«ايمان-شولپان» مۋزىكالىق كومەدياسى وتەدى

قويىلىمدا كوپشىلىك ساحنالارى مەن حالىق اندەرى  ءداستۇرلى ونەرىمىزدىڭ ايقىن كورىنىستەرىنەن سىر شەرتەدى

8 - ماۋسىم كۇنى الماتىداعى «الاتاۋ» ءداستۇرلى  ونەر تەاترىنىڭ ساحناسىندا م.اۋەزوۆتىڭ 125 جىلدىق مەرەيتويىنا وراي «ايمان-شولپان» اتتى مۋزىكالىق كومەدياسىنىڭ پرەمەراسى وتەدى، دەپ حابارلايدى Almaty-akshamy.kz اتالعان تەاتردىڭ باسپا ءسوز قىزمەتىنە سىلتەمە جاساپ.

 رەجيسسەرى جۇلدىزبەك جۇمانباي. م. اۋەزوۆتىڭ 1956 جىلى جازىلعان «ايمان-شولپان» اتتى مۋزىكالىق كومەدياسىنىڭ ەكىنشى نۇسقاسىنا نەگىزدەلگەن قويىلىمدا ۇلتتىق ويىندار مەن حورەوگرافيا سپەكتاكلدىڭ كوركەمدىك تۇتاستىعىن ساقتايدى.  

سونىمەن قاتار قويىلىمدا كوپشىلىك ساحنالارى مەن حالىق اندەرى  ءداستۇرلى ونەرىمىزدىڭ ايقىن كورىنىستەرىنەن سىر شەرتەدى. بۇگىنگى ۇلتتىق رۋحىمىزدىڭ قايتا جاڭعىرۋى تۇسىندا كوركەمدىك سيپاتى حالىقتىڭ ءسالت-داستۇر بوياۋىمەن ارلەنگەن قويىلىم جانر تالابىنا ساي جەڭىل ءازىل، ماحاببات شيەلىنىسىن، كەيىپكەرلەر مىنەزدەرىن، جەڭىل مۋزىكالىق اۋەنمەن وقيعالار بايلانىسىن كورسەتەدى. رەجيسسەر ۇلتتىق سالت-داستۇرىمىزدەگى حالىق اندەرى، ايتىس، ۇلتتىق ويىندار، بي قيمىلدارىن  قولدانۋ ارقىلى سپەكتاكلگە ءوڭ بەرەدى.