گيدرولوگيا بەكەتتەرىن جوندەپ، جاڭعىرتۋ قاجەت. بۇل تۋرالى پارلامەنت پالاتالارىنىڭ بىرلەسكەن وتىرىسىندا قازاقستان حالقىنا جولداۋىن جاريالاپ جاتقان مەملەكەت باسشىسى قاسىم-جومارت توقايەۆ ايتتى.
«يرريگاسيا جۇيەلەرى جانە جالپى سۋ شارۋاشىلىعى ماسەلەسىمەن مۇقيات اينالىسۋ قاجەت. كوكتەمدەگى الاپات تاسقىن بۇكىل ەلىمىز ءۇشىن ۇلكەن سىناق بولدى. سول قيىن كۇندەردە ءبىز ىنتىماعى جاراسقان ەل ەكەنىمىزدى كورسەتتىك. قازاقستاننىڭ ءار ايماعىنان جينالعان ەرىكتىلەر مەن جاناشىر ازاماتتار زارداپ شەككەن جۇرتقا كومەك قولىن سوزدى. مەنىڭ ەلدىك ىستەن شەت قالماۋ تۋرالى ۇندەۋىمە ءىرى بيزنەس وكىلدەرى دە قولداۋ ءبىلدىردى. مەملەكەتتىڭ باتىل ارەكەتى مەن حالىقتىڭ ءوزارا تىلەكتەس بولۋىنىڭ ارقاسىندا اسا قيىن جاعدايدان امان-ەسەن وتتىك. دەگەنمەن ورتالىق جانە جەرگىلىكتى بيلىك وكىلدەرى وسى وقيعادان ساباق الۋى كەرەك»، - دەدى مەملەكەت باسشىسى.
پرەزيدەنتتىڭ اتاپ وتۋىنشە، قازىرگى زاماندا ءبىز كەز كەلگەن قاتەرگە دايىن بولۋىمىز قاجەت. سوندىقتان قارعىن سۋدى جيناپ، ديقانداردىڭ قاجەتىنە جاراتۋ ءۇشىن ونى دۇرىس ساقتاي بىلگەن ءجون. گيدرولوگيا بەكەتتەرىن جوندەپ، جاڭعىرتۋ قاجەت. سۋدى بارىنشا ۇنەمدەۋ جۇمىسىن ۇيىمداستىرۋ كەرەك. بۇل – ەڭ الدىمەن، اۋىل شارۋاشىلىعىنا قاتىستى ماسەلە، ياعني سۋ ۇنەمدەۋ تەحنولوگياسىن، اسىرەسە، اۋىل شارۋاشىلىعىندا كەڭىنەن قولدانۋ قاجەت.
«سۋ قورىن جيناپ، ونى ءتيىمدى پايدالانىپ، يرريگاسيا جۇيەسىن دۇرىس قولدانا الساق، بۇل سالاعا دا ينۆەستيسيا تارتۋعا بولادى. سوندىقتان تاريف ساياساتىن رەتتەپ، ينۆەستورلارعا ءتيىمدى قولداۋ شارالارىن ۇسىنۋ قاجەت. بۇل – ۇكىمەتتىڭ الدىندا تۇرعان ماڭىزدى مىندەت. ناقتى جۇمىسقا كىرىسۋ كەرەك»، - دەدى قاسىم-جومارت توقايەۆ.