بيىل الماتى قالاسى اكىمدىگىنە قاراستى قۇتقارۋ قىزمەتىنىڭ قۇرىلعانىنا 25 جىل تولادى. وسى ۋاقىت ارالىعىندا الماتىلىق قۇتقارۋشىلار تالاي جاننىڭ ءومىرىن اراشالاپ، ءۇمىت ۇزىلگەن ساتتەردە كومەك كورسەتتى. ولاردىڭ ءىسى كوپشىلىككە كورىنە بەرمەۋى مۇمكىن. ءبىراق توتەنشە جاعدايدا قالعان ادامدار ءۇشىن قۇتقارۋشىلار – ناعىز قاھارمان. ءبىزدىڭ بۇگىنگى كەيىپكەرلەرىمىز – الماتى قالاسى قۇتقارۋ قىزمەتىنىڭ اۆاريالىق-قۇتقارۋ توبىنىڭ ماماندارى باقىت دانابەكوۆ پەن قۋاندىق شايمەردەن. كۇن سايىن قاۋىپپەن بەتپە-بەت كەلەتىن قۇتقارۋشىلار اڭگىمە بارىسىندا وسى ءبىر سالانىڭ قيىندىقتارى مەن ەرەكشەلىكتەرى جايلى ايتىپ بەردى.
الماتى – ەلىمىزدەگى ەڭ ءىرى مەگاپوليس ءارى تاۋلى ايماقتا ورنالاسقان قالا. سوندىقتان مۇندا توتەنشە جاعدايلار ءجيى تىركەلەدى. قۇتقارۋشىلاردىڭ نەگىزگى مىندەتتەرىنىڭ ءبىرى – وسىنداي ساتتەردە تاۋدا قالعان ادامدارعا جەدەل كومەك كورسەتۋ. جىل سوڭىندا تاۋدا قازا تاپقان ءجاسوسپىرىم قىز بەن ءۇش جىگىتتىڭ وقيعاسى كوپتىڭ ەسىندە ءالى. مارقۇمداردىڭ دەنەسىن تومەنگە ءتۇسىرۋ ءۇشىن قۇتقارۋ قىزمەتى كۇردەلى وپەراسيا جۇرگىزدى. ءبىز تىلدەسكەن قۇتقارۋشىلار دا سول ىزدەۋ-قۇتقارۋ توبىندا بولعان.
قازىرگى تاڭدا الماتى قالاسىندا 131 بىرلىك اۆاريالىق-قۇتقارۋ قىزمەتى جۇمىس ىستەيدى. ديسپەچەرلەر تاۋلىگىنە «109» نومىرىنە كەلىپ تۇسەتىن 350-400 قوڭىراۋعا جاۋاپ بەرەدى. ال اۋا رايى قولايسىز كۇندەرى بۇل كورسەتكىش 1500-گە دەيىن جەتەدى. قۇتقارۋشىلار قالا اۋماعىندا دا، تاۋلى ايماقتاردا دا تاۋلىك بويى كەزەكشىلىك اتقارادى. كۇندەلىكتى كەزەكشىلىككە بىرنەشە ەكيپاجعا بولىنگەن 30 قۇتقارۋشى تۇسەدى. ءار ەكيپاجدا ءتورت قۇتقارۋشى مەن ءبىر جۇرگىزۋشى قىزمەتكە شىعىپ، كەز كەلگەن شاقىرتۋعا دايىن تۇرادى.
الەمدەگى ەڭ ءقاۋىپتى ماماندىق
ءبىرىنشى كەيىپكەرىمىز – باقىت دانابەكوۆ. ول الماتى قالاسى توتەنشە جاعدايلار دەپارتامەنتىندە، قۇتقارۋ قىزمەتىندە قۇتقارۋشى بولىپ جۇمىس ىستەيدى. سونىمەن قاتار، الماتى الپينيزم فەدەراسياسى مەن «تۇيىق-سۋ» الپلاگەرىندە الپنينيزم نۇسقاۋشىسى. قۇتقارۋ قىزمەتىنە كەلمەس بۇرىن بىرنەشە جىل الپينيزممەن اينالىسقان.
ونىڭ ايتۋىنشا، بۇل قىزمەتكە قاتاڭ ىرىكتەۋدەن وتكەن ادامدار عانا الىنادى. ارنايى وقىعان جانە دايىندىعى بار، فيزيكالىق پەن قۇتقارۋ جۇمىستارى بويىنشا، ادىستەمەلەر مەن مەديسينالىق تەوريادان اتتەستاسيا تاپسىرعان ادام قابىلدانادى. سونداي-اق، كەيبىر سپورت تۇرلەرىنەن جەتىستىگى دە بولعانى ءجون. قۇتقارۋشىنىڭ فيزيكالىق، مورالدى جانە ينتەللەكتۋالدى قاسيەتتەرى باسىم بولۋى ءتيىس.
«الپينيزممەن اينالىسىپ كەلە جاتقانىما ون ءبىر جىلدان استى. بۇل سپورت ءتۇرى ستاديوندا نەمەسە ارنايى ارەنالاردا وتەتىن سپورت ەمەس. ول – دۇنيە جۇزىندەگى ەڭ ءقاۋىپتى سپورت. سەبەبى، الپينيزم تابيعات اياسىندا، ادامعا جات، قاتال ورتادا جۇزەگە اسىرىلادى. ستۋدەنت كەزىمنەن-اق جان-دۇنيەم ءالپينيزمدى قالاپ تۇردى. ءسويتىپ، ءومىر جولىمدى وسى سپورتپەن بايلانىستىرۋعا بەل بۋدىم. الپينيست رەتىندە ءجۇرىپ، تالاي قۇتقارۋ جۇمىستارىنا قاتىستىم، سول ارقىلى مول تاجىريبە جينادىم. ءسويتىپ ءجۇرىپ وزگە دە قۇتقارۋشىلارمەن تانىستىم. اعا باپكەرلەرىمىزدىڭ باسىم بولىگى قۇتقارۋ قىزمەتىندە جۇمىس ىستەيتىن. ولارمەن قاتار ءجۇرىپ، كەڭەس الىپ وتىردىم. اقىرى، ءتورت جىل بۇرىن قۇتقارۋ قىزمەتىنە قۇتقارۋشى بولىپ ورنالاستىم»، – دەپ باستادى اڭگىمەسىن باقىت.
ءدال سول جىلدارى الماتى قالاسىنىڭ قۇتقارۋ قىزمەتىندە ۇلكەن الماتى جانە كىشى الماتى شاتقالدارىندا قۇتقارۋ-باقىلاۋ پۋنكتەرى اشىلا باستاعان ەدى. تاۋلى ايماقتا ىزدەستىرۋ-قۇتقارۋ وپەراسيالارىن جۇرگىزىپ، كۇردەلى جاعدايلاردا كاسىبي كومەك كورسەتە الاتىن ماماندارعا سۇرانىس ارتتى. باقىت تا قۇتقارۋ قىزمەتىنە قابىلدانىپ، تاۋلى ايماقتاعى قۇتقارۋ جۇمىستارىنا بەلسەنە ارالاسا باستادى. ول قۇتقارۋشىلىققا ارناعان 4 جىلىندا ءبىر ەمەس، بىرنەشە ءىرى توتەنشە جاعدايلاردا قۇتقارۋ جۇمىسىنا قاتىسىپ ۇلگەرگەن.
«بيىل قۇتقارۋ قىزمەتىنىڭ قۇرىلعانىنا 25 جىل تولادى. بۇل قىزمەت 2000 جىلداردىڭ باسىندا الپينيست، «قار بارىسى» تيتۋلىنىڭ يەگەرى رينات ءحايبۋلليننىڭ باستاماسىمەن قۇرىلدى. قۇتقارۋ قىزمەتىنىڭ ىرگەتاسىن سول كىسى قالادى. العاشقى قۇتقارۋشىلاردىڭ دەنى كاسىبي الپينيستەردەن قۇرالدى. سول كەزدەگى اعا بۋىن الپينيستەر ءبىزدى تاربيەلەدى، تاۋعا باۋلىدى. ءبىز سول كىسىلەردىڭ جولىن جالعاپ كەلەمىز»، – دەيدى ول.
«ءتىپتى، ساقيناسىن شەشۋگە شاقىرادى»
قۇتقارۋ قىزمەتىنىڭ نەگىزگى باعىتتارى تەك تاۋداعى جۇمىستارمەن شەكتەلمەيدى. كەيىنگى كەزدەرى بۇقارالىق اقپارات قۇرالدارى مەن الەۋمەتتىك جەلىلەردە كوبىنە تاۋدا جۇرگىزىلەتىن قۇتقارۋ وپەراسيالارى ءجيى جاريالانىپ ءجۇر. الايدا، قۇتقارۋ قىزمەتىنىڭ قالا اۋماعىنداعى ەڭبەگى دە ەلەۋلى ەكەنىن اتاپ وتكەن ءجون. الماتىلىق قۇتقارۋشىلار جول-كولىك وقيعالارى كەزىندە زارداپ شەككەندەردى كولىكتەن شىعارۋ، ءورت ءسوندىرۋ بارىسىندا ءورت سوندىرۋشىلەرگە كومەك كورسەتۋ جۇمىستارىنا تۇراقتى تۇردە اتسالىسادى. سونىمەن قاتار، قالا اۋماعىندا تەحنوگەندىك سيپاتتاعى توتەنشە جاعدايلار كەزىندە، ياعني عيماراتتار مەن ءتۇرلى نىساندارداعى قۇلاۋ ءقاۋپى بار قۇرىلىمداردى جويۋ دا قۇتقارۋ قىزمەتىنىڭ مىندەتىنە كىرەدى. ءتىپتى، كەيدە تۇرعىندار قولىنداعى ساقيناسى شەشىلمەي قالسا دا، قۇتقارۋشىلاردى كومەككە شاقىرادى ەكەن.
قۇتقارۋشىنىڭ ايتۋىنشا، قالاداعى شاقىرتۋلاردىڭ باسىم بولىگى كىشكەنتاي بالالارعا قاتىستى بولادى. بالالار پاتەردىڭ نەمەسە بولمەنىڭ ەسىگىن ىشىنەن جاۋىپ الىپ، اتا-انالارى كىرە الماي قالعان جاعدايلار ءجيى كەزدەسەدى. سونداي-اق، جاسى ۇلكەن ازاماتتاردى جەدەل جاردەم كولىگىنە دەيىن جەتكىزۋ بويىنشا دا كومەك سۇرايدى.
جاز – ەڭ قاربالاس مەزگىل
«ءسويتىپ، ءبىر تاۋلىك بويى ءتۇرلى شاقىرتۋلارعا بارامىز. الماتى تاۋلارىنا كەلگەن تۋريستەردىڭ كوبى ۇلكەن الماتى كولىنە نەمەسە ۇلكەن الماتى شىڭىنا باعىت الادى. تاۋعا شىعۋدا تاجىريبەسى از ادامدار قيىن جاعدايعا تاپ بولىپ، اداسىپ قالاتىن كەزدەر ءجيى كەزدەسەدى. وكىنىشكە قاراي، ۇلكەن الماتى شاتقالىندا تۋريستەر نەمەسە الپينيستەردىڭ جوعالىپ، اداسىپ كەتۋ فاكتىلەرى دە ارا-تۇرا تىركەلىپ تۇرادى. ءبىر مەزگىلدە عانا جۇمىسىمىز قىزا تۇسەدى دەپ ايتۋ قيىن، ارينە. ويتكەنى، ءبىزدىڭ جۇمىس جىل ون ەكى اي دامىلسىز جالعاسا بەرەدى. تاۋداعى توتەنشە جاعداي جىلدىڭ ءتورت مەزگىلىندە دە ورىن الادى. ءبىراق جازدا اۋا رايى قولايلى بولعاندىقتان، تاۋعا شىعاتىن تۋريستەر سانى ارتادى. ىزدەستىرۋ-قۇتقارۋ جانە ەۆاكۋاسيالىق جۇمىستارىمىز جازدا ايتارلىقتاي كوبەيەدى»، – دەدى قۇتقارۋشى.
قۇتقارۋ – اقپارات جيناۋدان باستالادى
قىس پەن كوكتەم ايلارىندا قار كوشكىنى ءقاۋپى كۇشەيسە، جازدا سۋ دەڭگەيىنىڭ كوتەرىلۋى مەن ورمان ءورتى ارتادى. كۇز مەزگىلىندە اۋا رايىن ەسكەرمەي تاۋعا شىعىپ اداسۋ، قاراڭعىدا قالىپ قويۋ جاعدايلارى ءجيى تىركەلەدى. وسىلايشا جىل ون ەكى اي بويى تاۋدا دا، قالادا دا قۇتقارۋ قىزمەتىنىڭ جۇمىسى ۇزدىكسىز جالعاسىپ جاتادى. ءبىر سوزبەن ايتقاندا، قۇتقارۋشىلار ءۇشىن جۇمىستىڭ توقتايتىن مەزگىلى جوق.
قۇتقارۋ جۇمىستارى الدىمەن اقپارات جيناۋدان باستالادى، دەيدى ول. قانشا ادام جوعالدى، قاي ايماقتا، قانداي جاعداي بولۋى مۇمكىن – بارلىعى ساراپتالادى. اقپارات تەكسەرىلگەن سوڭ، كۇن-تۇن دەمەي ەكيپاج تاۋعا جىبەرىلەدى. ەگەر ناتيجە بولماسا، كوورديناسيالىق شتاب قۇرىلىپ، بىرنەشە قۇتقارۋ توبى ءارتۇرلى باعىتتا جۇمىس ىستەيدى. ىزدەستىرۋ، قۇتقارۋ جانە تاسىمالداۋ توپتارى قاجەت جاعدايدا بىرىگەدى.
«قۇتقارۋشىلار ەڭ الدىمەن فيزيكالىق قيىندىقتارعا تاپ بولادى. ويتكەنى، ءبىز دە ادامبىز، تەمىردەن جارالعان جوقپىز، ۇشا دا المايمىز. ارينە، سپورتپەن شۇعىلدانامىز، فيزيكالىق جاعىنان جاقسى دايىندىقتان وتەمىز، ءبىراق سوعان قاراماستان، شارشايتىن كەزدەر بولادى. تاۋلى ايماقتا جۇمىس ىستەۋ وڭاي ەمەس. ەڭ ماڭىزدىسى بيىكتىككە بەيىمدەلۋ كەرەك. 2000-نان 4000 مەترگە دەيىنگى بيىكتىككە دايىندىقسىز شىعۋ وتە ءقاۋىپتى. كوبى وسىنى ەسكەرمەيدى. ونىڭ ۇستىنە، بۇل ءجاي سەرۋەن ەمەس. قۇتقارۋشى وزىمەن بىرگە ارنايى قۇرال-جابدىقتاردى كوتەرىپ جۇرەدى. ءار تاۋدىڭ، شىڭداردىڭ جارتاسى ءارتۇرلى بولادى، بىر-بىرىنە ۇقسامايدى. اداسىپ قالماس ءۇشىن تاۋدىڭ ءار نۇكتەسىن جاتقا ءبىلۋىمىز شارت. باسقا قۇتقارۋشىلارمەن ۇنەمى بايلانىستا بولامىز. قۇتقارۋ جۇمىستارى جۇرگىزىلەتىن اۋماقتى جاقسى باعدارلاي ءبىلۋ دە وتە ماڭىزدى. «قۇتقارۋشى ەشتەڭەدەن قورىقپاۋى كەرەك» دەۋ ارتىق بولار، ويتكەنى قورىقپايتىن ادام جوق. ءبىراق ەڭ باستى قاعيدا – جەكە قاۋىپسىزدىكتى ساقتاۋ. ەگەر قۇتقارۋشىنىڭ ءوزى قاۋىپ-قاتەرگە تاپ بولسا، وندا قۇتقارۋ جۇمىسىنىڭ ءمانى دە جوعالادى. وسى جاۋاپكەرشىلىكتىڭ بارلىعى مويىنعا ارتىلعاننان كەيىن، بۇل قىزمەتتىڭ قانشالىقتى اۋىر ەكەنىن تۇسىنەسىڭ»، – دەيدى كەيىپكەرىمىز.
بۇل تەك فيزيكالىق تۇرعىدان عانا ەمەس، مورالدىق ءارى پسيحولوگيالىق جاعىنان دا وتە قيىن جۇمىس. باسقا بىرەۋدىڭ ءومىرىن ساقتاپ قالۋ ءۇشىن قاۋىپكە باس تىگۋ – ناعىز ەرلىكپەن پارا-پار ءىس.
ءسوزىمىزدىڭ باسىندا تاۋدا قازا تاپقان ءۇش جىگىتتىڭ دەنەسىن تومەنگە ءتۇسىرۋ بويىنشا جۇرگىزىلگەن ىزدەۋ-قۇتقارۋ وپەراسياسىنا كەيىپكەرلەرىمىزدىڭ دە قاتىسقانىن اتاپ وتكەن ەدىك. وسى وقيعاعا قاتىستى قويىلعان سۇراققا باقىت دانابەكوۆ جاۋاپ بەرۋدىڭ ءوزى وڭاي ەمەس ەكەنىن جاسىرمادى.
«بۇل – مەنىڭ تاجىريبەمدەگى ەڭ اۋىر ساتتەردىڭ ءبىرى بولىپ ەستە قالدى. قۇتقارۋ وپەراسياسى بارىسىندا تىكۇشاقپەن ۇشىپ، العاشقى ىزدەستىرۋ توبىنىڭ قۇرامىندا بولدىم. سول ساتتە ءبىرىنشى جىگىتتىڭ دەنەسىن تاپتىق. قىزمەت بارىسىندا تالاي قيىن جاعدايدى كوردىك، ءبىراق مۇنداي ساتكە دايىن بولۋ مۇمكىن ەمەس. بۇل وپەراسيا بىردە-بىر قۇتقارۋشىعا وڭاي تيگەن جوق. ءار قيمىلىمىزعا ۇلكەن جاۋاپكەرشىلىكپەن قاراپ، بارىنشا سالقىنقاندىلىق ساقتاۋعا تىرىستىق. مارقۇمداردىڭ دەنەسىن تۋىستارىنا جەتكىزۋ مىندەتىمىز بولدى»، – دەدى ول.
قۇتقارۋشىعا كەرەگى – ادامگەرشىلىك پەن ءتوزىم
قۇتقارۋشى ەستە قالعان تاڭعاجايىپ وقيعالاردى دا تىلگە تيەك ەتتى.
«ەستە قالعان قۇتقارۋ وپەراسيالارى كوپ. 2024 جىلدىڭ اقپان ايىندا فۋرمانوۆ شىڭىندا اداسقان ءۇش ءجاسوسپىرىمدى ءتۇنى بويى ىزدەدىك. اياز قاتتى بولدى. تاڭعا جۋىق بالالار ءتىرى تابىلدى. ولاردىڭ امان ەكەنىن كورگەندە، ارقامىزدان ۇلكەن ءبىر جۇك تۇسكەندەي بولدى. قانداي جاعداي بولسا دا، ءبىز ءاردايىم «بالكىم، ءتىرى شىعار» دەگەن ۇمىتپەن ىزدەۋگە شىعامىز. تەحنيكادان بۇرىن جەكە تاجىريبەگە كوبىرەك سەنگەن ابزال دەپ سانايمىن. ويتكەنى، قۇرال-جابدىق پەن تەحنيكا ۇنەمى ءمىنسىز جۇمىس ىستەمەيدى. ءارتۇرلى جاعدايعا دايىن بولۋىمىز كەرەك. ونداي ساتتەردە تەك ءوز تاجىريبەڭە سەنۋگە تۋرا كەلەدى. قۇتقارۋشى ءۇشىن ەڭ باستى قاسيەت – ادامگەرشىلىك. ادام ءومىرىن ساقتاپ قالۋ ميسسياسى بارىنەن بيىكتە تۇرادى. ومىرگە اراشا ءتۇسۋ، ادام تاعدىرىن ساقتاپ قالۋ ميسسياسى. قۇتقارۋشى – تەك ماماندىق ەمەس، ول – مارتەبە، ستاتۋس».
تاقىرىپقا وراي
قۋاندىق شايمەردەن، الماتى قالاسى قۇتقارۋ قىزمەتىندە قۇتقارۋشى الپينيست:
تاۋ – ءومىردىڭ ءقادىرىن ۇقتىرادى
قۇتقارۋشى ماماندىعى – مارتەبەلى ماماندىق. قانشاما ەلدىڭ العىسىن الاسىڭ. ءبىراق كەز كەلگەن ادام قۇتقارۋشى بولا المايدى. نەگىزى بۇعان دەيىن جانساقتاۋ بولىمىندە مەديك بولىپ جۇمىس ىستەدىم، سونداي-اق ونكولوگيالىق ورتالىقتا اۋىر جاعدايداعى ناۋقاستارعا كومەك كورسەتەتىن پاللياتيۆتىك توپتا تاجىريبە جينادىم. سول تاجىريبە ماعان ءومىردى جانە ادامنىڭ باسىنا تۇسكەن قيىندىقتاردى باعالاۋدى ۇيرەتتى. ءقازىر قۇتقارۋشى- الپينيست رەتىندە سول داعدىلارىمدى تاۋدا جانە قالادا توتەنشە جاعدايلاردا قولدانامىن. ال قۇتقارۋشى بولۋ – ارمانىم بولدى. بۇل قىزمەتكە ەرەكشە قۇمارلىقپەن كەلدىم. مەن ءۇشىن ماماندىق ەمەس، بورىش، ناعىز ەرلەردىڭ ءىسى. سوندىقتان وسىدان ءبىر جىل بۇرىن جەدەل-قۇتقارۋ جاساعىنا جۇمىسقا تۇردىم. ءارى تاۋعا دەگەن ماحابباتىم دا بۇل تاڭداۋدى جاساۋىما ۇلكەن سەبەپ بولعان شىعار.
جۇمىس كۇنىمىز تاڭ اتپاستان باستالادى، ساعات 8-دە اۋىسىم بولادى، ساپقا تۇرامىز. باسشىلىق قۇتقارۋشىلاردىڭ جۇمىسقا دايىن ەكەنىن تەكسەرىپ بولعان سوڭ، جاتتىعۋعا ارنالعان ورىنعا وتەمىز. اۋىسىم باسقارۋشىسىنىڭ باقىلاۋىمەن دەنە قىزدىرۋ جاتتىعۋلارىن جاسايمىز. سودان سوڭ ءار ەكيپاج ءوز ورىندارىندا كەزەكشىلىكتى جالعاستىرادى.
ءبىزدىڭ قىزمەتتە قاتەلىككە ورىن جوق. قۇتقارۋشىلاردىڭ بىلىكتىلىگىن ارتتىرۋ، فيزيكالىق جانە پسيحولوگيالىق دايىندىقتارىنا ەرەكشە ءمان بەرىلەدى. مەن ءوزىم قۇتقارۋشى الپينيست بولعاندىقتان، الپينيزم نۇسقاۋشىلارىنىڭ باقىلاۋىمەن جارتاسقا ورمەلەۋ، زارداپ شەگۋشىنى تاسىمالداۋ، جارتاستان تومەن ءتۇسىرۋ سياقتى جۇمىستاردى ۇنەمى قايتالاپ پىسىقتاپ وتىرامىن. سونىمەن قاتار، الپينيزمنان سپورتتىق كاتەگوريالاردى ارتتىرۋ ماقساتىندا جۇيەلى تۇردە وقۋ-جاتتىعۋ جيىندارى وتەدى. ءبىز تاجىريبە ارتتىرۋ ءۇشىن قيىندىق ساناتى جوعارى شىڭدارعا ورمەلەيمىز.
مەن الماتى قالاسى الپينيزم فەدەراسياسى مەن Kazmountclub الپينيزم سەكسياسىنىڭ سپورتشىسىمىن. قازىرگى تاڭدا تاۋعا قىزىعۋشىلار سانى ارتىپ كەلەدى. ءبىراق وكىنىشكە قاراي، تاۋدىڭ سالعىرتتىقتى كەشىرمەيتىنىن ءبارى تۇسىنە بەرمەيدى. سوندىقتان مەن ءارقاشان تاۋدا قاۋىپسىزدىك تالاپتارىن ەسكەرۋگە كەڭەس بەرەمىن. مىندەتتى تۇردە الپينيزم نەمەسە تاۋ تۋريزمى مەكتەپتەرىندە ءبىلىم الۋ كەرەك. ءبىراق ول مەكتەپتە وقۋ – تاۋعا شىعۋ ءۇشىن جەتكىلىكتى دەگەن ءسوز ەمەس. ەڭ باستىسى – ەشقانداي تاۋ نەمەسە قىزىعۋشىلىق ءسىزدىڭ ومىرىڭىزدەن، دەنساۋلىعىڭىزدان ارتىق ەمەس ەكەنىن ءتۇسىنۋ. ەڭ كەرەمەت شىڭ – ۇيگە امان ورالۋ.
قۇتقارۋ قىزمەتى تەك تاۋدا عانا ەمەس، قالادا دا ماڭىزدى قىزمەت اتقارادى. كولىك اپاتتارى، عيماراتتارداعى قاۋىپ-قاتەرلەر، ءورت، سۋداعى توتەنشە جاعدايلار كەزىندە دە ءبىز اتسالىسامىز. «ۇلتقا قىزمەت – ۇلى مىندەت»، سوندىقتان ءومىرىمىز كەيدە قىل ۇستىندە تۇرسا دا، حالىققا قىزمەت ەتەمىز.
ەلىمىزدە دە، الەمدە دە توتەنشە جاعدايلار ازايسىن، ال ادال قۇتقارۋشىلاردىڭ ابىرويى اسقاق بولسىن!
ءتۇيىن: قۇتقارۋشىلار تاۋلىك بويى حالىق ءۇشىن دەپ كوپ قىرلى قۇتقارۋ قىزمەتىن اتقارادى. ءومىر مەن ءولىم اراسىنداعى تاعدىرشەشتى ساتتە كوزسىز باتىرلىققا بارىپ جۇرگەن جانداردىڭ جانقيارلىعى ءۇشىن ريزاشىلىعىمىزدى بىلدىرەمىز جانە ىستەرىنە ساتتىلىك تىلەيمىز!