الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسىنا قاراستى «ايالا» الەۋمەتتىك قىزمەتتەر ورتالىعىنىڭ قوعامداعى ورنى ەرەكشە. سەبەبى، ول جۇيكە جۇيەسىندە كىناراتى بار جانە تىرەك-قيمىل اپپاراتى بۇزىلعان 1،5-18 جاس ارالىعىنداعى مۇگەدەك بالالار مەن پسيحونيەۆرولوگيالىق اۋرۋلارى بار 18 جاستان اسقان ادامدارعا ۇيىندە الەۋمەتتىك قىزمەتتەر كورسەتەدى.
ورتالىقتىڭ تاعى ءبىر ارتىقشىلىعى – جارتىلاي ستاسيونارلىق ۇلگىدە جۇمىس ىستەپ، الەۋمەتتىك-تۇرمىستىق، الەۋمەتتىك-مەديسينالىق، الەۋمەتتىك-پسيحولوگيالىق، الەۋمەتتىك-پەداگوگيكالىق، الەۋمەتتىك-ەڭبەك، الەۋمەتتىك-مادەني، الەۋمەتتىك-قۇقىقتىق، الەۋمەتتىك-ەكونوميكالىق قىزمەتتەر كورسەتىلەدى. بۇل دەگەنىڭىز جۇمىس ىستەيتىن اتا-انا اۋرۋ بالاسىنا الاڭداماي، ورتالىققا قالدىرىپ، كۇندىز جۇمىسىنا كەتە بەرەدى.
«ايالا» الەۋمەتتىك قىزمەتتەر ورتالىعىنىڭ نەگىزگى ماقساتى – ءاربىر قىزمەت الۋشىنىڭ جەكە دامۋىن ەسكەرە وتىرىپ، ولاردى وڭالتۋ، كۇندەلىكتى تۇرمىسقا دا بەيىمدەلۋىنە كومەكتەسۋ جانە قوعامعا ينتەگراسيالاۋ. ال وسىناۋ جاۋاپكەرشىلىگى جوعارى جۇمىستاردىڭ ارعى جاعىندا كەمتار ادامداردى كۇتىپ-قاراۋدا اسقان سابىر مەن ءتوزىمى، مەيىرىمدى دە جىلى جۇرەگى بار الەۋمەتتىك قىزمەتكەرلەر تۇر.
الماتىنىڭ قۇرمانعازى اتىنداعى قازاق ۇلتتىق حالىق اسپاپتار وركەسترىنىڭ ەڭسەلى عيماراتىندا الەۋمەتتىك قىزمەتكەرلەر تورگە وتىرعىزىلىپ، قۇرمەت كورسەتىلدى. وسى مەكەمەنىڭ دە، سىرقات جان باعىپ وتىرعان وتباسىلاردىڭ دا ىستىق-سۋىعىنا بىردەي ءتوزىپ، ولارمەن قيىن ساتتە بىرگە بولىپ، ادال قىزمەت ەتىپ جۇرگەنىنە 15 جىلدان اسقان ارداگەرلەردىڭ كەۋدەسىنە مەرەيتويلىق مەدال تاعىلدى. «العىس حاتپەن» ماراپاتتالدى. قۇشاقتارى گۇلگە تولدى. ءان-جىردان شاشۋ شاشىلدى. الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى باۋىرجان جاۋباسوۆ 35 جىلدىق بەلەستەن وتكەن ارىپتەستەرىن قۇتتىقتاپ، جىلى لەبىزىن ءبىلدىردى.
زۋلفات تاليپوۆا، «ايالا» الەۋمەتتىك قىزمەتتەر ورتالىعىنىڭ بولىمشە كونسۋلتانتى:
– بۇل سالادا ەڭبەك ەتىپ جۇرگەنىمە جيىرما جىلدان اسىپتى. ءقازىر «ايالا» الەۋمەتىتك قىزمەتتەر ورتالىعىنىڭ 1،5-18 جاس ارالىعىنداعى مۇگەدەك بالالارعا ءۇي جاعدايىندا قىزمەت كورسەتۋ بولىمشەسىنىڭ كونسۋلتانتىمىن. مۇمكىندىگى شەكتەۋلى بالالارعا ۇيىنە بارىپ قىزمەت كورسەتەمىز. ءيا، ارينە، وڭاي ەمەس. ءبىراق مۇگەدەك جان باعىپ وتىرعان اتا-انالارعا قوعامنان، اينالاسىنان دەمەۋ، قولداۋ كەرەك. ءبىز ولارمەن قانداي جاعدايدا دا بىرگە ەكەنىمىزدى بىلدىرەمىز. مەن دە مۇمكىندىگى شەكتەۋلى بالالاردىڭ ۋاقىتىنىڭ جاقسى وتۋىنە ۇلەسىمدى قوسىپ جۇرگەنىمدى ماقتان ەتەمىن. اقىل-ەسى تومەن دەگەن بالالاردىڭ ءوزى ۇيگە كىرىپ كەلە جاتقانىمىزدى داۋىسىمىزدان تانىپ قۋانادى، كۇلىمدەپ، سەنى كۇتكەنىن بىلدىرەدى. ول دا ءبىر ادەمى ءسات قوي. سوندىقتان جىلۋىمىزدى اياماۋعا تىرىسامىز. ءبارىمىز بىردەي بۇل جۇمىستى قيىنسىنىپ كەتىپ قالساق، ول جاندارعا كىم قامقور بولادى؟! مەملەكەتىمىزگە راحمەت، وسىنداي الەۋمەتتىك توپتاعى ادامداردى ءوز جاعدايىمەن قالدىرىپ قويماي، قولداۋ كورسەتىپ وتىرعان. وسىنداي ەڭبەگى باعالىپ، توسبەلگى العان ارىپتەستەرىمدى ماقتان ەتەمىن جانە بارلىق جاقسىلىعىنا تىلەكشىمىن.