الاياق جالعا بەرىلەتىن تۇرعىن ءۇيدى ساتىپ الۋعا “كومەكتەسەمىن” دەگەن جەلەۋمەن الماتىلىق تۇرعىنداردى 16 ملن تەڭگەدەن استام سوماعا الداپ كەتكەن.
تاعى ءبىر ايەل الاياقتىق جاساعانى ءۇشىن سوتتالدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
«ءبىر نۇسقا بويىنشا، 42 جاستاعى ج. ەسىمدى ايەل ارزانداتىلعان باعامەن جالعا بەرىلەتىن تۇرعىن ءۇي ساتىپ الۋ بويىنشا ءوز قىزمەتتەرىن ۇسىنعان. قازىرگى كەزەڭدە قىلمىستىق ءىس بويىنشا بارلىعى 7 جابىرلەنۋشى بار. الدىن الا تولەم سوماسى “قىزمەتىنە” بايلانىستى وزگەرىپ وتىرعان. كەلتىرىلگەن شىعىننىڭ جالپى سوماسى 16 ملن تەڭگەدەن اسادى»، – دەدى الاتاۋ اۋداندىق پوليسيا باسقارماسىنىڭ باستىعى تالعات بەركىنبايەۆ.
ءقازىر تەرگەۋشىلەر ماتەريالدىڭ تولىقتىعىن قامتاماسىز ەتىپ، شىندىقتى انىقتاۋعا باعىتتالعان بەتپە-بەت كەزدەستىرۋ جانە باسقا دا پروسەسسۋالدىق ارەكەتتەردى جۇرگىزىپ جاتىر. سوتقا دەيىنگى تەرگەۋ كەزەڭىندە ۇستالعان ازاماتشاعا قاتىستى قاماۋعا الۋ تۇرىندەگى بۇلتارتپاۋ شاراسى تاڭدالدى. پوليسيا قىزمەتكەرلەرى، كۇدىكتىنىڭ زاڭسىز ارەكەتىنەن زارداپ شەككەن ازاماتتاردى مىنا تەلەفون نومىرلەرى ارقىلى حابارلاسۋدى سۇرايدى: 227-55-02؛ 8-702-448-63-37. قىلمىستىق ءىستىڭ باسقا دا مالىمەتتەرى ق ر قپك-نىڭ-201 بابى جانە ق ر كونستيتۋسياسىنىڭ نورمالارىنا سايكەس جاريا ەتۋگە جاتپايدى.