«الەم ارۋى» بايقاۋىنىڭ فينالى كەيىنگە شەگەرىلدى

شارا الداعى 90 كۇندە وتەدى

«الەم ارۋى – 2021» سۇلۋلىق بايقاۋىنىڭ فينالى قاتىسۋشىلار اراسىندا COVID-19 تاراعانى بەلگىلى بولعاننان كەيىن سوڭعى ساتتە كەيىنگە شەگەرىلدى. بۇل تۋرالى بايقاۋدىڭ Facebook جەلىسىندەگى رەسمي پاراقشاسىندا جازىلدى، دەپ حابارلايدى Almaty-akshamy.kz ulysmedia.kz-كە سىلتەمە جاساپ.

17 جەلتوقسان كۇنى پۋەرتو-ريكونىڭ سان-حۋان قالاسىندا 70ء-شى حالىقارالىق سۇلۋلىق بايقاۋىنىڭ فينالى ءوتۋى كەرەك ەدى. قازىلار القاسى الەمنىڭ 97 ەلىنەن كەلگەن قاتىسۋشىلار اراسىنان جەڭىمپازدى انىقتاۋى قاجەت بولاتىن. كەيىنگە قالدىرۋ تۋرالى شەشىم قاتىسۋشىلار مەن ۇيىمداستىرۋشىلاردى جاڭا كوروناۆيرۋس ينفەكسياسىنىڭ بار-جوعىن تەكسەرگەننەن كەيىن قابىلداندى.

«بۇگىن تاڭەرتەڭ ينفەكسيانىڭ قوسىمشا جاعدايلارى راستالدى. دەنساۋلىق ساقتاۋ قىزمەتكەرلەرى مەن ساراپشىلارمەن كەڭەسكەننەن كەيىن كەيىنگە قالدىرۋ تۋرالى شەشىم قابىلداندى»، - دەلىنگەن حابارلامادا.

جاڭا دەرەكتەرگە سايكەس، شارا الداعى 90 كۇندە وتەدى.

ەسكە سالا كەتسەك، 23 جاستاعى اقتوبەلىك نازەركە قارمانوۆا «الەم ارۋى» بايقاۋىندا قازاقستان اتىنان قاتىسۋ قۇقىعىنا يە بولدى. ول اقتوبە قالاسىنداعى قازاق-ورىس حالىقارالىق ۋنيۆەرسيتەتىن ەسەپشى ماماندىعى بويىنشا ءتامامداعان. ءقازىر ول الماتىعا كوشىپ، بانكتەردىڭ بىرىندە كليەنتتەرگە قىزمەت كورسەتۋ ءبولىمىنىڭ مەنەدجەرى بولىپ جۇمىس ىستەيدى. ول ساداق اتۋمەن اينالىسا باستادى. سونىمەن قاتار، بەينەروليك پەن فوتوسۋرەتتەر تۇسىرگەندى ۇناتادى.