8–10 قازان كۇندەرى جامبىل اتىنداعى مەملەكەتتىك اكادەميالىق فيلارمونيادا كومپوزيتور، ديريجەر، كسرو مەن قازاقستاننىڭ حالىق ءارتىسى، «حالىق قاھارمانى» مەملەكەتتىك سىيلىعىنىڭ لاۋرەاتى، نۇرعيسا اتاباي ۇلى تىلەندييەۆتىڭ 100 جىلدىق مەرەيتويىنا ارنالعان رەسپۋبليكالىق ديريجەرلەر بايقاۋى وتەدى. بۇل جونىندە الماتى قالاسى وڭىرلىك كوممۋنيكاسيالار قىزمەتىنىڭ كوشپەلى بريفينگىندە حابارلاندى.
بايقاۋ قازاقستان رەسپۋبليكاسىنىڭ مادەنيەت جانە اقپارات مينيسترلىگىنىڭ قولداۋىمەن ۇيىمداستىرىلىپ وتىر. نەگىزگى ماقساتى – وتاندىق ديريجەرلىك مەكتەپ ءداستۇرىن ساقتاپ، دامىتۋ، جاڭا ەسىمدەردى انىقتاۋ، جاس تالانتتارعا قولداۋ كورسەتۋ جانە ۇلتتىق مادەنيەتتىڭ بەدەلىن حالىقارالىق دەڭگەيدە ارتتىرۋ.
شىعارماشىلىق سىنعا ەلىمىزدىڭ جاس تالانتتارى مەن مۋزىكا ۋنيۆەرسيتەتتەرىنىڭ 18 بەن 35 جاس ارالىعىنداعى ستۋدەنتتەرى قاتىسادى. بايقاۋ ەكى كەزەڭنەن تۇرادى. بارلىق شىعارما ن.تىلەندييەۆ اتىنداعى اكادەميالىق فولكلورلىق-ەتنوگرافيالىق «وتىرار سازى» وركەسترىن سۇيەمەلدەۋىمەن ورىندالادى.
وركەستردىڭ كوركەمدىك جەتەكشىسى ءارى باس ديريجەرى، كومپوزيتوردىڭ قىزى ءدىنزۋحرا تىلەندييەۆا بايقاۋدىڭ ماڭىزدىلىعىنا توقتالىپ: «بۇل تەك جاس ديريجەرلەردىڭ جارىسى عانا ەمەس. اكەمنىڭ باي مۇراسىمەن جاقىنىراق تانىسىپ، ونىڭ شىعارماشىلىعىنا قانىعىپ، سول سەرپىندى جاس بۋىنعا جەتكىزۋدىڭ ەرەكشە مۇمكىندىگى»، – دەدى ول.
جامبىل اتىنداعى مەملەكەتتىك اكادەميالىق فيلارمونيا ديرەكتورى اقان ابدۋالييەۆ بايقاۋدىڭ كومپوزيتوردىڭ مەرەيتويىمەن قاتار كەلۋى ەرەكشە مانگە يە ەكەنىن اتاپ ءوتتى. «نۇرعيسا تىلەندييەۆتىڭ 100 جىلدىق مەرەيتويى ەلىمىز بويىنشا كەڭ كولەمدە اتالىپ ءوتىپ جاتىر. الماتىدا بايقاۋدىڭ ۇيىمداستىرىلۋى – سيمۆولدىق ءمانى بار وقيعا. ءبىز بۇل جوبا تاجىريبە الماسۋعا ۇلكەن مۇمكىندىك بەرىپ، جاڭا ەسىمدەردى انىقتايتىنىنا سەنەمىز»، – دەدى فيلارمونيا باسشىسى.
جەڭىمپازداردى مادەنيەت پەن ونەر سالاسىنىڭ تانىمال قايراتكەرلەرىنەن قۇرالعان قازىلار القاسى انىقتايدى. لاۋرەاتتارعا مىناداي ماراپاتتار تابىستالادى:
• گران-پري
• I، II جانە III ورىندار
• ارناۋلى ديپلومدار، سونىڭ ىشىندە «نۇرعيسا تىلەندييەۆ شىعارمالارىن ۇزدىك ورىنداعانى ءۇشىن» جۇلدەسى.
بايقاۋ قورىتىندىسى بويىنشا جەڭىمپازداردى ماراپاتتاۋ ءراسىمى مەن گالا-كونسەرت 10 قازان كۇنى ساعات 19:00-دە جامبىل اتىنداعى مەملەكەتتىك اكادەميالىق فيلارمونيانىڭ ۇلكەن زالىندا وتەدى.