ماۋسىمارالىق كەزەڭدە ادامداردىڭ 80 پايىزىندا دارۋمەن جەتىسپەيدى – الماتىلىق ساراپشى
الماتى قالاسىنىڭ وڭىرلىك كوممۋنيكاسيالار قىزمەتىندە وتكەن بريفينگتە №26 ەمحانانىڭ گەرونتولوگ دارىگەرى سۆەتلانا فازىلجانوۆا دارۋمەن جەتىسپەۋشىلىگىنىڭ سەبەپتەرى، بەلگىلەرى جانە اۆيتامينوز كەزىندە كەزدەسەتىن اۋرۋلار تۋرالى ايتتى.
اتاپ وتەتىنى، اۆيتامينوز - ادام اعزاسىندا ءبىر نەمەسە دارۋمەندەر توبىنىڭ جەتىسپەۋشىلىگى. دارىگەردىڭ ايتۋىنشا، جىل سايىن ماۋسىمارالىق كەزەڭدە ادامداردىڭ 60-80%-ى دارۋمەن جەتىسپەۋشىگىن سەزىنەدى. اتالعان اۋرۋعا جەتكىلىكسىز نازار اۋدارۋ جانە ونى ەلەمەۋ كوبىنەسە جاعىمسىز سالدارعا جانە جاعدايدىڭ ناشارلاۋىنا اكەلەدى.
«ءار ادامنىڭ اعزاسىنا جەكە قاراۋ كەرەك جانە ونى دارۋمەندەردى تاڭداعان كەزدە دە ەسكەرگەن ءجون، مينەرالداردى زاتتار مەن ولاردىڭ كولەمى دە سوعان قاراي تاعايىندالادى. ءارتۇرلى پاتولوگيالارمەن جانە اۋىرعان اۋرۋلاردىڭ سالدارىنان دارۋمەن جەتىسپەۋشىلىگى بىرنەشە ەسە ارتۋى مۇمكىن. ايتا كەتەرلىگى، سۋىق تيگەن كەزدە اسپيرين قابىلداۋ اعزادان س دارۋمەنىنىڭ ءبولىنۋ جىلدامدىعىن 3 ەسەگە ارتتىرادى»، - دەيدى س.فازىلجانوۆا.
دارىگەردىڭ ايتۋىنشا، اۆيتامينوزدى اتالعان بەلگىلەردىڭ نەگىزىندە انىقتاۋعا بولادى:
– بۇرىن جانعا راحات سىيلايتىن زاتتار مەن ارەكەتتەرگە اپاتيا جانە قىزىعۋشىلىقتى جوعالتۋ؛
– سۋىق تيۋ مەن مۇرىننىڭ ءبىتۋى تۇراقتى سەرىكتەرگە اينالادى؛
– ءبىر نەمەسە بىرنەشە سوزىلمالى اۋرۋلاردىڭ ءورشۋى
– ۇيىقتاپ كەتۋ قيىن، ال تاڭەرتەڭ ورىننان تۇرۋ ودان دا قيىنىراق بولادى؛
– تۇنگى 2:30 جانە 3:30 ۋاقىت ارالىعىندا ءجيى ويانۋ؛
– تەرىدە بەزەۋدىڭ پايدا بولۋى نەمەسە تەرىنىڭ شامادان تىس قۇرعاۋى؛
– شاشتىڭ سىنعىشتىعى جانە تىرناقتاردىڭ قاتپارلانۋى؛
– ءىش قاتۋ، گاستريت تۇرىندە اسقازان-ىشەك جولدارىنىڭ بۇزىلۋىنىڭ پايدا بولۋى؛
– قىزىليەكتىڭ اياقاستى قاناۋى؛
– نازاردى شوعىرلاندىرا الماۋ؛
– باستىڭ ۇنەمى اۋىرۋى؛
– قۇلاقتىڭ شۋلاۋى جانە باستىڭ جەڭىل اينالۋى.
بۇل تىزىمدەگى ەكى بەلگىنىڭ بولۋى پروگرەسسيۆتى كوكتەمگى اۆيتامينوزمەن جەدەل كۇرەسۋ قاجەتتىگىن كورسەتەدى، دەيدى ساراپشى.
سونداي-اق، دارىگەردىڭ ايتۋىنشا، جاعىمسىز بەلگىلەر كوبىنەسە بىرنەشە دارۋمەندەر مەن مينەرالداردىڭ جەتىسپەۋشىلىگىنىڭ ناتيجەسىنەن بولادى.
«كوكتەمگى اۆيتامينوزبەن ءتيىمدى كۇرەسۋ ءۇشىن قازىرگى ۋاقىتتا اعزاعا قانداي دارۋمەندەر نەمەسە ولاردىڭ كومبيناسياسى قاجەت ەكەنىن انىقتاۋ ماڭىزدى. كۇن سايىن جەتىسپەيتىن دارۋمەننىڭ ناقتى مولشەرىن تولتىرۋعا تىرىسپاۋ كەرەك ەكەندىگى دالەلدەندى. ونىڭ ورنىنا دارىگەرلەر قاجەتتى دارۋمەندەر مەن مينەرالداردىڭ ورتاشا مولشەرىن بىرنەشە كۇن نەمەسە اپتا ىشىندە الۋعا كەڭەس بەرەدى»، - دەپ ءتۇسىندىردى سپيكەر.
دارۋمەن تاپشىلىعىنىڭ الدىن الۋدىڭ نەگىزگى قاعيداسى – دۇرىس جانە تەڭدەستىرىلگەن ديەتانى ساقتاۋ. سونىمەن قاتار، دارۋمەن جەتىسپەۋشىلىگى كەزىندە تازا اۋادا ءجيى سەرۋەندەۋ جانە تۇراقتى سپورتتىق جاتتىعۋلار كومەكتەسەدى.
دارىگەر تاماقتانۋدىڭ نەگىزگى ەرەجەلەرىن ەلەۋسىز قالدىرماۋعا جانە تاماقتانۋ راسيونىنا جاڭا سىعىلعان شىرىنداردى، فرەشتەردى، كوكونىستەردىڭ، جەمىستەردىڭ جانە كوك شوپتەردىڭ ارتۇرلىلىگىن قوسۋدى ۇسىنادى.
سونداي-اق، مامان دارۋمەننىڭ جەتىسپەۋىن ەلەمەۋ مەديسينالىق ارالاسۋدى قاجەت ەتەتىن اۋىر اۋرۋلارعا، ءتىپتى اۋرۋحاناعا جاتقىزۋعا دەيىن اپاراتىنىن ەسكەرتەدى.