الماتىدا يسپاندىق سۋرەتشىنىڭ «اي ساۋلەسى» اتتى ايرىقشا كورمەسى اشىلدى
الماتى تورىندە يسپان سۋرەتشىسى حوسە ماريا كانونىڭ «اي ساۋلەسى» (Moon shine) اتتى جەكە كورمەسى اشىلدى. ءابىلحان قاستەيەۆ اتىنداعى ق ر مەملەكەتتىك ونەر مۋزەيىندە اشىلعان كانونىڭ كورمەسى يسپانيا كورولدىگىنىڭ قازاقستان رەسپۋبليكاسىنداعى ەلشىلىگىنىڭ قولداۋىمەن ۇيىمداستىرىلدى، دەپ حابارلايدى almaty-akshamy.kz El.kz اقپارات اگەنتتىگىنە سىلتەمە جاساپ.
سونىمەن قاتار، ءارى ءانشى، ءارى سۋرەتشى حوسە ماريا كانونىڭ بۇل كورمەسى ورتا ازيا ەلدەرىندە ونىڭ ىشىندە قازاقستاندا تۇڭعىش رەت كورەرمەن نازارىنا ۇسىنىلىپ وتىر. ال سۋرەتشى يسپانيا، جالپى، ەۋروپا، رەسەي، جۇڭگو، ۆەتنام مەن لاتىن امەريكاسىنداعى ەلدەردە وتە تانىمال. بۇل جونىندە يسپانيا كورولدىگىنىڭ قازاقستان رەسپۋبليكاسىنداعى ەلشىسى حورحە ۋربيولا لوپەس دە مونتەنەگرو بىلاي دەدى:
«قازاقستاندا حوسە ماريا كانونىڭ سۋرەت كورمەسىن ۇيىمداستىرۋ يدەياسى بىلتىر وسى ءابىلحان قاستەيەۆ اتىنداعى ونەر مۋزەيىنە كەلگەنىمدە تۋدى. ديپلوماتيا دەگەن تەك ساياسات قانا ەمەس، ونەرمەن دە بايلانىستى دەپ ويلايمىن. سوندىقتان دا قازاقستاندىقتاردى يسپان حالقى وكىلىنىڭ ونەرىمەن تانىستىرۋدى دۇرىس دەپ شەشتىم».
1959 جىلى مادريدتە دۇنيەگە كەلگەن بولاشاق سۋرەتشى 10 جاسىنان باستاپ ساۋلەت ينستيتۋتىنا تۇسۋگە دايىندالۋ ءۇشىن، رافاەل يدالگو دە كاۆەدەس اكادەمياسىنا، ودان كەيىن «Artaquio» اكادەمياسىنا بارادى. كانو ساۋلەت ينستيتۋتىنىڭ ءبىرىنشى كۋرسىندا وقىپ ءجۇرىپ ەنكاۋستيكا، ياعني «ورتەپ سالۋ ونەرىن» سونداعى سۋرەتشى پروفەسسوردان ۇيرەنەدى.
بۇگىنگى كورمەگە قويىلعان 19 كارتينانىڭ بارلىعى - وسى تاسىلدە دايىندالعان تۋىندىلار. سۋرەتشىنىڭ پاليتراسىنا كىرەتىن نەگىزگى بايلانىستىرۋشى كومپونەنت – بالاۋىز. ءمارمار نەمەسە باسقا تاقتاعا جاعىلعان بوياۋلار قايتادان ەرىتىلىپ، ماتەريالعا «كۇيدىرىلگەن» بالاۋىز بوياۋلارىمەن كەسكىندەۋ ءادىسى ەجەلگى مىسىردا بەلگىلى بولعان.
مىسىرلىق قولونەرشىلەردىڭ بالاۋىزدى قولدانۋى تاجىريبەلىك ويلاردان تۋىنداعان بولۋى مۇمكىن. قابىرلەر مەن مۋميالاردى بوياۋ ءۇشىن بەرىك، ۋاقىت بويىنشا وزگەرمەيتىن ماتەريالدار قاجەت بولدى. بالاۋىز، بوياۋعا قوسىلعان شايىر سياقتى، وسى ماقسات ءۇشىن وتە قولايلى بولدى. جازباشا دەرەككوزدەر ەنكاۋستيكا تەحنيكاسى تۋرالى بارلىق قۇپيالاردى بەرمەيتىنىنە قاراماستان، كەيىنگى ۇرپاقتاردىڭ وعان دەگەن قىزىعۋشىلىعى تومەندەمەيدى. حوسە كانونىڭ ەنكاۋستيكالىق قۇپياسى بار سياقتى، سوندىقتان ول بالقىتىلعان بوياۋلارمەن تاقتالارعا ەمەس، كەنەپكە جازادى.
«نەگىزى بۇل سۋرەتشىنىڭ شىعارماشىلىعى بەس ءتۇرلى كەزەڭگە بولىنەدى. ءار كەزەڭدە شامامەن 20 جۇمىستان بولسا، جالپى العاندا 100-دەن استام جۇمىسى بار دەسەك بولادى. كانونىڭ ءبىر تۋىندىسىنىڭ قۇنى، ەگەر مەن قاتەلەسپەسەم، حوسپيس اۋكسيونىندا 4000$ ساتىلعان بولاتىن» - دەيدى، ەلشى مىرزا.
2002 جىلدان كاسىبي تۇردە جۇمىس ىستەي باستاعان كانو بۇل كورمەسىندەگى تۋىندىلارىندا تۇنگى شىراقتىڭ جۇمباق جارىعىن بەينەلەۋگە تىرىسقانداي. رومانتيكالىق-اڭىزعا اينالعان اي تاقىرىبى ءارقاشان حوسە كانونى قىزىقتىرىپ كەلەدى. ول «مەكانو» پوپ-توبىندا ءانشى بولعان كەزىندە ءوزىنىڭ ەڭ تانىمال ءانى - «اي بالاسى» باللاداسىن تۇنگى جارىققا ارنادى. كەيىنىرەك كانو لوندوندا قويىلعان «اي» وپەراسىن جازدى، ول وپەرانىڭ پرەمەراسىندا پلاسيدو دومينگو باستى پارتيانى شىرقاعان ەكەن.
ايتا كەتەيىك، كانونىڭ بۇل كورمەسى الماتىدا 5 ناۋرىزعا دەيىن بولىپ، سودان كەيىن استانا جۇرتشىلىعىنا تانىستىرىلاتىن بولادى.
