«قازمۇنايگاز» ۇلتتىق كومپانياسى باسقارما ءتوراعاسىنىڭ ورىنباسارى داۋلەتجان حاسانوۆ بۇگىنگى ۇكىمەت وتىرىسىندا مۇناي وڭدەۋ زاۋىتتارىنداعى بەنزين مەن ديزەل قورى تۋرالى مالىمەت بەردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«جالپى ەلىمىز بويىنشا ءبىر ايعا تۇتىنۋعا جەتكىلىكتى كولەمدە اي-92 ماركالى بەنزينى مەن ديزەل قورى بار. ال اي-98 ماركالى بەنزيننىڭ قورى 2 اپتاعا جەتەدى»، - دەدى ول.
سونداي-اق كومپانيا وكىلى باتىس وڭىرلەردەگى توتەنشە جاعدايعا توقتالدى.
«كەشە تۇستەن كەيىن سىرتقى جەلىلەر تاراپىنان ەلەكتر ەنەرگياسىنىڭ وشۋىنە بايلانىستى اتىراۋ مۇناي وڭدەۋ زاۋىتىنىڭ جۇمىسى توقتاتىلدى. ءدال وسىنداي سەبەپپەن قاراباتانداعى گاز-حيميا كەشەنىندەگى جۇمىس تا اپاتتىق جاعدايدا توقتاتىلدى. ەلەكتردىڭ ءوشۋىنىڭ سالدارىنان اتىراۋ مۇناي وڭدەۋ زاۋىتىنىڭ بارلىق تەحنولوگيالىق قوندىرعىلارى ءقاۋىپسىز توقتاتىلدى.
اۆاريالىق جاعدايدىڭ الدىن الۋ جانە قىزمەتكەرلەردىڭ قاۋىپسىزدىگىن قامتاماسىز ەتۋ ءۇشىن اپاتتى جويۋ الگوريتمىنە سايكەس بارلىق قوندىرعىلاردان كومىرسۋتەگى گازى الاۋعا جىبەرىلدى.
3 شىلدەگە قاراعان ءتۇنى ەلەكتر قۋاتىن قايتا بەرۋ باستالعاننان كەيىن زاۋىت قولدا بار قورلاردان مۇناي ونىمدەرىن جونەلتۋدى قايتا باستادى. اتىراۋ مۇناي وڭدەۋ زاۋىتى رەزەرۆۋارىندا بۇگىنگى تاڭدا 26 مىڭ توننا اۆتوبەنزين، 33 مىڭ توننا ديزەل، 1200 توننا سۇيىتىلعان مۇناي گازى بار. بۇل كولەمدەر 7 كۇنگە تۇراقتى جونەلتۋگە جەتكىلىكتى»، - دەدى داۋلەتجان حاسانوۆ.