الماتىدا افريكا قۇرلىعىنىڭ 60-تان استام ازاماتى قازاقستاننىڭ كوشى-قون زاڭناماسىن بۇزعان، دەپ حابارلايدى Almaty-akshamy.kz.
الماتى قالاسىنىڭ كوشى-قون قىزمەتىنىڭ مالىمەتىنشە، جىل باسىنان بەرى افريكانىڭ 64 ازاماتى ۇستالدى، ونىڭ 55ء-ى نيگەريا، 5ء-ى كامەرۋن، ەكەۋى وڭتۇستىك افريكا جانە ەكەۋى كوت-د’يۆۋار جانە سەررا-لەونە ەلىنىڭ ازاماتى.
«سوت شەشىمىمەن ولاردىڭ 12ء-سى قازاقستاننىڭ اۋماعىنان شىعارىلدى. تاجىريبە كورسەتكەندەي، افريكا ەلدەرىنىڭ ازاماتتارىنىڭ كوپشىلىگى قازاقستانعا تۋريستىك، جۇمىس نەمەسە وقۋ ۆيزالارىمەن كەلەدى. الايدا ولاردىڭ ءبىرازى ۋاقىتىندا ەلدەرىنە كەتپەي، قازاقستاننىڭ كوشى-قون زاڭناماسىن بۇزعان»، - دەدى الماتى قالالىق پوليسيا دەپارتامەنتىنىڭ كوشى-قون قىزمەتى باسقارماسىنىڭ باستىعى اسحات بۋتۋنچينوۆ.
ونىڭ سوزىنشە، الماتىدا وتكەن رەسپۋبليكالىق «نەلەگال» ءىس-شاراسى كۇندەرىندە شەتەلدىكتەردى شاقىرۋشى تاراپ قىزمەتىن اتقارىپ، قوناقتاردىڭ ەلدەرىنە ۋاقىتىندا كەتۋىن قامتاماسىز ەتپەگەن 5 فيرما انىقتالعان، دەپ جازدى قازاقپارات. بۇل زاڭدى تۇلعالار ق ر اقبتك-نىڭ 518-بابى بويىنشا جاۋاپقا تارتىلدى. تاعى ءبىر جەكە كاسىپكەر وسىنداي زاڭ بۇزۋشىلىقتىڭ قايتالانۋىنا بايلانىستى شەتەل ازاماتتارىن شاقىرۋ ليسەنزياسىنان ايىرىلعان. سونىمەن قاتار ءىس-شارا كۇندەرىندە شەتەلدىك جۇمىس كۇشىن قايتا تارتۋدىڭ ەكى دەرەگى انىقتالىپ، جولى كەسىلدى.