يسپانيانىڭ مەليلە قالاسىندا ءوتىپ جاتقان 2024 جىلعى كوماندالىق چەمپيوناتىندا قىزىقتى وقيعا ورىن الدى. 22 جاستاعى كيريلل شيەۆچەنكو، C.A. Silla - Integrant Col·lectius كومانداسىنىڭ مۇشەسى، چەمپيوناتقا قاتىسۋشىلار قاتارىنان شىعارىلدى.، دەپ حابارلايدى aqshamnews.kz.
ال ونىڭ ءبىرىنشى جانە ەكىنشى تۋرداعى جەڭىستەرى مەن تەڭ ويىندارى جەڭىلىس دەپ سانالدى. وعان الاياقتىقپەن اينالىسقانى تۋرالى ايىپ تاعىلدى.
بۇل شەشىمدى شارانىڭ باس سۋدياسى وسكار برۋنو دە پرادو رودريگەس قابىلدادى. ول شيەۆچەنكونىڭ ادىلەتسىزدىك جاساعانىنا قاتىستى ەشقانداي كۇمان قالماعانىن مالىمدەدى.
تەكسەرۋ بارىسىندا شاحماتشىنىڭ ويىن بارىسىندا ءجيى دارەتحاناعا كەتىپ قالعانى، ءبىراق اربيترلەرگە الدىن الا حابارلاماعانى انىقتالدى. كەشكىسىن ەدەنت جۋۋشى دارەتحانادان تەلەفون تاۋىپ الىپ، چەمپيونات ءوتىپ جاتقان ءقوناقۇيدىڭ اكىمشىلىگىنە بەرگەن. كەلەسى كۇنى سول دارەتحانادا تاعى دا تەلەفون تابىلدى، ال شيەۆچەنكو ءدال وسى كابينكاعا ءجيى كىرگەن.
سۋديانىڭ سۇراۋى بويىنشا شاحماتشىنىڭ دارەتحاناعا جەكە كەتۋىنە باقىلاۋ ورناتىلدى. ۇيىمداستىرۋشىلار شيەۆچەنكونىڭ تەلەفون تابىلعاننان كەيىن دە دارەتحاناعا كىرىپ، الگى كابينكانىڭ ەسىگى جابىق بولسا، باسقالارىنا كىرمەي سونى اشىلعانىن كۇتەتىنىن بايقاعان.
«تەكسەرۋ بارىسىندا جينالعان دالەلدەرگە سۇيەنە وتىرىپ، مەن وسى شاحماتشىنىڭ ويىن بارىسىندا ءموبيلدى تەلەفون قولدانعانىنا تولىق سەنىمدىمىن. سونداي-اق، ول ويىن زالىن تاستاپ كەتكەندە ماعان حابارلاۋدى نەمەسە سۇرانۋدى ورىندامادى. بۇل فيدە ەرەجەلەرىن بۇزۋدى بىلدىرەدى»، — دەدى چەمپيوناتتىڭ باس سۋدياسى Chess.com سايتىنا بەرگەن سۇحباتىندا.
وقيعا تۋرالى ەسەپ، بارلىق دالەلدەرمەن بىرگە يسپانيا شاحمات فەدەراسياسىنىڭ (FEDA) سۋديالىق كوميتەتىنە جانە فيدە ەتيكالىق كوميسسياسىنا جىبەرىلدى.
كيريلل شيەۆچەنكو — 22 جاستاعى شاحماتشى. ۋكراينادا تۋعان، 2023 جىلدان بەرى رۋمىنيا ءۇشىن ويناپ ءجۇر. ول الەمدىك رەيتينگتە 69-ورىندا، 14 جاسىندا گروسسمەيستەر اتانعان.