىندە جوعارى وقۋ ورىندارىنا ارنالعان Coursera for Campus ءبىلىم بەرۋ پلاتفورماسىن ەنگىزۋ ادىستەمەسىن تانىستىرۋ ماقساتىندا Coursera day سەمينارى ۇيىمداستىرىلدى. ق ر عىلىم جانە ءبىلىم ءمينيسترى ساياسات نۇربەكتىڭ قازاقستاندىق جوعارى وقۋ ورىندارىنا جاپپاي اشىق ونلاين كۋرستارىن (جاوك) ەنگىزۋ جانە جەتەكشى كۋرستاردى ورتالىقتاندىرۋ جونىندەگى باستاماسىن قولداۋ ماقساتىندا حاتۋ ءبىلىم ورداسى Coursera وكىلدەرىمەن بىرگە ماڭىزدى قادام جاساپ وتىر. القالى جيىندا حالىقارالىق اقپاراتتىق تەحنولوگيالار ۋنيۆەرسيتەتىنىڭ مىسالىندا Coursera for Campus پلاتفورماسىن ەنگىزۋ ادىستەمەسى تاقىرىبى تانىستىرىلدى.
جالپى، بۇل باستاما قازاقستاندىق جوعارى وقۋ ورىندارىنا الەمدىك ءبىلىم بەرۋ جۇيەسىمەن تىعىز بايلانىستا بولۋعا كومەكتەسەدى. جاوك – زاماناۋي قاشىقتىقتان ءبىلىم بەرۋدىڭ قارقىندى دامىپ كەلە جاتقان وقىتۋ كۋرستارىنىڭ ءتۇرى.
«Coursera day» كونفەرەنسياسىنىڭ اشىلۋىندا ق ر عىلىم جانە جوعارى ءبىلىم ۆيسە-مينيسترى ك.ا.ەرعالي، حاتۋ اق باسقارماسىنىڭ ءتوراعاسى – رەكتورى اسقار حيكمەتوۆ ءسوز سويلەدى. ءبىلىم ورداسىنىڭ حالىقارالىق عىلىمي جۇمىستار جونىندەگى پرورەكتورى ەۆگەنيا داينەكو وقۋ ورنىنىڭ وسى سالاداعى تاجىريبەلەرىن ايتتى.
جيىندى حالىقارالىق بايلانىس دەپارتامەنتى ديرەكتورى ن.ج.نالگوجينا جۇرگىزدى. «Coursera Day» كونفەرەنسياسىندا پلاتفورمانى ورتالىق ازياداعى كاسىپكەرلىكتى دامىتۋ جونىندەگى ديرەكتور ەدۋارد كان تانىستىردى. «Coursera» پلاتفورماسىنىڭ قوعاممەن بايلانىس مەنەدجەرى سيددحارتا ناگار زۋم جۇيەسى ارقىلى قاتىستى. پلاتفورما ينتەرفەيسى بارلىق تىلدە ال، پلاتفورما كۋرسىنىڭ 90%-ى اعىلشىن تىلىندە جۇرگىزىلدى. ۋنيۆەرسيتەت ساراپشىلارى دا سپيكەرلەر رەتىندە ءسوز الىپ، قازاقستاندىق جوعارى ءبىلىم وردالارىنىڭ وقۋ پروسەسىنە ۇزدىك شەتەلدىك ۋنيۆەرسيتەتتەردىڭ ونلاين-كۋرستارىن ەنگىزۋ تاجىريبەسىمەن ءبولىستى.
نەگىزگى ماقسات-مىندەتتەر – Coursera for Campus پلاتفورماسىن پايدالانۋ ناتيجەلەرىمەن تانىستىرۋ، ءبىلىم الۋشىلار اراسىندا سەرتيفيكاتتالعان كۋرستاردان ءوتۋ ۋاجدەمەسىن ارتتىرۋ، ارالاس وقىتۋ كۋرستارىن پايدالانۋ، جوعارى وقۋ ورىندارىنىڭ ادىسكەرلەرىنە كۋرستاردى تاڭداۋ بويىنشا كەڭەس بەرۋ.
سەميناردىڭ وزەكتىلىگى سول، بولاشاقتا بارلىق جوعارى وقۋ ورىندارىنىڭ ستۋدەنتتەرىنە يگەرىلگەن ونلاين-كۋرستار مەن پاندەردىڭ كرەديتتەرىن ەسەپتەۋگە مۇمكىندىك بەرۋ جوسپارلانىپ وتىر. ياعني ستۋدەنت بەلگىلى شەتەلدىك پروفەسسوردىڭ ونلاين-كۋرسىن ءوز بەتىنشە تىڭداپ، اياقتاي الادى جانە وسى ارقىلى ديپلوم الۋ كەزىندە مىندەتتى تۇردە ەسكەرىلەتىن كرەديتتەر الا الادى.
سەمينارعا كەلگەندەر ماڭىزدى وقۋ-ادىستەمەلىك ماسەلەلەردى شەشۋ يدەيالارى اياسىندا ءوزارا تاجىريبە الماستى جانە Coursera وكىلدەرىمەن تىكەلەي ديالوگ الاڭىنا قاتىستى. ساراپشىلار وقۋ پروسەسىنە ەنگىزۋ ادىستەمەسىمەن، Coursera for Campus پلاتفورماسىن پايدالانۋ ناتيجەلەرىمەن ءبولىستى. ۋنيۆەرسيتەتتىڭ تانىستىرىلىم الاڭىندا تالىمگەرلەر، تاجىريبەلى وقىتۋشىلار، ونلاين-كۋرستاردى ازىرلەۋشىلەر ءوز كەڭەستەرىن ايتتى.
جانات سەيتجانوۆا،
حاتۋ-دىڭ قازاقستان تاريحى جانە
مەدياكوممۋنيكاسيا كافەدراسىنىڭ
اسسيستەنت-پروفەسسورى