دەنساۋلىق ساقتاۋ ءمينيسترى اجار عينيات ىستانبۇلدا ءوتىپ جاتقان «پاندەميادان كەيىن جاھاندىق دەنساۋلىق ساقتاۋدى نىعايتۋ» تاقىرىبىنداعى دۇنيەجۇزىلىك تۇركى مەديسينالىق كونگرەسىنە قاتىستى، دەپ حابارلايدى Almaty-akshamy.kz Inform.kz-كە سىلتەمە جاساپ.
كونگرەستىڭ باستى ماقساتى – شەتەلدە تۇراتىن جانە دەنساۋلىق ساقتاۋ سالاسىندا قىزمەت ەتىپ جۇرگەن تۇركى عالىمدارىنىڭ، تۇركياداعى ارىپتەستەرىنىڭ باسىن قوسۋ ارقىلى قاتىسۋشى ەلدەردىڭ مەديسينا عىلىمىن دامىتۋ سالاسىنداعى بار الەۋەتىن ارتتىرۋ.
فورۋمنىڭ اشىلۋىندا دەنساۋلىق ساقتاۋ مينيسترلىگىنىڭ باسشىسى تۇركيا رەسپۋبليكاسىنىڭ پرەزيدەنتى رەجەپ تايىپ ەردوعان مىرزاعا، تۇركى مەملەكەتتەرى ۇيىمىنىڭ حاتشىلىعى مەن تۇركيا رەسپۋبليكاسىنىڭ دەنساۋلىق ساقتاۋ مينيسترلىگىنە كونگرەسس جۇمىسىنا قاتىسۋعا شاقىرعانى ءۇشىن العىسىن ءبىلدىردى، سونداي-اق تۇرىك حالقىن باستى ۇلتتىق مەرەكە - رەسپۋبليكا كۇنىمەن شىن جۇرەكتەن قۇتتىقتادى.
«ءبىز تۇركى مەملەكەتتەرى ۇيىمىنىڭ الاڭىندا دەنساۋلىق ساقتاۋ سالاسىنداعى ارىپتەستىكتى ودان ءارى نىعايتۋعا ەرەكشە ءمان بەرەمىز. 2021 جىلى ىستانبۇلدا وتكەن تۇركى مەملەكەتتەرى ۇيىمىنا مۇشە مەملەكەتتەر باسشىلارىنىڭ سامميتىندە قابىلدانعان «تۇركى كوزقاراسى 2040» باعدارلاماسى دەنساۋلىق ساقتاۋ ماسەلەلەرىن قامتيدى جانە دەنساۋلىقتى ساقتاۋ ءبىزدىڭ ەلدەرىمىز ءۇشىن باستى باسىمدىقتاردىڭ ءبىرى ەكەنىن تاعى ءبىر مارتە كورسەتەدى»، - دەپ اتاپ ءوتتى ا.عينيات ءوز سوزىندە.
جاھاندىق كوروناۆيرۋستىڭ قوعامنىڭ بارلىق سالالارىنا اسەرىن ەسكە سالا وتىرىپ، ول دەنساۋلىق ساقتاۋ سالاسىنداعى حالىقارالىق ىنتىماقتاستىقتىڭ ماڭىزىن اتاپ ءوتتى.
«ءبىز پاندەميا كەزىندە كورسەتكەن سەرىكتەستەرىمىزدىڭ قولداۋىن باعالايمىز جانە تۇركياعا كورسەتىلگەن گۋمانيتارلىق كومەك ءۇشىن العىس ايتامىز»، - دەپ اتاپ ءوتتى قازاقستاننىڭ دەنساۋلىق ساقتاۋ ءمينيسترى.
«ەلدەرىمىزدىڭ تاريحي دامۋى، دەنساۋلىق دەڭگەيى مەن دەنساۋلىق ساقتاۋ جۇيەسى ۇقساس. جۇمىس توپتارى مەن باستامالارعا بىرىگۋ بىزگە ورتاق ماسەلەلەردى شەشۋگە جانە بىرلەسكەن ماقساتتارعا جەتۋگە مۇمكىندىك بەرەدى. بۇل كونگرەسس جاھاندىق دەڭگەيدە دەنساۋلىق ساقتاۋدى نىعايتۋدا ماڭىزدى ءرول اتقارادى، ماماندار اراسىنداعى كاسىبي ىنتىماقتاستىقتى كەڭەيتەدى»، - دەپ تۇيىندەدى قازاقستان دەنساۋلىق ساقتاۋ مينيسترلىگىنىڭ باسشىسى.
كونگرەستىڭ باستى وقيعالارىنىڭ ءبىرى - رەجەپ تايىپ ەردوعان مىرزانىڭ ءوزى وتكىزگەن قاتىسۋشى ەلدەردىڭ دەنساۋلىق ساقتاۋ مينيسترلەرىنە «مەديسينا تاريحىنا بەيىلدىلىك» جانە «ورتاق تاريح» ماراپاتتارىن تاپسىرۋ ءراسىمى بولدى.
قازاقستان رەسپۋبليكاسى دەنساۋلىق ساقتاۋ مينيسترلىگىنىڭ باسشىسىنا تۇركيا پرەزيدەنتىنىڭ قولىنان COVID-19 ىندەتىمەن كۇرەسكە قوسقان ۇلەسى ءۇشىن ەلىمىزدىڭ مەديسينالىق عىلىمي قوعامداستىعى مەن مەديسينا قىزمەتكەرلەرىنە ارنالعان ەستەلىك مۇسىنشە تابىستالدى.
