«قاراشا – قاۋىس، كارى-قۇرتاڭدى تاۋىس» دەگەن ۇرەيلى امال باستالدى
قاراكۇز – كۇزدىڭ اقىرعى ايى. بۇل ايدى قازەكەڭ جاماۋ-جاسقاۋ ايى دەپ اتاعان. سەبەبى، قاراشانىڭ ءار كۇنى نەمەسە ءار اپتاسى ءار ايعا ۇقسايدى.كۇز امالدارىنىڭ ءبىرازى ارتتا قالدى. وتكەن پايىمدا ايتقانداي، بۇگىننەن باستاپ «بوزقىراۋ» (بوقىراۋ) امالى باستالدى. ول قىستىڭ العاشقى نىشانى.
بۇرىنعى جۇلدىزشىلار وسى امالعا قاراپ الداعى قىستىڭ قاس- قاباعىن، مىنەزىن، بارىسىن پايىمداعان. قاراشانىڭ 10 جاڭاسىنان 15 جاڭاسىنا دەيىن جالعاساتىن وسى امال ناعىز قىراۋدىڭ ءوزى، سۋىقتىڭ كوزى.
بيىل دا وتكەن جىلعىداي، ەرەكشە تابيعات قۇبىلىسى ورىن الىپ تۇرعان جوق. ءبىرلى-جارىم جەل مەن جاۋىن-شاشىن كورىنىس بەرگەنىمەن، سالقىن، ىزعار بولعان جوق ءالى. الماتىنىڭ وزىندە بولماعانمەن، ءتوڭىرەگىنە قار ۇشقىنى، بوز قىراۋ ءتۇستى. مۇنى قازەكەڭ «الا قانات» دەپ اتاعان (ءبىر اۋماققا جاۋىپ، ءبىر اۋماققا جاۋماي جەرگە الا تۇسكەن قار). دەگەنمەن، 8 قاراشادا ۇزدىكسىز جاڭبىر جاۋىپ، سوڭى قارعا اينالدى. بۇل الماتى قالاسى مەن ءتوڭىرەگىن تۇگەل اق ۇلپاعا بولەگەن العاشقى قار بولدى. الايدا، ونىڭ ۇزاق جاتپاسى دا ايقىن...
بۇگىن قولدانىستاعى كۇنتىزبە قاراشانىڭ 10-ىن كورسەتىپ تۇر. ال اي ەسەبى بويىنشا، قاراشانىڭ 13- ءشى جۇلدىزى. قازاقى ەسەپكە (ەسكىشە) سۇيەنسەك، ايدىڭ باستالۋىنا ءالى 1 كۇن بار. الداعى اپتا وسىنداي قاربالاسى كوپ كەزگە ءدوپ كەلىپ تۇر. ونىڭ ۇستىنە جوعارىدا ايتقانىمىزداي، «بوزقىراۋ» امالى ءجۇرىپ جاتىر. «الا قانات» امالى دا كورىنىس بەردى. وسى مەزگىلدە اۋا رايىندا وزگەرىس ورىن الۋى عاجاپ ەمەس. قاباتتاسقان امالداردىڭ اسەرىنەن جاۋىن-شاشىن بولماسا دا، اسپاندى بۇلت تورلاپ، كۇن كوزىن تۇمشالايدى. كۇن دە سۋىتا باستايدى. اسىرەسە، تاڭعى سالقىن الماتىلىقتاردى دىردەك قاققىزارى ابدەن مۇمكىن...
الدا «قاۋىس»، «اق قار»، «ءۇلكەن قاراشا» بار. بۇلاردىڭ ءبارى قىستىڭ العاشقى حابارشىسى ىسپەتتى وزىمەن بىرگە قار، داۋىل، ىزعار الا كەلەتىن قاھارلى امالدار. سول سەبەپتەن، الداعى سۋىقتارعا شىدامايتىن كارى-قۇرتاڭ، كوتەرەم مالداردى سويىپ، كۇز-سوعىم جاسايدى. ەل ىشىندە «قاراشا – قاۋىس، كارى-قۇرتاڭدى تاۋىس» دەگەن ماقال ساقتالعان. قازەكەڭ قاراشا ايىن قاۋىس دەپ تە اتاعان. «قاراشا كەلمەي، قار جاۋماس» دەگەن بۇرىنعى تابيعات تامىرشىلارىنان قالعان ءتامسىل بار...
اسپان دەنەلەرىنىڭ قازىرگى قيمىل-ارەكەتىنە نازار اۋداراتىن بولساق، الداعى اپتا (10–17 قاراشا ارالىعىندا) اۋا رايى قۇبىلمالى كورىنىس كورسەتكەنىمەن، جاۋىن-شاشىنسىز وتەتىن سىڭايلى.