الماتى اكىمدىگى بيزنەس وكىلدەرىن تارتىپ، قالانى كوركەيتۋ جۇمىستارىن جالعاستىرىپ كەلەدى
الماتى اكىمدىگى ءىرى قۇرىلىس كومپانيالارىن قالانىڭ ينفراقۇرىلىمىن دامىتۋعا تارتۋ ءىسىن جالعاستىرىپ كەلەدى. الەۋمەتتىك جاۋاپكەرشىلىك قاعيداتىن ىسكە اسىرۋ اياسىندا RAMS Qazaqstan قۇرىلىس كومپانياسى الاتاۋ اۋدانىندا، مومىش ۇلى كوشەسىندە، د. قونايەۆ مەشىتىنىڭ قاراما-قارسى بەتىندە 25 گەكتار اۋماقتى قامتيتىن زاماناۋي ساياباق سالۋعا 6 ملرد تەڭگەدەن استام قارجى قۇيۋدى جوسپارلاپ وتىر.
قۇرىلىس-مونتاجداۋ جۇمىستارى 2025 جىلى قىركۇيەكتە باستالىپ، 2026 جىلى جازدا اياقتالماق. جاڭا ساياباق الماتىنىڭ پوليسەنترلىك دامۋى اياسىندا جايلى قالالىق ورتا قالىپتاستىرۋدا ەرەكشە مانگە يە بولماق.
جوبا اياسىندا ساياباق اۋماعىندا كورىكتى جاياۋ جۇرگىنشىلەر جانە ۆەلوسيپەد جولدارى سالىنىپ، بالالار مەن سپورت الاڭدارى، تىنىش دەمالىس ايماقتارى مەن زاماناۋي لاندشافتىق ديزاين ەلەمەنتتەرى جاساقتالماق. جاسىل جەلەككە ەرەكشە كوڭىل ءبولىنىپ، بيىكتىگى 4-6 مەتردەن اساتىن 500-دەن اسا ءىرى اعاش وتىرعىزۋ كوزدەلگەن.
ساياباق ايماعى ءار تۇرعىننىڭ قاجەتىنە ساي ويلاستىرىلىپ، بالامەن سەرۋەندەيتىن وتباسىلاردان باستاپ جاستار مەن قارتتارعا دەيىن بارشاعا قولايلى بولماق.
الماتى اكىمدىگى الەۋمەتتىك جاۋاپكەرشىلىگى جوعارى بيزنەس وكىلدەرىمەن بىرلەسىپ، وسىنداي جاسىل جەلەككە تولى دەمالىس ورىندارىن كوبەيتىپ، قالا تۇرعىندارىنا جايلى ورتا قالىپتاستىرۋ ءىسىن تاباندى تۇردە جالعاستىرا بەرمەك.