قاراعاندى وبلىسىنىڭ «سپاسسك» وقۋ ورتالىعىندا بيىل حالىقارالىق مارتەبەگە يە بولعان توعىزىنشى اسكەري-پاتريوتتىق جاستار جيىنىنىڭ سالتاناتتى اشىلۋ ءراسىمى ءوتتى، دەپ حابارلايدى Almaty-akshamy.kz
جاس پاتريوتتار جيىنى قارساڭىندا وتكەن «ادىلەتتى قازاقستان – ادال ازامات» تاقىرىبىنداعى ۇلتتىق قۇرىلتايدىڭ ەكىنشى وتىرىسىندا قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ بالالار مەن جاسوسپىرىمدەر ۇيىمدارىنىڭ قىزمەتىنە سەرپىن بەرۋ قاجەتتىگى تۋرالى ايتتى. وسى تۇرعىدا قورعانىس مينيسترلىگى تۇراقتى تۇردە وتكىزىپ تۇراتىن حالىقارالىق جاستار جيىنى بۇل جۇمىستىڭ بەلگىلى ءبىر ناتيجەسىن كورسەتسە كەرەك.
سالتاناتتى ءراسىم اياسىندا «بىرلىك ورداسى» موبيلدى-كورمە ەكسپوزيسياسىنىڭ تۇساۋكەسەرى، بالالاردىڭ «وتان. اسكەر. جاس سارباز» سۋرەت كورمەسى، سونداي-اق «ايبىن – دوستىق مەكەنى» اللەياسىنا اعاش وتىرعىزۋ شاراسى ءوتتى.
جيىننىڭ اشىلۋ سالتاناتىنا قاراعاندى وبلىسىنىڭ اكىمى ەرماعانبەت بولەكپايەۆ، پارلامەنت دەپۋتاتتارى سەرگەي ەرشوۆ، بولات كەرىمبەك، الىشەر ساتۆالدييەۆ، قورعانىس ءمينيسترىنىڭ ورىنباسارلارى گەنەرال-لەيتەنانت سۇلتان قامالەتدينوۆ جانە گەنەرال-لەيتەنانت مۇحامەدجان تالاسوۆ، ازەربايجان مەن وزبەكستاننان كەلگەن شەتەلدىك قوناقتار، قارۋلى كۇشتەردىڭ ارداگەرلەرى، ەلىمىزدىڭ اسكەري-پاتريوتتىق كلۋبتارى مەن وقۋ ورىندارىنىڭ تاربيەلەنۋشىلەرى قاتىستى.
قورعانىس ءمينيسترىنىڭ ورىنباسارى گەنەرال-لەيتەنانت سۇلتان قامالەتدينوۆ ماڭىزدى ءىس-شارانى اشا وتىرىپ، جيىندى وتكىزۋ يدەياسىن قولداعان ازەربايجان مەن وزبەكستاندىق ارىپتەستەرىنە ريزاشىلىعىن ءبىلدىردى. ول ءبىزدىڭ حالىقتارىمىزدىڭ اراسىنداعى تاريحي تىعىز بايلانىس عاسىرلار بويى قالىپتاسىپ كەلە جاتقانىن اتاپ ءوتتى.
– ءبىز كوپتەگەن تاعدىرلى سىناقتاردان بىرگە ءوتىپ، اتا-بابالارىمىزدىڭ داستۇرلەرىن، قۇندىلىقتارى مەن مادەني-رۋحاني مۇرالارىن ساقتاي الدىق. بۇگىنگى جيىن دا تاريحي دوستىقتىڭ قيسىندى جالعاسى بولىپ تابىلادى، –دەپ اتاپ ءوتتى.
ءوز كەزەگىندە ازەربايجان مەن وزبەكستان دەلەگاسيالارىنىڭ باسشىلارى ءسوز سويلەپ، جاس پاتريوتتار جيىنىنىڭ ماڭىزدىلىعىنا توقتالدى.
«ايبىن» ءانۇرانىنىڭ اياسىندا جارىستىڭ تۋىن كوتەرۋ قۇرمەتىنە جەتىسۋ وبلىسى «جەتىسۋ تارلاندارى» اسكەري-پاتريوتتىق كلۋبىنىڭ كاپيتانى بايعابىل مەيىرجان يە بولدى. بۇل كوماندا «ايبىن-2022» جيىننىڭ جەڭىمپازى اتانعان بولاتىن.
ءراسىمنىڭ رەسمي بولىگى اياقتالعان سوڭ قاتىسۋشىلار مەن قوناقتار ءۇشىن «تورۋىل» روتالىق تاكتيكالىق توبى بولىمشەنىڭ «زاڭسىز قارۋلى قۇرىلىمدى» جويۋداعى ۇيلەسىمدى قيمىلىن كورسەتتى. مايداندىق اۆياسيا ۇشقىشتارى جوعارى پيلوتاج فيگۋرالارىن ورىندادى.
ءىس-شارا قازاقستان قارۋلى كۇشتەرى ۇلتتىق اسكەري-پاتريوتتىق ورتالىعى ونەرپازدارىنىڭ كۇشىمەن دايىندالعان كونسەرتپەن جانە جيىنعا قاتىسۋشىلاردىڭ ورىنداۋىنداعى «ايبىندى ارميا» انىمەن اياقتالدى. الدا تارتىستى جارىستار مەن قىزىقتى مادەني-دەمالىس باعدارلاماسى بار.