بالا تۋۋ جاسى 25-30 جاس كەزەڭىنە اۋىسىپ جاتىر
ايەلدەردىڭ 35 جاستان كەيىن بالا تۋۋ كورسەتكىشى ەكى ەسەگە جۋىق ازايدى. بۇل تۋرالى قازاقستانداعى يۋنفپا-نىڭ جىنىستىق جانە رەپرودۋكتيۆتى دەنساۋلىق جونىندەگى جوباسىنىڭ ۇيلەستىرۋشىسى گاۋحار ابۋوۆا ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«اتاپ ايتقاندا، بالا تۋۋ كورسەتكىشى حالىق سانىنىڭ ءوسۋى تۇرعىسىندا جەتكىلىكتى بولىپ تۇر. سونىمەن قاتار، دەموگرافيالىق ەسەپتەۋلەر اياسىندا كەلەر 20 جىلدا وسى كورسەتكىش تۇراقتى بولۋى مۇمكىن. دەگەنمەن، تۇڭعىش بالاسىن ايەلدەردىڭ ءبىراز جاسقا كەلگەننەن كەيىن عانا ومىرگە اكەلۋى ءۇردىسى بايقالىپ وتىر. مۇنىمەن قوسا، وتباسىلار از بالا سانىمەن عانا شەكتەلەتىن جاعدايلار جيىلەي باستادى»، - دەدى گ. ابۋوۆا وتباسى، دەموگرافيا جانە گەندەرلىك ساياسات ماسەلەلەرى جونىندەگى حالىقارالىق عىلىمي كونفەرەنسيا بارىسىندا.
ونىڭ ايتۋىنشا، بۇل تۇرعىدا بەلسەندى بالا تۋۋ جاسى كەيىنگى ۋاقىتقا وزگەرە باستادى.
«وسى ورايدا بىزدە بەلسەندى بالا تۋۋ جاسى 25-30 جاس كەزەڭىنە اۋىسىپ جاتىر. ال 35 جاستان كەيىن ءبىز بالا تۋۋ كورسەتكىشىنىڭ ەكى ەسەگە جۋىق تومەندەگەنىن بايقاپ وتىرمىز»، - دەدى گ. ابۋوۆا.
بۇدان بۇرىن حابارلانعانداي، 17 قاراشادا ەلوردادا وتباسى، دەموگرافيا جانە گەندەرلىك ساياسات ماسەلەلەرى جونىندەگى حالىقارالىق عىلىمي كونفەرەنسيا باستالدى.