قازىرگى تاڭدا ەلىمىزدىڭ جيھاز ونەركاسىبىنىڭ ينۆەستيسيالىق پورتفەلى قۇنى 17 ملرد تەڭگەدەن اساتىن 9 جوبانى قامتيدى.
ولاردى ىسكە اسىرۋ ارقىلى شامامەن 1000-عا جۋىق جۇمىس ورنى اشىلماق، دەپ حابارلايدى aqshamnews.kz ونەركاسىپ جانە قۇرىلىس مينيسترلىگىنە سىلتەمە جاساپ.
بۇل تۋرالى «QazIndustry» قازاقستاندىق يندۋستريا جانە ەكسپورت ورتالعىنىڭ جوبالاردى ىسكە اسىرۋعا مونيتورينگ جۇرگىزۋ جانە تالداۋ ديرەكسياسى حابارلادى.
اتالعان جوبالاردىڭ ىشىندەگى قۇنى 9،2 ميلليارد تەڭگەنى قۇرايتىن 4 جوبا بيىلعى جىلى تۇركىستان وبلىسىندا ىسكە قوسىلدى. جاڭا وندىرىستەر 375 ادامدى جۇمىسپەن قامتىدى. ونىمدەردىڭ نەگىزگى بولىگى ىشكى نارىققا باعىتتالعان.
بۇدان بولەك، جىل سوڭىنا دەيىن پاۆلودار وبلىسىندا ءبىر جوبانى ىسكە قوسۋ جوسپارلانىپ وتىر. قۇنى 388 ميلليون تەڭگە بولاتىن كەڭسە جانە مەكتەپ جيھازدارىن ءوندىرۋ جوباسى اياسىندا شامامەن 30-عا جۋىق جاڭا جۇمىس ورنى اشىلادى دەپ كۇتىلۋدە.
جۇزەگە اسىرۋ كەزەڭىندە شىمكەنت قالاسىندا قۇنى 800 ميلليون تەڭگەنى قۇرايتىن 3 جوبا بار. ولاردىڭ ىشىندە جيھاز، مەديسينالىق جيھاز جانە مەتالل شكافتار ءوندىرىسى بار. بۇل نىسانداردىڭ اشىلۋى 102 ادامدى جۇمىسپەن قامتاماسىز ەتۋگە مۇمكىندىك بەرەدى. جاڭا كاسىپورىندار ءونىمىنىڭ 9 % - عا جۋىعىن جاقىن جانە الىس شەتەلدەرگە ەكسپورتتاۋ جوسپارلانۋدا.
سونىمەن قاتار، اباي وبلىسىندا جالپى قۇنى 7،5 ميلليارد تەڭگە قۇرايتىن، 530 جاڭا جۇمىس ورنى قۇرىلاتىن كورپۋستىق كەڭسە جيھازىن ءوندىرۋ جوباسىن ىسكە اسىرۋ جوسپارلانىپ وتىر. جوبانىڭ نەگىزگى ينۆەستورى – جۇڭگو حالىق رەسپۋبليكاسى.
وسىلايشا، جوسپارلانعان 5 جوبانى ىسكە اسىرۋ بارىسىندا جيھاز ونەركاسىبىنىڭ نەگىزگى كاپيتالىنا تاعى 8 ميلليارد تەڭگەگە جۋىق ينۆەستيسيا تارتىلماق. جوبالار نەگىزىنەن ەلىمىزدىڭ ىشكى قاجەتتىلىكتەرىن قامتامسىز ەتۋگە باعىتتالعان. نەگىزگى ينۆەستورلار – قازاقستان مەن جۇڭگو ەلى.