الماتى قالاسىنىڭ ناۋرىزباي اۋدانىنا قاراستى مەكتەپ وقۋشىلارى مەن مۇعالىمدەرى زايليي الاتاۋىنىڭ بوكتەرىندە ورنالاسقان ايۋساي شاتقالىندا ەكولوگيالىق سەنبىلىك وتكىزىپ، 2،5 توننا قوقىس جينادى. بۇل تۋرالى Aqshamnews.kz سايتى حابارلايدى.
«تازا قازاقستان» جانە «پاركتەر شەرۋى – 2025» اكسيالارى اياسىندا ۇيىمداستىرىلعان بۇل شاراعا 500-دەن استام وقۋشى مەن ۇستاز قاتىستى. ءىس-شارانى الماتى قالاسى ءبىلىم باسقارماسى ءۇيىمداستىردى.
سەنبىلىك بارىسىندا مەكتەپ وقۋشىلارى 3 گەكتار اۋماقتى قوقىستان تازارتىپ، تابيعاتتى ايالاۋدىڭ ماڭىزدىلىعىن ءىس جۇزىندە كورسەتتى. 8 «ا» سىنىپ وقۋشىسى قالدىبەك ميراس پەن ەكوۇيىم جەتەكشىسى جاقىپاقىن شىنار نۇرداۋلەت قىزىنىڭ ايتۋىنشا، بۇل اكسيا تابيعاتقا تۇتىنۋشىلىق كوزقاراسقا قارسى شىققان، سانالى ۇرپاقتىڭ ۇندەۋى بولدى.
ناۋرىزباي اۋدانىنىڭ ءبىلىم ءبولىمىنىڭ باسشىسى سالتانات قۇسايىنوۆا شاتقالدىڭ الماتى قالاسىنىڭ شەگىندە ورنالاسقانىمەن، تابيعي سۇلۋلىعى مەن بيولوگيالىق ارتۇرلىلىگىمەن ەرەكشە ورىن ەكەنىن اتاپ ءوتتى.