الماتى قالالىق ستاتيستيكا دەپارتامەنتى قالا تۇرعىندارى مەن قوناقتارىن ساناق كەزىندە ساناقشىنىڭ اتىن جامىلعان الاياقتاردان ساق بولۋعا شاقىرادى.
سەبەبى 1 قىركۇيەكتەن باستاپ sanaq.gov.kz سايتىندا ساناق ونلاين ءوتىپ جاتىر، دەپ حابارلايدى Almaty-akshamy.kz
«ءۇشىنشى تۇلعالار تاراپىنان الاياقتىق ىس-ارەكەتتەردى بولدىرماۋ ءۇشىن ەستەرىڭىزگە سالامىز: 1 قىركۇيەكتەن باستاپ sanaq.gov.kz سايتىندا ساناق ونلاين ءوتىپ جاتىر، سونداي-اق، پىكىرتەرىم egov.kz سايتى مەن aitu قوسىمشاسى ارقىلى قولجەتىمدى. ساناق بويىنشا ينتەرۆيۋەرلەرمەن ءۇي شارۋاشىلىقتارىنا بارۋ اعىمداعى جىلدىڭ 1 قازانىندا باستالادى. حالىققا پىكىرتەرىم جۇرگىزۋ ءۇي شارۋاشىلىقتارىنا ينتەرۆيۋەر جەكە ءوزى بارعان جاعدايدا عانا جۇرگىزىلەتىن بولادى. ينتەرۆيۋەر مىندەتتى تۇردە ءتيىستى كۋالىك ۇسىنادى. ساق بولىڭىز جانە بوتەن ادامدارعا ءوزىڭىز تۋرالى دەرەكتەر ۇسىنباۋىڭىزدى سۇرايمىز»، - دەلىنگەن اتالمىش دەپارتامەنت تاراتقان حابارلامادا.