كوپشىلىككە كەڭنىنەن تانىمال «اۆاتار» ءفيلمى قازاق تىلىندە كورسەتىلەدى. بۇل تۋرالى Almaty-akshamy.kz Inform.kz-كە سىلتەمە جاساپ حابارلايدى.
«دوستار، سىزدەردى كەرەمەت جاڭالىقتان حاباردار ەتكىم كەلىپ وتىر. وسى جەكسەنبىدەن باستاپ ەلىمىزدىڭ كينوتەاترلارىندا كينەماتوگرافيا تاريحىنداعى ەڭ جوعارى كاسسالى جانە كورەرمەندەر تاراپىنان زور سۇيىسپەنشىلىككە يە بولعان «اۆاتار» ءفيلمى جاڭارتىلعان بەينەدە، وڭدەلگەن دىبىسپەن قازاق تىلىندە قالىڭ كورەرمەنگە جول تارتادى.
ءتۇپنۇسقانى قايتا شىعارۋداعى ماقسات – كەيىنگى ونجىلدىقتىڭ ەڭ ايتۋلى ءفيلمى بولادى دەپ كۇتىلىپ وتىرعان «اۆاتار: سۋ جولى» ەكىنشى ءبولىمىنىڭ شىعۋىمەن ورايلاستىرىلىپ وتىر. ونىڭ دا پرەمەراسى انا تىلىمىزدە بيىل 16 جەلتوقساندا بولادى.
قازاقستاندىق شىعارماشىلىق دۋبلياج توبى فيلم ءماتىنىن قازاق تىلىنە اۋدارۋ، ونىڭ لوكاليزاسياسى جانە دىبىستاۋ بويىنشا ساپالى جۇمىس اتقاردى.
بۇدان بولەك، مادەنيەت جانە سپورت مينيسترلىگى «ينتەرۆيدەو» كومپانياسىمەن بىرلەسىپ الەمدىك پرەمەراسى الداعى 10 قاراشادا وتەتىن MARVEL الەمىنىڭ «قارا پانتەرا: ماڭگى ۆاكاندا» ءفيلمىن دە قازاق تىلىنە دۋبلياجدايتىنىن ايتا كەتكىم كەلەدى.
الداعى ۋاقىتتا دا وسى باعىتتاعى جۇمىستاردى قارقىندى جالعاستىرىپ، كارتينالاردىڭ قازاق تىلىندەگى پروكاتىن كوبەيتە بەرەتىن بولامىز»،-دەپ جازدى مينيستر.