اباي وبلىسىنداعى الاكول جاعالاۋىنداعى دەمالىس بازالارىندا بىلتىر 200 مىڭنان استام تۋريست كەلگەن، دەپ حابارلايدى almaty-akshamy.kz.
«ق ر مەملەكەتتىك ۇلتتىق تابيعي پاركتەرىنىڭ اۋماقتارىندا ەكولوگيالىق ءتۋريزمدى دامىتۋدىڭ 2024-2025 جىلدارعا ارنالعان جول كارتاسى» شەڭبەرىندە تارباعاتاي مەملەكەتتىك ۇلتتىق تابيعي پاركىندە تۋريستىك مارشرۋتتار بويىنشا ءتيىستى جۇمىستار قولعا الىنىپ جاتىر. جالپى اۋدانى 143 550،5 گەكتار جانە 204 602 گەكتار قورعاۋ ايماعى بار ساياباقتا جىل سايىن فلورا مەن فاۋنانى قورعاۋعا جانە تابيعي كورىكتى جەرلەردى ساقتاۋعا باعىتتالعان «ساياباقتار شەرۋى» سياقتى ەكولوگيالىق اكسيالار وتكىزىلەدى. بۇل تۋرالى اباي وبلىسىنىڭ كاسىپكەرلىك جانە يندۋستريالىق-يننوۆاسيالىق دامۋ باسقارماسىنىڭ باسشىسى رۇستەم ۆوروشيلوۆ اكىمدىك وتىرىسىندا مالىمدەدى.
«وتكەن جىلعى دەمالىس ماۋسىمىندا الاكولگە 200 مىڭنان استام ادام كەلگەن. كۋرورتتىق ايماقتا ءبىر مەزەتتە 14 450 ءتۋريستى قابىلداي الاتىن 230 ورنالاستىرۋ ورنىن قوسا العاندا 435 كاسىپكەرلىك سۋبەكتىسى جۇمىس ىستەيدى. ماۋسىمدىق كەزەڭدە «TOURIST INFO» اقپاراتتىق ورتالىعى جۇمىس ىستەيدى. وندا ءۇش مەنەدجەر دەمالۋشىلارعا قاجەتتى اقپاراتتىق قىزمەت كورسەتىپ، جادىنامالار، بروشيۋرالار مەن جولسەرىك كارتالارىن تەگىن تاراتادى.
2023 جىلدىڭ 20 ماۋسىمىندا بەكىتىلگەن جول كارتاسى شەڭبەرىندە 42 ءىس-شارانى قامتيتىن تۋريستەردىڭ لايىقتى دەڭگەيدە دەمالۋىنا جاعداي جاساۋ ءۇشىن اۋماقتى اباتتاندىرۋ جۇمىستارى جۇرگىزىلۋدە.
كۋرورتتىق ايماقتىڭ تارتىمدىلىعىن ارتتىرۋ ءۇشىن ءبىرقاتار شارا جوسپارلانۋدا. اتاپ ايتقاندا، كوكتال اۋىلىنان قابانباي اۋىلىنا دەيىن ۇزىندىعى 70 شاقىرىم بولاتىن 110 كۆ جوعارى ۆولتتى جەلى تارتۋ، الاكول جاعالاۋىن نىعايتۋ، كول جاعالاۋىن ودان ءارى دامىتۋ ءۇشىن باسقارۋشى كومپانيا قۇرۋ، قابانباي اۋىلىندا قۋاتى جىلىنا 30 مىڭ توننا بولاتىن قاتتى تۇرمىستىق قالدىقتار پوليگونىن سالۋ، جاعالاۋ بويىمەن جاياۋ جۇرگىنشىلەر كوشەسىن اباتتاندىرۋ، ۇزىندىعى 8،2 شاقىرىم بولاتىن قابانباي اۋىلىنداعى سولتۇستىك اينالما جولدى قايتا جاڭعىرتۋ»، - دەدى ول.
بيىل ءوڭىردىڭ بىرنەشە اۋدانىندا مادەني-تانىمدىق ءىس-شارالار جوسپارلانعان. اباي اۋدانىندا قۇنانباي وسكەنباي ۇلىنىڭ 220 جىلدىعى اتاپ وتىلەدى. سونىڭ اياسىندا اسىل تۇقىمدى جىلقىلار كورمەسى، تاريحي-تانىمدىق كونفەرەنسيا، حالىق اندەرى مەن بي انسامبلدەرىنىڭ قويىلىمدارى وتەدى.
اقسۋات اۋدانىندا ىرعىزباي دوسقانا ۇلى اتىنداعى ءداستۇرلى تۋرنير ۇيىمداستىرىلىپ، ات جارىسى، ايتىس جانە گالا-كونسەرت وتكىزۋ كوزدەلىپ وتىر. بەسقاراعاي اۋدانىندا «سابانتوي-2024» تاتار ۇلتتىق مەرەكەسى سپورتتىق شارالارمەن، قايىرىمدىلىق اكسيالارىمەن جانە ات جارىستارىمەن اتالىپ وتىلمەك.
ايماق باسشىسى نۇرلان ۇرانحايەۆ وبلىستاعى تۋريزم سالاسىن دامىتۋ جەرگىلىكتى اتقارۋشى بيلىكتىڭ نەگىزگى مىندەتتەرىنىڭ ءبىرى ەكەنىن اتاپ ءوتتى. وسىعان بايلانىستى تۋريستەردى تارتۋعا الەۋەتتى اۋدان اكىمدەرىنە جەرگىلىكتى بيزنەس وكىلدەرىمەن تىعىز قارىم-قاتىناستا بولىپ، جۇمىس ىستەۋدى تاپسىردى.