Almaty-akshamy.kz سايتىنىڭ بۇگىنگى جاڭالىقتارىنا شولۋ – كۇن كەرۋەنى
بوكسشىلار العان بەس جولداما
يتاليانىڭ بۋستو-ارسيسيو قالاسىندا بوكستان پاريج وليمپياداسىنىڭ ليسەنزياسى ۇلەستىرىلەتىن الەمدىك تۋرنير ءوز مارەسىنە جەتتى. قازاقستان قۇراماسىنىڭ ەرلەر جانە ايەلدەر اراسىنداعى 11 بوكسشىسى (6 ەر، 5 ايەل) قاتىسىپ، ۇلتتىق قۇراما قورجىنىنا پاريج وليمپياداسىنىڭ بەس جولداماسىن سالدى. وكىنىشكە قاراي، ايەلدەر قۇراماسى ليسەنزياعا قول جەتكىزە المادى.
نۇرلان يمام نە دەيدى؟
نۇرلان يمام بايجىگىت ۇلى ورازا ۇستاعان ادام سارەسىنە ۇيىقتاپ قالسا نە ىستەۋى كەرەگىن ءتۇسىندىردى
«سارەسىنە ۇيىقتاپ قالدىڭىز، ۋاقىتى شىعىپ كەتىپتى: كەشە جاساعان نيەتىڭىزدى بۇگىن قايتادان ايتىڭىز. سۋ ءىشۋدىڭ قاجەتى جوق. ۋاقىتى كىرسە جالعاستىرا بەرەسىز. ەگەر ۋاقىتى كىرمەي، ساناۋلى مينۋتتار قالسا نيەتىڭىزدى ايتىپ، سۋمەن بەكىتىپ قويساڭىز بولادى. كوپ ادام سۋمەن بەكىتىلىپ، سۋمەن اشىلادى دەپ ويلايدى ەكەن. جوق، ورازا ۋاقىتىمەن اشىلىپ، ۋاقىتىمەن جابىلادى. سارەسى تاماق ىشپەي، كەشكە دەيىن جۇرگەننەن كەيىن ادامنىڭ اسقازانى تارتىلىپ قالىپ، سول كەزدە جۇمساقتاپ ءتاتتى نارسە جەپ نەمەسە سۋ ءىشۋ - دەنساۋلىققا پايدالى»، - دەدى يمام.
مەدكىتاپشا دا ونلاين بولماق
كەلەسى جىلدىڭ باسىنان باستاپ ازاماتتاردىڭ جەكە مەديسينالىق كىتاپشالارى (جمك) تولىعىمەن ونلاين-فورماتقا كوشەدى، بۇل ازاماتتارعا مەديسينالىق تەكسەرۋدەن ءوتۋ ۋاقىتىن قىسقارتۋعا مۇمكىندىك بەرەدى، جۇمىسقا جىبەرۋ تۋرالى ءمورتابان الۋ ءۇشىن تەراپيەۆتكە قايتا بارۋ قاجەتتىلىگىن بولدىرمايدى.
قالدىقتىڭ دا قاجەتى بار
ق ر ەكولوگيا مينيسترلىگى مالىمدەۋىنشە، بىلتىر ەلىمىزدە 1 ملن توننادان استام قالدىق وڭدەلگەن.
«2023 جىلى ەلىمىزدە 4،1 ملن تونناعا جۋىق كوممۋنالدىق قالدىقتار تۇزىلگەن. ونىڭ 1 ملن تونناسى سۇرىپتالىپ، قايتا وڭدەلدى. قوقىستى شىعارۋ قىزمەتىمەن ەلىمىزدىڭ 80%-عا جۋىق حالقى تۇراتىن قالالار مەن ءىرى ەلدى مەكەندەر قامتاماسىز ەتىلگەن. كوممۋنالدىق قالدىقتاردىڭ مورفولوگيالىق قۇرامى شامامەن 70% پايدالى فراكسيالاردان تۇرادى، اتاپ ايتقاندا 16% پلاستيك، 11% ماكۋلاتۋرا، 9% شىنى، 37% ورگانيكالىق قالدىقتار، 27% تاعى باسقالارى»، دەدى ەكولوگيا ءمينيسترى ەرلان نىسانبايەۆ ۇكىمەت وتىرىسىندا.
37 زاۋىت ىسكە قوسىلادى
ق ر پرەمەر-مينيسترى ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا ءىرى قالالاردا قاتتى تۇرمىستىق قالدىقتاردى قايتا وڭدەۋ زاۋىتتارىن سالۋ ماسەلەسى قارالدى.قاتتى تۇرمىستىق قالدىقتاردى قايتا وڭدەۋ بويىنشا جالپى قۋاتتىلىعى جىلىنا 1،2 ملن توننادان اساتىن جاڭا 37 زاۋىت سالۋ جانە جۇمىس ىستەپ تۇرعان 8 زاۋىتتى جاڭعىرتۋ جوسپارلانىپ وتىر. بۇل وڭدەۋ كولەمىن جىلىنا 1،4 ملن تونناعا دەيىن ارتتىرۋعا مۇمكىندىك بەرەدى.
اپۆ ۆاكسيناسى كىمگە سالىنادى؟
ادام پاپيللوماسى ۆيرۋسىنا (اپۆ) قارسى ۆاكسينا 15 جىلدان استام ۋاقىت بويى قولدانىلىپ كەلەدى. قازاقستاندا اپۆ-عا قارسى ۆاكسيناسيالاۋ جۇرگىزۋ 2024 جىلدىڭ ءۇشىنشى توقسانىنا جوسپارلانعان. ددۇ ۇسىنىمىنا سايكەس اپۆ-عا قارسى ۆاكسيناسيالاۋ ءۇشىن قاجەتتى توپ-9-14 جاس ارالىعىنداعى قىزدار.
قۇلاقسىز قالدىرعان قۇلاققاپ
قىتايدا ەكى جىل بويى قۇلاققاپپەن ۇيىقتاۋدى ادەت ەتكەن ايەل ەستۋ قابىلەتىنەن ايىرىلدى. ۆانگ ەسىمدى ايەل ەستۋ قابىلەتى ناشارلاعانىن بايقاپ، قۇلاعىن تەكسەرۋ ءۇشىن اۋرۋحاناعا باردى. ناۋقاستىڭ سول قۇلاعىندا نيەۆرولوگيالىق ەستۋ قابىلەتىنىڭ زاقىمدانۋى بايقالعان.
اجال شاحتاسى
قاراعاندى وبلىسىنداعى «ساران» شاحتاسىنىڭ 43 جاستاعى كەنشىسى قۇرىلعىنى مونتاجداۋ كەزىندە اۋىر جاراقات الىپ، سالدارىنان قايتىس بولعان. قايعىلى وقيعا 12 ناۋرىز كۇنى تۇندە كومپانيانىڭ كومىر دەپارتامەنتىنە قاراستى "ساران" شاحتاسىندا مونتاجداۋ جۇمىسىنىڭ ارنايى جابدىقتى جوندەۋ كەزىندە بولعان.
الماتىنى قار باسادى
سينوپتيكتەر وسىلاي دەپ وتىر. مامانداردىڭ بولجاۋىنشا، قالادا 2024 جىلدىڭ 13 ناۋرىزىندا قولايسىز اۋا رايى بولادى. وسىعان بايلانىستى الماتى قالالىق توتەنشە جاعدايلار دەپارتامەنتى قالا تۇرعىندارى مەن قوناقتارىنا ماڭىزدى ەسكەرتۋ جاسادى.
تاۋلى ايماقتارعا سەرۋەندەۋدى اۋا رايى قولايلى بولعانشا كەيىنگە قالدىرعان دۇرىس.
يسلام الەمى مويىنداعان حيۋا
وزبەكستاننىڭ حيۋا قالاسىنا يسلام الەمىنىڭ تۋريستىك شاھارى مارتەبەسى بەرىلدى. مۇنى ايعاقتايتىن ارنايى سەرتيفيكاتتى يسلام ىنتىماقتاستىعى ۇيىمىنىڭ باسشىلىعى تابىس ەتتى. ەكى جىل بۇرىن ۇيىمعا مۇشە ەلدەردىڭ سەسسياسىندا حيۋا، ءابۋ-دابي، شانلىۋرفا، لاگوس پەن دۋشانبە «2024 جىلعى يسلام الەمىنىڭ تۋريستىك شاھارى» مارتەبەسىنە ۇسىنىلعان. ورتا ازياداعى بەس قالانىڭ ىشىنەن حيۋا لايىق دەپ تانىلدى.