الماتىدا قالا اكىمىنىڭ تاپسىرماسىمەن بورالداي وزەنىنىڭ بويىنداعى جاياۋ جۇرگىنشىلەر ايماعىنىڭ قۇرىلىسى اياقتالىپ كەلەدى
ەربولات دوسايەۆ مەردىگەر ەسكەرتۋلەردى جويعانعا دەيىن بورالداي وزەنىنىڭ ارناسىن اباتتاندىرۋ جوباسىن قابىلداماۋدى تاپسىردى، دەپ حابارلايدى almaty-akshamy.kz
الماتى اكىمى ەربولات دوسايەۆ جۇمىس ساپارى بارىسىندا قالانىڭ الاتاۋ اۋدانىنداعى بورالداي وزەنىنىڭ بويىنداعى جاسىل ايماقتى اباتتاندىرۋ بارىسىمەن تانىستى.
ونىڭ تاپسىرماسى بويىنشا جاقسى دەمالىستى قامتاماسىز ەتۋ جانە حالىقتىڭ ءومىر ءسۇرۋ ساپاسىن ارتتىرۋ ماقساتىندا بورالداي وزەنىنىڭ بويىندا اباتتاندىرىلعان جاياۋ جۇرگىنشىلەر ايماعى ۇيىمداستىرىلادى. جاڭا قوعامدىق كەڭىستىك، ەڭ الدىمەن، 60 مىڭنان استام ادام تۇراتىن سايالى، زەردەلى، كوكقاينار جانە ايگەرىم شاعىن اۋداندارىنىڭ تۇرعىندارى ءۇشىن تارتىمدى ورىنعا اينالادى.
قالا باسشىسىنا الاتاۋ اۋدانىنىڭ اكىمى ازامات قالدىبەكوۆ بايانداعانداي، جوباعا سايكەس وسى اۋماقتا قوقىس جاشىكتەرى، ورىندىقتار، سىرتقى جارىقتاندىرۋ باعانالارى، اۆتوكولىككە ارنالعان تۇراقتار ورناتىلدى، سۋارۋ جۇيەسى سالىنىپ، ايلاق جابدىقتالعان. قالا تۇرعىندارىنىڭ دەمالىسى ءۇشىن فۋتبول جانە باسكەتبول الاڭدارى، تەننيس ۇستەلدەرى، سكەيت تەبۋ الاڭى سالىندى.
جەرگىلىكتى تۇرعىندارمەن كەزدەسۋى بارىسىندا اكىمگە دەمالۋعا جاعداي جاساعانى ءۇشىن العىس ءبىلدىردى.
«ءبىزدى قالاعا كىردىك. ءبىر كەزدەرى قاسكەلەڭگە قاراۋشى ەدىك. مۇندا 36 جىلدان بەرى تۇرامىن، ءبىرىنشى رەت حالىق ءۇشىن وسىنداي اۋقىمدى جۇمىس جاسالۋدا. بىزگە مالدان قورعانۋ قاجەت، ءبىز ءوزىمىز مال ۇستامايمىز. ءبىراق جاقىن ماڭداعى شاعىن اۋداننىڭ تۇرعىندارى مالىن جىبەرە سالادى. بىزگە ءتارتىپتى باقىلايتىن باقىلاۋشى كەرەك»، - دەدى جەرگىلىكتى تۇرعىننىڭ ءبىرى اكىمگە.
قالا باسشىسى ەربولات دوسايەۆ اۋماققا پەريمەترى بويىنشا بەينەباقىلاۋ كامەرالارى ورناتىلاتىنىن اتاپ ءوتتى.
«الاتاۋ اۋدانىندا دەمالۋشىلاردىڭ ءتارتىبى مەن قاۋىپسىزدىگىن ساقتاۋ ءۇشىن قوسىمشا 900 باقىلاۋ كامەراسى ورناتىلادى»، - دەدى اۋدان اكىمى ازامات قالدىبەكوۆ.
سونداي-اق، جاعالاۋ اۋماعىندا جاقىندا جەرگىلىكتى تۇرعىنداردىڭ ءوتىنىشى بويىنشا ەكى قوعامدىق دارەتحانا اشىلادى.
جالپى، اباتتاندىرۋ بويىنشا جوبانى جۇزەگە اسىرۋ بارىسىمەن تانىسقان ەربولات دوسايەۆ جۇمىستىڭ ساپاسى جونىندە ءبىرقاتار ەسكەرتۋ ايتىپ، بارلىق كەمشىلىكتى پىسىقتاۋدى جانە نىساندى اقاۋ جويىلعانعا دەيىن تەڭگەرىمگە قابىلداماۋدى تاپسىردى.
سونىمەن قاتار، ەربولات دوسايەۆ الماتىدا جايلى قالالىق ورتا قۇرۋ بويىنشا بەلسەندى جۇمىس جالعاساتىنىن اتادى.
ەستەرىڭىزگە سالا كەتەيىك، مەگاپوليستە ناۋرىزباي اۋدانىنداعى قارعالى وزەنىنىڭ جاعالاۋىن قايتا جاڭارتۋ جۇمىستارى جۇرگىزىلىپ جاتىر. جەتىسۋ اۋدانىندا جالپى ۇزىندىعى 1 200 مەتر ەسەنتاي وزەنىنىڭ جاعاسىندا قۇرىلىس جۇمىستارى باستالدى. قايتا جاڭعىرتۋ اياسىندا وزەن ارناسى تازارتىلىپ، سەرۋەندەۋ ايماعى قۇرىلادى.