850 ورىندىق مەكتەپ ىسكە قوسىلادى.
الماتىنىڭ المالى اۋدانىندا الداعى كۇندەرى جاڭا مەكتەپ اشىلادى. بۇل تۋرالى قالا اكىمى ەربولات دوسايەۆ اۋدان حالقىمەن كەزدەسۋ بارىسىندا ايتتى، دەپ حابارلايدى Almaty-akshamy.kz.
«ورتا ءبىلىم بەرۋ سالاسىندا وقۋشى ورىندارىنىڭ تاپشىلىعىن ازايتۋ جانە ءبىلىم بەرۋ وبەكتىلەرىن جوندەۋ بويىنشا جوسپارلى جۇمىس جۇرگىزىلۋدە.بيىلعى جىلدىڭ باسىندا 2 مەكتەپتىڭ (№34 جانە 144 گيمنازيالار) 850 ورىندىق 2 قوسىمشا قۇرىلىسى پايدالانۋعا بەرىلدى. ەندى 10-شى قاراشادا قابانباي باتىر كوشەسىندە 850 ورىندىق «Prometheus school» جەكە مەنشىك مەكتەبى اشىلادى»، - دەدى قالا باسشىسى.
اكىمنىڭ ايتۋىنشا، № 15ء-شى گيمنازيانى سەيسميكالىق كۇشەيتە وتىرىپ، كۇردەلى جوندەۋ جۇمىستارى جۇرگىزىلۋدە، 2023 جىلدىڭ شىلدە ايىندا پايدالانۋعا بەرىلەدى.كەلەسى جىلدىڭ IIIء-شى توقسانىنىڭ باسىندا №136 جانە 58ء-شى مەكتەپتىڭ عيماراتتارىن كۇردەلى جوندەۋدەن وتكىزىپ، سەيسميكالىق كۇشەيتۋ ءۇشىن جوبالاۋ-سمەتالىق قۇجاتتاما ازىرلەنەتىن بولادى.
«بالالاردى مەكتەپكە دەيىنگى بىلىممەن بارىنشا قامتۋ ءۇشىن بيىل المالى اۋدانى بويىنشا 225 ورىندىق 5 جەكە مەنشىك بالاباقشا اشىلدى. № 7 بالاباقشانى سەيسميكالىق كۇشەيتۋ جۇمىستارى اياقتالدى. جوبالىق قۋاتتى 75 ورىنعا ۇلعايتا وتىرىپ، №43 بالاباقشا عيماراتىنىڭ بۇرىن جەكە مەنشىكتە بولعان بولىگى ساتىپ الىندى. 2023 جىلدىڭ IIء-شى توقسانىندا كۇردەلى جوندەۋ بويىنشا جوبالاۋ-سمەتالىق قۇجاتتاما ازىرلەۋدى باستاۋ جوسپارلانعان. سونىمەن قاتار، وسى جىلدىڭ سوڭىنا دەيىن ماۋلەنوۆ- ايتەكە بي كوشەلەرىنىڭ قيىلىسىندا بۇرىن جالعا بەرىلگەن بالاباقشا عيماراتىن كۇردەلى جوندەۋدەن وتكىزىپ، سەيسميكالىق كۇشەيتۋ ءۇشىن جوبالاۋ-سمەتالىق قۇجاتتاما ازىرلەنەدى، 2023 جىلدىڭ 3ء-شى توقسانىندا قۇرىلىس-مونتاجداۋ جۇمىستارى جۇرگىزىلەدى (جوبالاۋ-سمەتالىق قۇجاتتامانىڭ ساراپتاماسى 2023 جىلدىڭ ءساۋىر ايىندا شىعادى)»،- دەيدى ەربولات دوسايەۆ.