13 قازاندا اباي اتىنداعى قازاق ۇلتتىق وپەرا جانە بالەت تەاترىنىڭ ساحناسىندا الەمگە تانىمال وپەرا ءانشىسى، تاتارستان رەسپۋبليكاسىنىڭ حالىق ءارتىسى، رەسەي فەدەراسياسىنىڭ ەڭبەك سىڭىرگەن ءارتىسى، گابدۋللا تۋكاي اتىنداعى تاتارستان مەملەكەتتىك سىيلىعىنىڭ لاۋرەاتى البينا شاعيمۇراتوۆا جانە ميحايل يۆانوۆيچ گلينكا اتىنداعى حالىقارالىق ۆوكاليستەر بايقاۋىنىڭ لاۋرەاتتارى قاتىساتىن كونسەرت وتەدى.
كونسەرت البينا شاعيمۇراتوۆا مەن بايقاۋ جەڭىمپازدارىنىڭ حالىقارالىق گاسترولدىك تۋرى اياسىندا ۇيىمداستىرىلىپ وتىر. تۋردىڭ ماقساتى – 2024 جىلعى بايقاۋ جەڭىمپازدارىنىڭ شىعارماشىلىعىن قازاقستان، وزبەكستان، تۇركيا، رەسەي، ارمەنيا جانە بەلارۋس كورەرمەندەرىنە تانىستىرۋ.
ءانشى اتاپ وتكەندەي، قازاقستان بۇل اۋقىمدى تۋردىڭ ماڭىزدى بولىگى بولىپ تابىلادى. تۋر ايگىلى وپەرا جۇلدىزى، بايقاۋدىڭ نەگىزىن قالاۋشى ءارى ونى 40 جىلدان استام ۋاقىت باسقارعان يرينا ارحيپوۆانىڭ 100 جىلدىعىنا ارنالعان.
«بۇل گاسترولدەر – ءبىز ءۇشىن الما-اتىنى، استانانى جانە قازاقستاندى جاقىنىراق تانىپ-بىلۋگە، جاڭا مادەنيەت پەن كورەرمەندەرمەن جۇزدەسۋگە تاماشا مۇمكىندىك. مۇنداي شىعارماشىلىق بايلانىستار تەك مۋزىكا الەمى ءۇشىن عانا ەمەس، جالپى ءومىرىمىز ءۇشىن دە اسا ماڭىزدى»، – دەيدى البينا شاعيمۇراتوۆا.
كەش باعدارلاماسىندا الەمدىك وپەرا كلاسسيكاسىنىڭ جاۋھارلارى — ۆ. ا. موسارت، دج. ۆەردي، ۆ. بەلليني، گ. دونيسەتتي، دج. روسسيني، ا. بورودين، ن. ريمسكيي-كورساكوۆ، ي. ستراۆينسكيي جانە باسقا دا كومپوزيتورلاردىڭ تۋىندىلارى ورىندالادى.
شاعيمۇراتوۆانىڭ ەرەكشە تەمبرلى داۋىسى مەن شەبەرلىگى ونى الەمنىڭ جەتەكشى ساحنالارىندا — كوۆەنت-گاردەن، لا سكالا، ۆەنا مەملەكەتتىك وپەراسى، مەتروپوليتەن-وپەرا جانە باۆاريا وپەرا تەاترلارىندا زور قوشەمەتكە بولەدى. قازاقستاندىق كورەرمەندەرگە ءانشى ۆ. بەللينيدىڭ «نورما» وپەراسىنداعى اتاقتى «Casta diva» كاۆاتيناسىن جانە دج. ۆەرديدىڭ «وتەللو» وپەراسىنداعى دەزدەمونا ارياسىن ۇسىنادى.
سونىمەن قاتار ساحنادا:
- ەكاتەرينا ساۆنيكوۆا (III سىيلىق، سوپرانو)،
- ەكاتەرينا لۋكاش (I سىيلىق، مەسسو-سوپرانو)،
- وزبەكستاننىڭ ەڭبەك سىڭىرگەن ءارتىسى وتابەك نازيروۆ (I سىيلىق، تەنور)،
- كونستانتين فەدوتوۆ (II سىيلىق، باس)،
- كيريلل پوپوۆ (ديپلومانت، تەنور) ونەر كورسەتەدى.
- سيمفونيالىق وركەستردى تاتارستاننىڭ حالىق ءارتىسى، ماەسترو رەنات سالاۆاتوۆ باسقارادى.
- كەشتىڭ فينالىندا دج. ۆەرديدىڭ «تراۆياتا» وپەراسىنداعى اتاقتى «زاستولنايا» ورىندالىپ، ونى البينا شاعيمۇراتوۆا جاس ورىنداۋشىلارمەن بىرگە ورىندايدى.
ماەسترو رەنات سالاۆاتوۆ اتاپ ءوتتى:
«بۇل – ەرەكشە مادەني وقيعا. ءبىزدىڭ ساحنادا بەدەلدى گلينكا بايقاۋىنىڭ لاۋرەاتتارى ونەر كورسەتەدى. ولار كورەرمەن مەن قازىلاردىڭ جۇرەگىن جاۋلاپ، الەمگە جول تارتقان جاس دارىندار. البينا شاعيمۇراتوۆاعا العىس بىلدىرەمىن — ول تەك الەم ساحنالارىندا ونەر كورسەتىپ قانا قويماي، بايقاۋدىڭ كوركەمدىك جەتەكشىسى رەتىندە بولاشاق وپەرا جۇلدىزدارىن تانىستىرۋعا ۇلەس قوسۋدا.»
كونسەرت كۇنى: 2025 جىلعى 13 قازان
باستالۋ ۋاقىتى: 19:00
وتەتىن ورنى: اباي اتىنداعى قازاق ۇلتتىق وپەرا جانە بالەت تەاترى