جەتىسۋ اۋدانىنا قاراستى №43 جالپى ءبىلىم بەرەتىن مەكتەپ اۋلاسى مەرەكەدەگىدەي بەزەندىرىلگەن، دەپ حابارلايدى اlmaty-akshamy.kz.
اۋلاعا كىرگەن ساتتە-اق كۇمبىرلەگەن كۇي بويدى الىپ، ۇلكەن ءبىر دۋماندى سالتاناتتىڭ بولىپ جاتقانىن ايشىقتاي تۇسكەندەي. اتالمىش مەكتەپكە ورنالاسقان №343 سايلاۋ ۋچاسكەسىنە كەلىپ، ءوز داۋسىن بەرىپ جاتقان ادامداردىڭ قاتارى دا جيىلەي تۇسكەن.
– ءوز جۇمىسىمىزدى تاڭعى 6.00-دە باستادىق. ءانۇران ورىندالىپ بولعان سوڭ، باقىلاۋشىلاردى تىركەدىك. ەڭ العاشقى داۋىس بەرۋشىمىز سەرىك سارچايەۆ ساعات 7.00-دە كەلدى. قالىپتاسقان ءداستۇر بويىنشا، بەلسەندىلىگى ءۇشىن تۇرعىنعا ەستەلىككە قويىن داپتەر سىيلادىق. جالپى، ءبىزدىڭ №343 سايلاۋ ۋچاسكەسىندە 2357 سايلاۋشى بار. العاشىندا كەلۋشىلەر قاتارى سيرەك بولعانىمەن، ءتۇس اۋا سايلاۋشىلار قاتارى ارتتى. بەلسەندىلىك تانىتىپ جاتقاندار نەگىزىنەن ەرەسەك، ورتا جاستاعى ادامدار. سونداي-اق، بۇل جولى جاسى كەلگەن 7 ادام ءوز وتىنىشتەرى بويىنشا ۇيدەن داۋىس بەردى. ءبىز ءۇشىن عانا ەمەس، بۇكىل قالا جۇرتشىلىعى ءۇشىن 107 جاستاعى قانشا جاقسىبايەۆانىڭ ءوز قالاۋىمەن سايلاۋ ۋچاسكەسىنە كەلىپ، داۋىس بەرگەنى ايتۋلى وقيعا بولدى، - دەيدى №343 سايلاۋ ۋچاسكەسىنىڭ ءتورايىمى عاليا الكەن قىزى.
ەكى عاسىردىڭ كۋاسى بارشا قاۋىمعا اق باتاسىن بەردى. №343 سايلاۋ ۋچاسكەسى ەڭ قارت سايلاۋشىنىڭ يىعىنا شاپان جاۋىپ، قۇرمەت كورسەتتى.