قاسىم-جومارت توقايەۆ قازاقستاندىقتاردى جەڭىس كۇنىمەن قۇتتىقتادى
مەملەكەت باسشىسى قاسىم-جومارت توقايەۆ قازاقستاندىقتاردى جەڭىس كۇنىمەن قۇتتىقتادى، دەپ حابارلايدى اlmaty-akshamy.kz اقورداعا سىلتەمە جاساپ.
مەملەكەت باسشىسى قاسىم-جومارت توقايەۆتىڭ جەڭىس كۇنىمەن قۇتتىقتاۋى
قىمباتتى وتانداستار!
سىزدەردى جەڭىس كۇنىمەن شىن جۇرەكتەن قۇتتىقتايمىن! بۇل – ەلىمىزدىڭ تاريحىندا ايرىقشا ورنى بار مەرەكە. سونداي-اق بەيبىتشىلىك پەن بوستاندىق ءۇشىن كۇرەسكەن اعا بۋىننىڭ جانقيارلىعىن، قاجىماس قايراتى مەن ەرىك-جىگەرىن ايگىلەيتىن مەيرام.
سۇراپىل سوعىس جىلدارىندا وتانداستارىمىز قايسارلىق پەن قاھارماندىقتىڭ تەڭدەسسىز ۇلگىسىن تانىتتى. مايدانعا اتتانعان جاۋىنگەرلەرىمىزدىڭ تەڭ جارتىسى ۇرپاقتىڭ بولاشاعى ءۇشىن جانىن پيدا ەتتى. جەڭىسكە تىل ەڭبەككەرلەرى دە ولشەۋسىز ۇلەس قوستى. ولار ەل باسىنا كۇن تۋعاندا حالقىمىزدىڭ جۇدىرىقتاي جۇمىلا بىلەتىنىن ەرەن ەڭبەگىمەن دالەلدەدى.
سوعىستا وپات بولعان بوزداقتارىمىزدىڭ رۋحىنا تاعزىم ەتىپ، ارداگەرلەرىمىزگە لايىقتى قۇرمەت كورسەتۋ – ءبىزدىڭ پەرزەنتتىك بورىشىمىز. ءبىز بۇگىنگى بەيبىت ءومىرىمىز ءۇشىن جەڭىمپاز اعا بۋىنعا قارىزدارمىز. ولاردىڭ وشپەس ەرلىگى – كەيىنگى ۇرپاققا ۇلگى-ونەگە. مايدانگەرلەرىمىز جان اياماي قورعاعان ازاتتىق، ادىلدىك، تەڭدىك قۇندىلىقتارى ادىلەتتى قازاقستان ءۇشىن دە مىزعىماس تەمىرقازىق بولىپ قالا بەرەدى.
بارشاڭىزعا زور دەنساۋلىق، باق-بەرەكە تىلەيمىن! ارداگەرلەرىمىز امان بولسىن! جەڭىس كۇنى قۇتتى بولسىن!