«الاتاۋ» ءداستۇرلى ونەر تەاترى الەمدىك دەڭگەيدەگى ەڭ ءىرى مادەني وقيعالاردىڭ ءبىرى ا.پ.چەحوۆ اتىنداعى XVII حالىقارالىق تەاتر فەستيۆالىنە قاتىسىپ جاتىر. بيىل فەستيۆال اياسىندا جۇڭگو، فرانسيا، قازاقستان، ارگەنتينا، ارمەنيا، باحرەين، برازيليا، ءۇندىستان، يران، كولۋمبيا، ليۆان مەن وڭتۇستىك افريكا رەسپۋبليكاسى سىندى 12 ەلدىڭ 13 تەاتر ۇجىمى ونەرىن ورتاعا سالادى.
قازاقستان اتىنان وسى ايتۋلى فەستيۆالگە «الاتاۋ» ءداستۇرلى ونەر تەاترى قاتىسىپ جاتىر. بۇل شاقىرتۋ العان ەلىمىزدەگى جالعىز تەاتر. الماتىنىڭ ونەر ورداسى 8-9 شىلدە كۇندەرى ماسكەۋدەگى موسسوۆەت اتىنداعى مەملەكەتتىك اكادەميالىق تەاتر ساحناسىندا «Mamluk. سۇلتان بەيبارىس» ساۋندراماسىن ۇسىنادى.
قويىلىم تۇتقىن قۇلدان مىسىردىڭ بيلەۋشىسىنە دەيىنگى حيكايا مەن ماملۇكتەر ءۇشىن بىرلىكتىڭ نىشانىنا اينالعان تۇلعا – بەيبارىس سۇلتاننىڭ تاعدىرىن باياندايدى. سپەكتاكلدە جاندى ەتنومۋزىكا، جاۋىنگەرلىك ونەر كورىنىستەرى، پلاستيكالىق شەشىمدەر مەن سۇرەلەردى كوركەم وقۋ ۇيلەسىم تاۋىپ، ورتالىق ازيانىڭ رۋحاني-مادەني تەرەڭدىگىن پاش ەتەدى. قويىلىم تاريحي تۇلعانىڭ ەرلىگىن كورسەتۋمەن قاتار، بيلەۋشىنىڭ ادىلدىگى مەن جاۋاپكەرشىلىگى تۋرالى تەرەڭ وي تاستايدى. ۇستازىمەن بولعان ديالوگ ارقىلى بەيبارىس ەركىندىك پەن بيلىك، ادامگەرشىلىك پەن رۋحاني تازالىق جونىندە وي تولعايدى. اقىرىندا، ناعىز بيلىك حالىققا قىزمەت ەتۋ مەن كىشىپەيىلدىلىكتە ەكەنىنە كوز جەتكىزەدى.
«ءبىز تاريحي وقيعانى عانا ەمەس، تۇلعانىڭ ىشكى رۋحاني الەمىن اشۋدى ماقسات تۇتتىق. بىزگە بيلەۋشى بەينەسىنەن بۇرىن ونىڭ ادام رەتىندەگى دامۋى، ىشكى ىزدەنىسى ماڭىزدى بولدى. بۇل بۇكىل ترۋپپانىڭ قاجىرلى ەڭبەگىنىڭ جەمىسى. چەحوۆ فەستيۆالىنە قاتىسۋ – ءبارىمىزدىڭ ورتاق جەڭىسىمىز»، – دەيدى سپەكتاكل رەجيسسەرى فارحاد مولداعالي.
قويىلىمعا اكتەر، ءبيشى، مۋزىكانت، ءانشى سىندى 85 ونەرپاز جۇمىلدىرىلعان. تەاتردىڭ ەتنو-فولكلورلىق ءانسامبلى جاندى مۋزىكالىق سۇيەمەلدەۋ ارقىلى كورەرمەنگە قايتالانباس كوركەمدىك اسەر سىيلايدى. ساحنالىق ءتىلدىڭ بەينەلىلىگى ارقاسىندا قويىلىم كەز كەلگەن ۇلت پەن ءتىلدىڭ كورەرمەنىنە تۇسىنىكتى. باستى ءرولدى «دارىن» مەملەكەتتىك جاستار سىيلىعىنىڭ لاۋرەاتى اسەت ەسجان سومدايدى. ايتا كەتسەك، 2024 جىلى سپەكتاكلدىڭ تۇساۋى كەسىلىپ، ۇلى قولباسشىنىڭ 800 جىلدىعىنا ارنالدى.
«ءبىز «الاتاۋ» ءداستۇرلى ونەر تەاترىنا ۇلكەن مىندەتتەر جۇكتەپ وتىرمىز. قالا اكىمدىگىنىڭ قولداۋىمەن تەاتر ۇجىمىنىڭ جالاقىسى ءوسىپ، ماتەريالدىق-تەحنيكالىق بازاسى جاڭارتىلىپ، شىعارماشىلىق جانە اكىمشىلىك قىزمەتكەرلەردىڭ بىلىكتىلىگى ارتىپ كەلەدى. ءقازىر، جاز مەزگىلىندە، تەاتر عيماراتى جوندەۋگە جابىلعان، ال ترۋپپا ەل وڭىرلەرىن ارالاپ، گاسترولدىك ساپارلارمەن ونەر كورسەتىپ ءجۇر. سونىمەن قاتار، تەاتر حالىقارالىق دەڭگەيدەگى ەڭ ايگىلى فەستيۆالدەرگە جولداما الدى. وسى مۇمكىندىك ءۇشىن الماتى قالاسىنىڭ اكىمىنە العىس بىلدىرەمىز»، – دەدى الماتى قالاسى مادەنيەت باسقارماسىنىڭ باسشىسى عاني مايلىبايەۆ.
چەحوۆ فەستيۆالىنەن كەيىن «الاتاۋ» تەاترى فرانسياعا جول تارتادى. وندا Off Avignon – تەاتر الەمىندەگى ەڭ بەدەلدى فەستيۆالدە قازاقستان اتىنان ونەر كورسەتەدى. مادەنيەت باسقارماسىنىڭ ايتۋىنشا، الماتىلىق تەاتردىڭ مۇنداي اتاقتى فەستيۆالدەرگە قاتىسۋى – ۇجىمنىڭ كاسىبي شەبەرلىگىنىڭ مويىندالۋى عانا ەمەس، سونىمەن قاتار قازاق مادەنيەتىن الەمگە تانىتۋدىڭ ماڭىزدى قادامى.