ۇلت ۇستازىنىڭ 150 جىلدىعىندا كوپتى قۋانتقان جاڭالىقتى احمەتتانۋشى عالىمدار سۇيىنشىلەي حابارلادى.
الاش ارداقتىسى احمەت بايتۇرسىن ۇلىنىڭ دومبىراسى تابىلدى، دەپ حابارلايدى Almaty-akshamy.kz الماتى ارناسىنا سىلتەمە جاساپ.
ۇلت ۇستازىنىڭ 150 جىلدىعىندا كوپتى قۋانتقان جاڭالىقتى احمەتتانۋشى عالىمدار سۇيىنشىلەي حابارلاپ وتىر. ونىڭ ۇستىنە بۇل اقجولتاي اقپاردىڭ ۇلتتىق دومبىرا كۇنىمەن تۇسپا-تۇس كەلگەنى تاعى بار.
بايتۇرسىنۇلىنان جەتكەن باعالى مۇرالاردىڭ قاتارى كوپ ەمەس. اعارتۋشى اتىندا ءمۇراجاي-ۇي بولعانىمەن، ونداعى تەك ساناۋلى ەكسپوناتتىڭ احمەت داۋىرىنەن جەتكەنى كوپكە ءمالىم. اۋەلى احمەتتانۋشىلاردى، كەيىننەن كۇللى قازاقتى قۋانتقان قارا دومبىرا بۇعان دەيىن قولدان قولعا ءوتىپ، ساقتالىپ كەلىپتى. ەندىگىدە احاڭنىڭ ءوزى ۇستاپ، كوزى كوردى دەگەن ازىن-اۋلاق مۇرانىڭ قاتارى ونىڭ قولى تيگەن دومبىراسىمەن تولىقپاق.
«احمەتتىڭ تۋىستارى سول دومبىرانى دا ساقتاۋعا قورىققان عوي نەگىزى. ءسويتىپ، ءبىر قولدان ەكىنشى قولعا ءوتىپ كەتكەن. نەگىزى جيەنىندە بولعان، احمەتتىڭ قارىنداسى زەيلاشتان تۋعان باكىباي اعاي بەيىسوۆتەر وتباسى كۇنى كەشەگە دەيىن ساقتاپ كەلگەن دە، كەيىن1956 جىلى قايتادان بۇل كىسىلەردىڭ سوڭىنا تۇسە باستاعان كەزدە، وزدەرىنەن تۋعان جيەنشارعا بەرىپ جىبەرگەن ەكەن. قايتا قالپىنا كەلتىرگەننەن كەيىن مىنا 150 جىلدىقتاعى ۇلكەن ءبىر توسىن ءارى تارتۋ سىيىمىز سول احمەتتىڭ قولى تيگەن دومبىرا بولادى»، – دەدى احمەتتانۋشى، احمەت بايتۇرسىن ۇلى مۋزەي-ۇيىنىڭ جەتەكشىسى رايحان يماحانبەت.
قۇندى جادىگەر احاڭ ومىردەن وتكەن 85 جىلدا ءار ادامنىڭ امانات ەتىپ تاپسىرۋىمەن بۇگىنگە جەتىپ وتىر. ازىرگە دومبىراعا قاتىستى تولىق اقپار جوق. بەت قاقپاعى ءبۇلىنىپ، قۇلاق، ىشەگى جوعالعان ەكەن. مۇرا ماماندار قولىنان ءوتىپ، قايتا قالپىنا كەلتىرىلەدى. سودان سوڭ كوپتىڭ نازارىنا ۇسىنىلماق.