كەيىنگى جىلدارى ەلىمىزدە ازاماتتاردىڭ جەكە دەرەگىن پايدالانىپ، ولاردىڭ اتىنا زاڭسىز نەسيە رەسىمدەۋى جيىلەپ كەتتى. مۇنداي جاعدايعا تاپ بولعاندا نە ىستەۋ كەرەك؟ اتىڭىزعا نەسيە رەسىمدەلگەنىن قالاي بىلە الاسىز؟ كرەديتتىك تاريحىڭىزدى جۇيەلى تۇردە تەكسەرىڭىز، دەپ حابارلايدى aqshamnews.kz.
ەلىمىزدە ءاربىر ازامات جىلىنا ءبىر رەت كرەديتتىك تاريحىن تەگىن سۇراتا الادى. مۇنى بىرنەشە جولمەن جاساۋعا بولادى:
eGov.kz پورتالى ارقىلى. پورتالدا اۆتوريزاسيادان ءوتىپ، «جەكە كرەديتتىك ەسەپتى الۋ» قىزمەتىن تابىڭىز. ءوتىنىشتى تولتىرىپ، ونى ەلەكتروندىق سيفرلىق قولتاڭبا (ەسق) كومەگىمەن راستاڭىز.
ءبىرىنشى كرەديتتىك بيۋرو ارقىلى. 1cb.kz سايتىنا كىرىڭىز نەمەسە 1CB.kz ءموبيلدى قوسىمشاسىن پايدالانىڭىز. ەسق ارقىلى ءوتىنىم بەرىپ، كرەديتتىك تاريحىڭىزدى تەكسەرىڭىز.
حقكو-عا جۇگىنۋ ارقىلى. حالىققا قىزمەت كورسەتۋ ورتالىعىنا (حقكو) بارىپ، كرەديتتىك تاريحىڭىزدى تەكسەرۋگە بولادى. كرەديتتىك تاريحىڭىزدى ايىنا كەمىندە ءبىر رەت تەكسەرىپ وتىرعان ءجون. قايدا جۇگىنگەن ءجون؟
نەسيە رەسىمدەلگەن بانككە نەمەسە قارجى ۇيىمىنا جۇگىنىڭىز. نەسيەنىڭ قاي بانكتەن نەمەسە ميكروقارجى ۇيىمىنان الىنعانىن انىقتاڭىز. سول ۇيىمعا جازباشا ارىز بەرىپ، بۇل نەسيەنى ءسىز الماعانىڭىزدى جەتكىزىڭىز.
نەسيە كەلىسىمشارتىنىڭ كوشىرمەسىن جانە نەسيە رەسىمدەۋ كەزىندە پايدالانىلعان قۇجاتتاردى تالاپ ەتىڭىز. ەگەر جەكە كۋالىگىڭىزدى جوعالتقان بولساڭىز نەمەسە ۇرلاتىپ الساڭىز، بۇل تۋرالى انىقتامانى بانككە ۇسىنىڭىز.
پوليسياعا ارىز جازىڭىز. ىشكى ىستەر ورگاندارىنا بارىپ، الاياقتىق فاكتىسى بويىنشا ءوتىنىش بەرىڭىز. بارلىق جينالعان قۇجاتتى (بانك جاۋاپتارى، كرەديتتىك ەسەپ، جەكە كۋالىك كوشىرمەسى، ت.ب.) قوسا تىركەڭىز. ءوتىنىشىڭىزدىڭ تىركەلگەنىن راستايتىن تالون الىڭىز.
قارجى نارىعىن رەتتەۋ جانە دامىتۋ اگەنتتىگىنە شاعىمدانىڭىز. ەگەر بانك نەسيە رەسىمدەۋ دەرەگىن بەرۋدەن باس تارتسا نەمەسە جاعدايدى شەشپەسە، قارجى نارىعىن رەتتەۋ جانە دامىتۋ اگەنتتىگىنە شاعىم جازىڭىز. اگەنتتىك قارجى ۇيىمدارىنىڭ زاڭسىز ارەكەتىن تەكسەرۋگە قۇقىلى.
سوتقا جۇگىنىڭىز. ەگەر بانك نەسيەنى ەسەپتەن شىعارۋدان باس تارتسا، سوتقا ارىز بەرىپ، كەلىسىمدى جارامسىز دەپ تانۋ تۋرالى تالاپ قويا الاسىز. سوت شەشىمى شىققاننان كەيىن نەسيە بيۋروسىنا نەسيە تۋرالى جالعان اقپاراتتى الىپ تاستاۋ جونىندە ءوتىنىش جىبەرىڭىز.
ەگەر ءسىزدىڭ اتىڭىزعا الاياقتار نەسيە رەسىمدەسە، دەر كەزىندە ارەكەت ەتۋ ماڭىزدى. بانككە، پوليسياعا جانە قارجى رەتتەۋشى ورگاندارعا جۇگىنىپ، قۇقىڭىزدى قورعاڭىز. ەرتەرەك قامدانساڭىز، ماسەلەنى وڭتايلى شەشۋگە بولادى.