ايبەك سمادياروۆ قىتايمەن اراداعى ۆيزاسىز رەجيمگە قاتىستى تۇسىنىك بەردى

مامىردا اتالعان كەلىسىمگە قول قويىلۋى مۇمكىن

سىرتقى ىستەر مينيسترلىگىنىڭ رەسمي وكىلى ايبەك سمادياروۆ قىتايمەن اراداعى ۆيزاسىز رەجيمگە قاتىستى پىكىر ءبىلدىردى، دەپ حابارلايدى Almaty-akshamy.kz قازاقپاراتقا سىلتەمە جاساپ.

«كەيىنگى كەزدەرى قوعامدا جۇڭگو مەن قازاقستان اراسىنداعى ۆيزاسىز رەجيمگە قارسى پىكىرلەر ايتىلىپ جاتىر. بۇل كەلىسىمگە قول قويىلمادى. وعان قول قويىلسا عانا كۇشىنە ەنەدى. ەكىنشىدەن، بىلتىر جازدان بەرى جۇڭگو ازاماتتارى قازاقستانعا 14 كۇنگە ۆيزاسىز كەلە الادى. قازاقستان كوشەلەرىندە قىتايلار كوپ جۇرگەن جوق. ەندى 14 كۇنگە كەلەتىن ازاماتتار 30 كۇنگە كەلە الادى. كەلىسىم قازاقستانعا دا ءتيىمدى بولماق. ەگەر كەلىسىمگە قول قويىلسا، قازاقستان ازاماتى قىتايعا 30 كۇنگە ۆيزاسىز بارا الادى»، - دەدى ا. سمادياروۆ ەلوردادا وتكەن باسپا ءسوز ءماسليحاتىندا.

ونىڭ ايتۋىنشا، ەگەر ادام 30 كۇننەن اسا ەلدە بولسا، ول مىندەتتى تۇردە جازالانادى. ۆيزاسىز رەجيم تۋريستىك ءارى ىسكەرلىك ساپارلارعا ارنالىپ وتىر. وسى ورايدا كەلىسىمشارتتاردى بەكىتۋ، كونسۋلتاسيا جۇرگىزۋ، سونداي-اق باسقا دا ىسكەرلىك قاتىناستارعا باعىتتالعان. بۇل تۇرعىدا جۇمىسقا ورنالاسۋعا رۇقسات ەتىلمەيدى.

«سونداي-اق، جۇك كولىگىن جۇرگىزۋشىلەر دە ۆيزاسىز كىرە الادى. بۇل ءبىراز ماسەلەنى شەشەدى. قوس ەل اراسىنداعى ساۋدا-ساتتىق ءوسىپ، ءوڭىرارالىق ىنتىماقتاستىق نىعايادى، ەكونوميكامىزعا اسەر ەتەدى. جۇڭگو – الپاۋىت ەكونوميكاسى بار مەملەكەت. قازاقستان – ورتالىق ازيادا قىتايمەن ۆيزاسىز رەجيم ورناتقان جالعىز مەملەكەت. مۇنى ءبىز ديپلوماتيالىق جەڭىس دەپ ەسەپتەيمىز»، - دەدى رەسمي وكىل.

ايبەك سمادياروۆ مامىردا اتالعان كەلىسىمگە قول قويىلۋى مۇمكىن ەكەنىن ايتتى.