بۇگىندە قازاق قىزدارىنىڭ ارمانى تەك اسپاندا عانا ەمەس، عارىشتا جالعاسىپ جاتىر. كاسىپكەر، الپينيست، ارمان قۋعان ارۋ دانا قاراعۇسوۆا جۋىردا عارىشقا تۋريست رەتىندە ۇشاتىن العاشقى قازاق ايەلى اتانباق.
بۇل – تەك جەكە جەتىستىك ەمەس، قازاق ايەلىنىڭ شەكسىز مۇمكىندىگىنىڭ دالەلى.
الاتاۋدىڭ اق شىڭدارىنا قۇمارتا كوز تىگىپ وسكەن الماتىلىق دانا، بالا كەزىنەن بيىكتى باعىندىرۋدى ارمانداعان. كيليماندجارو مەن ەلبرۋس سەكىلدى الەمنىڭ ەڭ بيىك نۇكتەلەرىن باعىندىرعان ول، ەندى عارىش كەڭىستىگىنە قادام باسپاق.
بيىككە ورلەۋ – ءوزىمدى سىناۋدىڭ ءتاسىلى»، – دەيدى ول. بۇل ونىڭ ومىرلىك قاعيداسىنا اينالعان. «ادامزاتتىڭ بولاشاعى عارىشپەن بايلانىستى. جاڭا كوكجيەكتەردى باعىندىرۋ ارقىلى ءبىز تەحنولوگيالاردى عانا دامىتىپ قويماي، جەكە مۇمكىندىگىڭىزدى كەڭەيتە تۇسەمىز»، – دەپ جازدى بولاشاق عارىش ءتۋريسى Instagram-داعى پاراقشاسىنا.
الەۋمەتتىك جەلىلەردە جاريالانعان مالىمەتكە قاراعاندا، دانا قاراعۇسوۆا 25 جىلدان استام ۋاقىت بويى مەديا مەن ديستريبۋسيا سالالارىندا ءتۇرلى شارالاردى ۇيىمداستىرۋمەن اينالىسقان. ماسەلەن، بيىل ايگىلى دجەننيفەر لوپەستىڭ قازاقستانداعى كونسەرتىن وتكىزۋگە اتسالىسقان. 43 جاستاعى دانانىڭ كاسىپپەن اينالىسىپ جۇرگەنىنە 25 جىلدان استى. قاراعۇسوۆانى First Media Group (FMG) ماركەتينگ حولدينگىنىڭ نەگىزىن قالاۋشى دەپ اتايدى.
وسى جوبا اياسىندا Blue Origin عارىشقا 75 ادامدى الىپ شىقتى. تاريحتا قالاتىن NS-36 ميسسياسى – New Shepard باعدارلاماسىنىڭ 15ء-نشى ساپارى. عارىشقا ساياحات بار بولعانى 10-12 مينۋتقا سوزىلادى. زىمىران 100 شاقىرىم بيىككە كوتەرىلىپ، عارىش باستالاتىن تۇسقا دەيىن جەتەدى. دانا جانىنداعى 5 جولاۋشىمەن بىرگە جەردىڭ تارتىلىس كۇشىنەن الىستاپ، اۋەدە قالىقتايدى. ولار جەردى عارىشتان تاماشالايدى.
دانامەن بىرگە كاسىپكەر دجەفف ەلگين، ينجەنەر كلينت كەللي III، ستارتاپ نەگىزىن قالاۋشى اارون نيۋمان، ۋكراين كاسىپكەرى ۆيتاليي وستروۆسكيي جانە ءاتى-جونىن جاريالاماعان تاعى ءبىر جولاۋشى عارىشقا جول تارتپاق.
كومپانيا ساپار قۇنىن ناقتى اتاماعانىمەن، ءبىر ورىنعا الدىن الا تاپسىرىس بەرۋ ءۇشىن 150 000 اقش دوللارى كولەمىندە دەپوزيت تولەۋ قاجەت ەكەنى ايتىلعان. ال ساياحاتتىڭ جالپى قۇنى 1 ميلليون دوللارعا دەيىن جەتۋى مۇمكىن.
دانانىڭ اناسى – تانىمال قوعام قايراتكەرى گۇلجان قاراعۇسوۆا. ول قازاقستاندا ەڭبەك جانە حالىقتى الەۋمەتتىك قورعاۋ ءمينيسترى بولدى، كەيىن ۇزاق جىلدار پارلامەنت دەپۋتاتى قىزمەتىن اتقاردى.
ال دانا – قازىرگى زامانعى كاسىپكەر ايەلدىڭ جارقىن ۇلگىسى. ول Instagram پاراقشاسىندا جەكە ءومىرى مەن ساياحاتتارى تۋرالى اشىق جازىپ، وقىرمانمەن ەركىن تىلدەسەدى. بۇرىن ول تانىمال بلوگەر بەيبىت الىبەكوۆپەن وتاسقان. ەكەۋىنىڭ ءۇش بالاسى بار. كەيىن وتباسى تاراپ كەتكەن. بەيبىت الىبەكوۆ وسىدان ءبىراز بۇرىن عانا الەۋمەتتىك جەلىدە: «مەنىڭ بۇرىنعى ايەلىم 8 قازان كۇنى عارىشقا ۇشادى. دانا قازاقستاننىڭ تۇڭعىش عارىش ءتۋريسى بولادى. وعان ساتتىلىك تىلەيىك»، – دەپ جازدى.
قاراپايىم قازاق قىزى ەندى عارىشقا اتتانعالى وتىر. بۇل – تەك دانا قاراعۇسوۆانىڭ ەمەس، بارشا قازاق ايەلىنىڭ ارمانىن جۇزەگە اسىراتىن تاريحي ءسات.
سونىمەن، دانانىڭ عارىشقا ساپارى باتىس تەحاستاعى ءنومىرى ءبىرىنشى عارىش ايلاعىنان ەرتەڭ، استانا ۋاقىتىمەن ساعات 18.00-دە جۇزەگە اسادى.