توقايەۆ الماتىدا جەر سىلكىنىسىن بولجاۋ بويىنشا تاپسىرما بەردى
پرەزيدەنت ولاردى قىرعىزستاننىڭ دابىل جۇيەسىمەن بىرىكتىرۋدى تاپسىردى، دەپ حابارلايدى Almaty-akshamy.kz
بۇل تۋرالى مەملەكەت باسشىسى الماتى جۇرتشىلىعىمەن كەزدەسۋىندە ايتتى.
«الماتى ءۇشىن جەر سىلكىنىسىن ءدال بولجاۋ جانە ولار تۋرالى ەرتە حابارلاۋ وتە ماڭىزدى. 2025 جىلعا دەيىن 28 سەيسميكالىق ستانسيانى ورناتۋدى اياقتاۋدى، كەيىن ولاردى قىرعىزستاننىڭ حابارلاۋ جۇيەسىمەن ينتەگراسيالاۋدى تاپسىرامىن. سونىمەن قاتار، قالادا توتەنشە جاعدايلار تۋرالى داۋىستىق حابارلامالاردى جىبەرۋ مۇمكىندىگى بار بىرىكتىرىلگەن ەسكەرتۋ جۇيەلەرىنىڭ جۇمىسىن جولعا قويۋ كەرەك»، - دەدى مەملەكەت باسشىسى.
قاسىم-جومارت توقايەۆ اكىمدىككە بەينەباقىلاۋ جۇيەلەرى، جول قوزعالىسى، قوڭىراۋ شالۋ بەلسەندىلىگى جانە الەۋمەتتىك ينفراقۇرىلىم دەرەكتەرىن بىرىكتىرەتىن احۋالدىق ورتالىق قىزمەتىن تولىقتاي ىسكە قوسۋ قاجەت ەكەنىن اتاپ ءوتتى.
قالانىڭ «سيفرلىق ەگىزىن» قۇرۋ يدەياسى اقپاراتتىق تەحنولوگيالار سالاسىنداعى زاماناۋي ترەندتەرگە جانە وزىق حالىقارالىق تاجىريبەگە سايكەس كەلەدى.
«قىركۇيەكتەگى جولداۋىمدا ءار قالا ءۇشىن جەر تەلىمدەرىنىڭ فۋنكسيونالدىق ينتەراكتيۆ كارتاسىن جانە ينجەنەرلىك جەلىلەر سحەمالارىن جاساۋدى تاپسىرعان بولاتىنمىن. الماتىدا بۇل نۇسقاۋ «سيفرلىق ەگىزدى» دامىتۋ جانە قالانىڭ باس جوسپارىن جاڭارتۋ اياسىندا جۇزەگە اسىرىلىپ جاتىر. بۇل جوبالار بىر-بىرىمەن ۇشتاسىپ جاتقانى جۇيەلى كوزقاراستىڭ جاقسى ۇلگىسى. جالپى، بۇل مەنىڭ جاقىن بولاشاقتا قالانى دامىتۋدىڭ نەگىزگى باسىمدىقتارى تۋرالى كوزقاراسىم»، - دەدى مەملەكەت باسشىسى.
پرەزيدەنت بۇگىن ايتىلعان بارلىق تاپسىرما مەن جوبالار ءبىرىنشى كەزەكتە الماتىلىقتاردىڭ ءومىر ءسۇرۋ ساپاسىن جاقسارتۋعا، ەكونوميكالىق الەۋەتتى نىعايتۋعا جانە قالانىڭ تارتىمدىلىعىن ارتتىرۋعا باعىتتالعانىن اتاپ ءوتتى.