الەمدەگى العاشقى اتوم ەلەكتر ستانسياسى 1954 جىلى وبنينسك قالاسىندا ىسكە قوسىلدى. بۇل بەيبىت ماقساتتا ەلەكتر ەنەرگياسىن وندىرەتىن العاشقى اتوم ەلەكتر ستانسياسى رەتىندە تانىلدى. كەيىننەن ءار ءتۇرلى ەلدەردە اتوم ەلەكتر ستانسيالارىن قۇرۋ جانە دامىتۋ ءۇردىسى باستالىپ، 1956 جىلى ۇلىبريتانياداعى العاشقى كوممەرسيالىق اەس — Calder Hall جۇمىسىن باستادى.
2024 جىلعى جاعداي بويىنشا الەمدە 31 ەلدە شامامەن 415 يادرولىق رەاكتور جۇمىس ىستەيدى. الەمدەگى ەڭ كوپ اەس سانى اقش-تا (94)، فرانسيادا (56)، قىتايدا (56)، رەسەيدە (36) ورنالاسقان.
اتوم ەلەكتر ستانسيالارىنىڭ 70 جىلدىق تاريحىندا تەك ءۇش ءىرى اپات ورىن العان: 1979 جىلى اقش-تاعى تري-مايل-ايلەند، 1986 جىلى چەرنوبىل جانە 2011 جىلى جاپونياداعى فۋكۋسيما-1 ستانسيالارىنىڭ اپاتتارى.
بۇل اپاتتاردىڭ ساباقتارى نەگىزىندە جاڭا بۋىن رەاكتورلارى سەنىمدىلىك پەن قاۋىپسىزدىك كورسەتكىشتەرىن بارىنشا ارتتىرىپ، جاڭادان جوبالانىپ، پايدالانۋعا بەرىلدى. قازىرگى زامانعى اەس تابيعي اپاتتارعا جانە تەحنوگەندىك ەكسترەمالدى اسەرلەرگە توتەپ بەرۋگە قابىلەتتى ەتىپ جاسالعان. مىسالى، 8 بالدىق جەر سىلكىنىستەرى نەمەسە ۇلكەن ۇشاقتاردىڭ قۇلاۋى سياقتى وقيعالارعا قارسى جوعارى دەڭگەيدە قورعالعان.
قازىرگى زامانعى اتوم ستانسيالارىنداعى اپاتتاردىڭ ىقتيمالدىعى تەوريالىق تۇرعىدان 10 ميلليون جىل جۇمىس ىستەۋ كەزىندە 1 اپاتتان از دەپ ەسەپتەلەدى. سالىستىرىپ ايتساق، كومىر ەلەكتر ستانسيالارىندا جارىلىس ىقتيمالدىعى 80 ەسە جوعارى.
اتوم ەلەكتر ستانسيالارى ەكونوميكالىق، ەكولوگيالىق جانە تەحنيكالىق پارامەترلەردىڭ بىرەگەي ۇيلەسىمىنىڭ ارقاسىندا تۇراقتى ەنەرگيانى، كومىرقىشقىل گازىنىڭ شىعارىندىلارىن قىسقارتۋدى جانە ەنەرگەتيكالىق تاۋەلسىزدىكتى قامتاماسىز ەتەتىن جاھاندىق ەنەرگەتيكانىڭ نەگىزگى ەلەمەنتى بولىپ تابىلادى. كليماتتىڭ وزگەرۋىمەن كۇرەسۋ جانە ەنەرگياعا سۇرانىستىڭ ارتۋى جاعدايىندا اەس-تەر سەنىمدى جانە بولاشاققا باعىتتالعان ەنەرگيا كوزى رەتىندە ەلدەرگە تۇراقتى ەكونوميكالىق ءوسۋدى جانە حالىقتىڭ ءال-اۋقاتىن قامتاماسىز ەتۋگە مۇمكىندىك بەرەدى.